Bakı, 2 mart, AZƏRTAC

Bakıda keçirilən Qoşulmama Hərəkatının COVID-19-a qarşı mübarizə üzrə Təmas Qrupunun Zirvə görüşü ərəb mediasının diqqət mərkəzindədir.

AZƏRTAC xəbər verir ki, Misirin “Cairo24” informasiya portalı Qoşulmama Hərəkatına sədrlik edən Azərbaycan Prezidenti İlham Əliyevin çıxışından əsas məqamları dərc edib. Materialda diqqətə çatdırılıb ki, Prezident İlham Əliyev Hərəkatın son bir neçə ildə beynəlxalq münasibətlərdə mühüm aktorlardan birinə çevrildiyini, pandemiyanın başlamasından dərhal sonra COVID-19-a qarşı qlobal səyləri səfərbər etmək təşəbbüsü ilə çıxış etdiyini bildirib. O diqqətə çatdırıb ki, Azərbaycan 2020-ci ilin mayında Qoşulmama Hərəkatının dövlət və hökumət başçıları səviyyəsində onlayn Zirvə toplantısının keçirilməsi təşəbbüsünü irəli sürüb, bu tədbirdə məlumat bazası hazırlamaq üçün Qoşulmama Hərəkatının İşçi Qrupunun yaradılması qərara alınıb. Ümumdünya Səhiyyə Təşkilatı pandemiya ilə mübarizədə Qoşulmama Hərəkatına üzv dövlətlərin ehtiyaclarını müəyyən etmək üçün bu məlumat bazasına istinad edib.

Liviyanın LANA agentliyinin xəbərində Azərbaycanın Qoşulmama Hərəkatına uğurlu sədrliyi vurğulanıb, bu münasibətlə Liviya Prezident Şurasının sədri Məhəmməd Yunis Əl-Mənfinin Prezident İlham Əliyevə təşəkkür etdiyi qeyd edilib. Xəbərdə diqqətə çatdırılıb ki, Liviya Prezident Şurasının sədri COVID-19 pandemiyasının bəşəriyyətə silahlı münaqişələrdən də çox ziyan vurduğunu deyib, bütün dövlətləri öz ölkəsində münaqişənin həllinə və sabitliyə kömək etməyə çağırıb.

İraqın INA agentliyinin xəbərində qeyd edilib ki, Azərbaycan Qoşulmama Hərəkatının tarixində ən uğurlu sədrlik edən ölkə olub və bəşəriyyət üçün ən ağır bir zamanda - COVID-19 pandemiyası dövründə mühüm və faydalı təşəbbüslərlə çıxış edib. Materialda İraq Prezidenti Əbdüllətif Camal Rəşidin Zirvə görüşündə çıxışına geniş yer verilib. Qeyd olunub ki, İraqın dövlət başçısı pandemiya ilə əlaqədar ölkəsində hələ də mövcud olan problemlərdən, iqlim dəyişikliyi ilə bağlı görülən işlərdən ətraflı bəhs edib.

Əlcəzairin APS informasiya agentliyinin xəbərində də Azərbaycan Prezidenti İlham Əliyevin Qoşulmama Hərəkatına uğurlu sədrliyi dövründə irəli sürülən təşəbbüslərdən, COVID-19-a qarşı mübarizədə ölkəmizin lider mövqeyindən bəhs olunub. Materialda Əlcəzairin Baş naziri Ayman Benabderrahmanın sammitdəki çıxışından əsas məqamlar yer alıb.

Birləşmiş Ərəb Əmirliklərinin “”AL24” telekanalı, “Şarjah24” və “Əl İttihad” portalları BƏƏ-nin Ali Şurasının üzvü, Ras əl-Xeymə Əmirliyinin hakimi Şeyx Saud Bin Saqr Al Qasiminin Zirvə görüşündə iştirakından bəhs olunub, Qoşulmama Hərəkatının Azərbaycanın sədrliyi altında yeni məzmun və nüfuz qazandığı qeyd edilib.

Küveytin KUNA agentliyi də öz saytında Qoşulmama Hərəkatının COVID-19-a qarşı mübarizə üzrə Təmas Qrupunun Zirvə görüşü haqqında xəbər və fotoşəkillər yerləşdirib.