Sumqayıt, 31 avqust, Ətrabə Rzayeva, AZƏRTAC

1993-cü il avqustun 31-də şəhid olmuş Bədəlov Nadir Ərşad oğlunun və vəzifə borclarını yerinə yetirərkən həlak olan hüquq-mühafizə orqanlarının əməkdaşları - keçmiş rayon prokuroru Ağayev Nizami Məsiməli oğlu, keçmiş rayon Polis şöbəsinin rəisi Paşayev Evaris Sabir oğlu, sürücüsü Nuriyev Xanlar Eldar oğlu, rayon prokurorluğunun müstəntiqi Vəliyev Əyyub Əli oğlu, rayon polis rəisinin sürücüsü Hüseynov Sərdar Hüseynqulu oğlunun bu gün anım tədbiri keçirilib.

AZƏRTAC xəbər verir ki, Qubadlı Rayon İcra Hakimiyyətinin təşkilatçılığı ilə keçirilən tədbirdə icra hakimiyyətinin məsul işçiləri, YAP Qubadlı rayon təşkilatının rəhbərliyi, idarə, müəssisə, təşkilat rəhbərləri, şəhidlərin ailə üzvləri, keçmiş hərbçilər, ictimaiyyət nümayəndələri iştirak ediblər.

Əvvəlcə Bakı şəhərində Şəhidlər xiyabanı ziyarət olunub, şəhidlərin ruhuna dualar oxunub. Sonra tədbir iştirakçıları torpaqlarımızın bütövlüyü uğrunda canlarından keçmiş Vətən oğullarının xatirəsini bir dəqiqəlik sükutla yad ediblər.

Rayon icra hakimiyyəti başçısının müavini Allahverdi Haqverdiyev çıxış edərək bildirib ki, I Qarabağ müharibəsində Qubadlı rayonundan 238 nəfər şəhid olub. Onlardan 11 nəfəri Azərbaycanın Milli Qəhrəmanı adına layiq görülüb. 1993-cü ilin təkcə avqust ayında I Qarabağ müharibəsi zamanı Qubadlı rayonu 105 şəhid verib. Avqustun 31-də, həmçinin xeyli sayda mülki vətəndaş şəhid olub. Yüz nəfərdən çox sakin isə itkin düşüb.

Qeyd olunub ki, 44 günlük Vətən müharibəsindən sonra Qubadlı Rayon İcra Hakimiyyətinin iştirakı ilə Qubadlı rayonunda Milli qəhrəmanlar Əliyar Əliyev, Kərəm Mirzəyev, Vasili Əliyev, Aqil Məmmədov, Bəylər Ağayev və Milli Qəhrəman Əliyar Əliyevin sürücüsü Əlisadət Ağayevin və Həsən Qorxmazın qəbirüstü abidələri yenidən götürülüb. Eləcə də Aşağı Mollu kəndində Həcər xanımın qəbirüstü abidəsi bərpa olunub. Qəbirüstü abidələrin bərpası davam edir, yaxın gələcəkdə digər şəhidlərimizin qəbirüstü abidələri də bərpa olunacaq. I və II Qarabağ müharibələri şəhidlərinin xatirəsini əbədiləşdirmək məqsədi ilə abidələr qoyulur, xatirə lövhələri, barelyeflər hazırlanır.

YAP Qubadlı rayon təşkilatının sədri Təhmasib Rüstəmov Vətən müharibəsində qəhrəmancasına döyüşmüş, Azərbaycan bayrağını işğaldan azad edilən torpaqlarımızda dalğalandırmış, ölkəmizin ərazi bütövlüyü uğrunda canlarını fəda etmiş əsgər və zabitlərimizin qəhrəmanlığından, xalqımızın birliyindən, “Dəmir yumruq” ətrafında birləşərək işğalçıya sarsıdıcı zərbə vurmasından danışıb.

Təhmasib Rüstəmov qeyd edib ki, 44 günlük Vətən müharibəsində Qubadlı rayonu 11 şəhid verib, 40-dan çox qazi adlarını tarixə yazdırıb.

Digər çıxış edənlər - keçmiş komandir Sadiq Paşayev və şəhid N.Bədəlovun döyüş yoldaşı Kərimağa Kərimov bildiriblər ki, şəhidlərimizin ailələri həmişə dövlət tərəfindən diqqət mərkəzində saxlanılıb. Son illər respublikamızda şəhid ailələrinin sosial müdafiəsinin gücləndirilməsi, onların mənzil-məişət şəraitinin yaxşılaşdırılmasına yönəlmiş tədbirlər bunun bariz nümunəsidir.

Bildirilib ki, Nadir Ərşad oğlu Bədəlov 1967-ci il iyunun 18-də Şərqi Zəngəzur-Qubadlı rayonunun Dondarlı kəndində anadan olub. 1991-ci ildə Azərbaycan Politexnik İnstitutunun qara və əlvan metalların tökmə ixtisası üzrə tam kursunu bitirib, eyni zamanda, zabit rütbəsi alıb. 1985-1987-ci illərdə Almaniyada sovet ordusu sıralarında xidmət edib.

Gənc mühəndis-metallurq 1992-ci il yanvar ayından Azərelektroterm Elm İstehsalat Birliyinin Ağır Elektrik Avadanlığı Zavodunda əmək fəaliyyətinə başlayıb. Qeyrətli oğullarımız kimi, Nadir də Vətənin çağırışına səs verib, könüllü olaraq hərbi komissarlığa müraciət edib. 1992-ci il avqustun 7-də zavodun kollektivi Nadir Bədəlovu cəbhəyə yola salıb. “N” hərbi hissədəki qısamüddətli təlimdən sonra gənc zabit Ağdərə bölgəsinə göndərilib. Nadirin başçılıq etdiyi topçular batareyası Ağdərə və Tərtər bölgələrində gedən döyüşlərdə fədakarlıqla vuruşub. Nadir Bədəlov bölmə komandiri vəzifəsinə təyin edilib. Artilleriya elminin sirlərinə dərindən bələd olduqları, bu sahədə uğurlu nəticələr qazandıqlarına görə bölmə komandiri, leytenant Nadir Bədəlovun topçular batareyası daha məsul bir bölgəyə - son dərəcə təhlükəli döyüş bölgələrindən hesab edilən Laçın və Qubadlı cəbhələrinə göndərilib.

Onun Laçın rayonunun Güləbird, Səfiyan, Aşağı və Yuxarı Fərcan, Suarası kəndləri, Susuzdağ və Qızqəbri yüksəkliklərinin düşməndən təmizlənməsində əvəzsiz xidmətləri olub.

1993-cü il avqustun 31-də genişmiqyaslı hücuma keçən Nadir bir qrup döyüşçü dostu - yeddi topçu, bir sürücü Yazı düzündə özləri də bu döyüşün axırı ölüm olacağını bilə-bilə özlərinə mövqe seçdilər. Rayonun bir hissəsi - Həkəri çayının hər iki sahilindəki kəndlər güclü hücuma məruz qalmışdı. Düşmən tankları Yazı düzü istiqamətində genişmiqyaslı hücuma keçdi. Qeyri-bərabər döyüşdə düşmənin bir neçə tankı məhv edildi, xeyli canlı qüvvəsi öldürüldü. Bu döyüşdə Nadir və bir neçə döyüşçü dostları qəhrəmanlıqla şəhid oldular.

Çıxış edən şəhid Nadir Bədəlovun qardaşı Loğman Bədəlov və şəhidin dayısı oğlu Xalid Haqverdiyev göstərdikləri diqqət və qayğıya görə Ali Baş Komandan, Prezident İlham Əliyevə, Birinci vitse-prezident Mehriban xanım Əliyevaya minnətdarlıqlarını bildiriblər.

Sonda Sumqayıt Regional Mədəniyyət İdarəsinin Qubadlı rayon nümayəndəliyi tərəfindən vətənpərvərlik mövzusunda hazırlanmış kompozisiya və şəhidlərimizin ruhuna həsr olunmuş şeirlər səsləndirilib.