Bakı, 8 iyul, AZƏRTAC

Dərisinin rəngindən, sosial durumundan, siyasi, dini əqidəsindən və digər amillərdən asılı olmayaraq bütün qitələrin atletləri arasında ədalətli idman mübarizəsinin simvolu kimi qəbul edilən Olimpiya Oyunlarının növbəti yarışlarının 2024-cü ildə Fransada keçirilməsi nəzərdə tutulub. Zorakılığın, irqi ayrı-seçkiliyin, müstəmləkəçilik siyasətinin hökm sürdüyü bir ölkədə bu ali idman tədbirinin təşkili sülh və əmin-amanlıqla daim yanaşı duran sivil Olimpiya ideallarına zərbə deyilmi?

Bu sözləri AZƏRTAC-a müsahibəsində idman siyasəti üzrə ekspert, Azərbaycan Alpaqut Federasiyasının prezidenti Qüdrət Nuriyev bildirib.

“Bütün insani dəyərlərin ayaqlar altına atıldığı Fransa kimi bir ölkədə hansı ədalətli mübarizədən söhbət gedə bilər?”, - deyə Q.Nuriyev davam edib: “Fransada Əlcəzair əsilli yeniyetmənin polis tərəfindən vəhşiliklə qətlə yetirilməsi sadəcə qığılcım oldu. Ümumiyyətlə, Emmanuel Makronun hakimiyyətə gəlişindən bəri ölkədə genişmiqyaslı etiraz aksiyaları səngimək bilmir. Hökumətin hazırkı rejiminə və tətbiq etdiyi idarəetməyə etirazını bildirən əhali Fransada dərin islahatlar aparılmasını tələb edir. Xalqın etimadını tam itirən Fransa hökuməti ölkədə xaosun, hərc-mərcliyin, itaətsizliyin qarşısını ala bilmir, vəziyyət gündən-günə pisləşir. Prezident Emmanuel Makron öz hakimiyyətini qorumaq üçün polis qüvvələrinə arxalanaraq əsl diktatura qurub. Hazırda küçələrdə və ictimai yerlərdə dəhşətli yanğın hadisələri, kütləvi soyğunçuluq halları, taxta, dəmir parçaları ilə silahlanan vətəndaşların qarşıdurmaları bu ölkənin nə qədər təhlükəli olduğunu göstərir. Belə olan halda Fransada dünya əhəmiyyətli tədbirlərin, o cümlədən dördilliyin ən nüfuzlu idman tədbirinin - Olimpiya Oyunlarının təhlükəsiz şəkildə keçiriləcəyinə kim zəmanət verə bilər. İnsanlarla quldarlıq dövründə olduğu kimi, rəftar edilən Fransada vətəndaşların hələ də irqi, dini, milli ayrı-seçkiliyə görə əziyyət çəkib dəhşətli əzablara məruz qalmaları sirr deyil”.

İdman siyasəti eksperti deyib ki, Fransa dünyada demokratiyanın beşiyi deyil, məzarı olduğunu əyani şəkildə göstərir. Fransa və ona yaxın olan bir sıra Avropa ölkələrinin mətbuatı kütləvi etirazları və buna qarşı polisin mübarizəsini az qala demokratiya nümunəsi kimi təqdim etmələri isə gülüncdür. Müasir Fransa cəmiyyətində getdikcə artan problemlər və davam edən dərin ziddiyyətlər insanların səbir kasasını daşırıb. Bu gün BMT Təhlükəsiz Şurasının daimi üzvü olmasından istifadə edən Fransanın bir çox millətlərə, dövlətlərə qarşı işğalçılıq, soyqırımı siyasətinə dünya göz yumur. Fransa tarixin ən qanlı qətliamlarını törədib, Əlcəzairdə, bir sıra Afrika, Şərqi Asiya dövlətlərində milyonlarla insanı qətlə yetirib. Əlcəzairli azadlıq döyüşçülərinin kəllə sümükləri Paris muzeyində hələ də müharibə qənimətləri kimi saxlanılır.

Azərbaycan Prezidenti İlham Əliyev Qoşulmama Hərəkatının Əlaqələndirmə Bürosunun Bakıda keçirilən nazirlər görüşündə Fransanın öz müstəmləkə keçmişinə, qanlı müstəmləkə cinayətlərinə və soyqırımı aktlarına görə Qoşulmama Hərəkatına üzv olan Afrika, Cənub-Şərqi Asiya ölkələrindən və digər ölkələrdən üzr istəməli olduğunu diqqətə çatdırıb. Azərbaycanın neokolonializm meyillərinin artmasından olduqca narahat olduğunu bildirən dövlətimizin başçısı qeyd edib ki, dekolonizasiya prosesi nəticəsində yaranmış Qoşulmama Hərəkatı keçmişin bu utancverici mirasına qarşı qətiyyətlə mübarizə aparmalı və onun tamamilə aradan qaldırılmasına öz töhfəsini verməlidir.

Olimpiya dəyərlərini, onun ali prinsiplərini ayaq altına atmaq olmaz. Biz idmançılar Olimpiya Oyunlarının Fransa kimi insanlıq əleyhinə ən dəhşətli cinayətlər törədən və bu missiyanı davam etdirən bir ölkədə keçirəcəyindən narahatıq. Olimpiya Oyunları idealları və dəyərləri ilə insanların qəlbində dərin iz buraxıb. Olimpiya ruhuna daban-dabana zidd olan zorakılığın, ksenofobiyanın və irqçi əhvali-ruhiyyənin tüğyan etdiyi Fransada Olimpiadanın təşkili bu Oyunların imicinə vurulan ən böyük zərbə olacaq.