Bakı, 26 yanvar (AZƏRTAC). Rusiya İnformasiya-Mədəniyyət Mərkəzinin (RİMM) Tədris-Metodika Mərkəzində müəllimlər üçün 2013-cü ildə ilk seminar keçirilmişdir. Seminar “Olimpiada şagirdlərin yaradıcılıq qabiliyyətlərini inkişaf etdirmək yoludur” mövzusuna həsr edilmişdir.

RİMM-in mətbuat xidmətindən AZƏRTAC-a verilən məlumata görə, seminarın işində təhsilin rus və Azərbaycan dillərində olduğu məktəblərin, o cümlədən Azərbaycan Respublikası Təhsil Nazirliyinin Azərbaycan məktəblərində rus dilinin dərindən öyrənilməsi üzrə pilot layihəsinin iştirakçısı olan məktəblərin 70-ə yaxın rus dili müəllimi iştirak etmişdir.

“Rossotrudniçestvo” agentliyinin Azərbaycandakı nümayəndəliyinin rəhbəri Ənvər Şeyxov seminara toplaşmış müəllimlərin RİMM və Agentliklə fəal əməkdaşlıq etdiklərinə görə onlara təşəkkürünü bildirmişdir. O, “Rosstrudniçestvo”nun nümayəndəliyi tərəfindən həyata keçirilən layihələrdə müəllimlərin işinin fəallaşmasına sübut kimi, “Rosstrudniçestvo”nun iştirakı ilə Moskvada nəşr edilmiş elmi-metodik materialların məcmuəsini göstərmişdir. Bu materialların müəllifləri nümayəndəliyin tərəfdaşları olan müəllimlərdir. Məcmuənin nüsxələri məqalə müəlliflərinə və məktəblərin rus dili kabinetlərinə verilmiş, tədris prosesində bu materiallardan istifadə olunması tövsiyə edilmişdir.

43 nömrəli məktəbin rus dili və ədəbiyyatı müəllimi, Azərbaycan təhsil Nazirliyinin metodisti Viktoriya Ələkbərova məktəb şagirdlərini RİMM tərəfindən keçirilən olimpiadalarda iştirak etməyə hazırlamaq təcrübəsini həmkarları ilə bölüşmüşdür.

Respublika Rusdilli Tədris Müəssisələrinin Müəllimləri Assosiasiyasının sədri Lyubov Yakunina seminar iştirakçılarına Mərkəzin cari il üçün iş planları barədə məlumat vermiş, o cümlədən onları ənənəvi “Puşkiniana” layihəsinin və “Alimlərdən uşaqlara” adlı yeni layihənin məzmunu ilə tanış etmiş, bu ilin fevral-aprel aylarında keçiriləcək rus dili olimpiadalarında iştirak etməyə çağırmışdır.

Seminar iştirakçılarının təqdim etdikləri əsas məlumatlar ətrafında maraqlı müzakirələr aparılmışdır. Müzakirə olunan mövzular üzrə metodik tövsiyələr seminarın iştirakçılarına paylanmışdır