REGİONLAR
Sağlamlıq imkanları məhdud uşaqların təhsilə cəlbi istiqamətində uğurlu nəticələr əldə olunub
Naxçıvan, 16 sentyabr, AZƏRTAC
Muxtar respublikada ötən müddət ərzində sağlamlıq imkanları məhdud uşaqların təhsil müəssisələrinə cəlbi istiqamətində kompleks tədbirlər həyata keçirilib, tədris müəssisələrində tolerant təhsil mühitinin monitorinq və təhlili aparılıb, zəruri hallarda maarifləndirici görüşlər təşkil olunub.
AZƏRTAC-ın Naxçıvan bürosu xəbər verir ki, bu sözləri Bilik Günü münasibətilə Məhdud Fiziki İmkanlılar üçün Naxçıvan Regional İnformasiya Mərkəzində keçirilən tədbirdə çıxış edən Naxçıvan Muxtar Respublikası Əmək və əhalinin sosial müdafiəsi naziri Nicat Babayev deyib. Nazir yeni tədris ilinin başlanması münasibətilə müəssisəyə cəlb edilmiş müvafiq kateqoriyadan olan uşaqları təbrik edib, onlara yeni tədris mövsümündə uğurlar arzulayıb. Bildirib ki, Naxçıvan Muxtar Respublikası Ali Məclisi Sədrinin 2021-ci il 15 mart tarixli Sərəncamı ilə təsdiq edilən “2021-2025-ci illərdə Naxçıvan Muxtar Respublikasında sağlamlıq imkanları məhdud uşaqların təhsili və reabilitasiyası üzrə Dövlət Proqramı”nın icrası nəticəsində, muxtar respublikada sosial qayğıya ehtiyacı olan uşaqlar yüksək diqqət və qayğı ilə əhatə olunub, onların hərtərəfli inkişafı məqsədilə müvafiq tədbirlər icra edilir.
Vurğulanıb ki, son dövrlərdə muxtar respublikada fəaliyyət göstərən tibbi və sosial reabilitasiya müəssisələrinin fəaliyyəti daha da təkmilləşdirilib, bu məqsədlə bir sıra yeniliklər tətbiq edilib. Məhdud Fiziki İmkanlılar üçün Naxçıvan Regional İnformasiya Mərkəzinin fəaliyyəti bu sahədə mühüm əhəmiyyətə malikdir. Hazırda müəssisədə Distant Tədris Mərkəzi, müxtəlif defektoloji bölmələr, psixoloji dəstək xidməti, təlim-bərpa və müxtəlif terapiya otaqları mövcuddur. Bununla yanaşı, mərkəzdə görmə məhdudiyyətli şəxslər üçün Brayl displeylər, sürətli internet, həmçinin elektron kitabxana və audiostudiya fəaliyyət göstərir.
Nicat Babayev sağlamlıq imkanları məhdud uşaqlara göstərilən yüksək qayğıya və yaradılan şəraitə görə Naxçıvan Muxtar Respublikası Ali Məclisi Sədrinə dərin minnətdarlığını bildirib.
Mərkəzin direktoru Minurə Əliyeva çıxışında yeni tədris ilində qarşıya qoyulan vəzifələrdən danışıb, cari tədris ilində tətbiq olunacaq yeniliklərdən bəhs edib. Görüşdə iştirak edən valideynlər göstərilən diqqət və qayğıya görə minnətdarlıqlarını bildiriblər.
Sonra tədris otaqlarına, Distant Tədris Mərkəzinə baxış keçirilib, pedaqoji heyətlə fikir mübadiləsi aparılıb.
Qeyd edək ki, bu il hərəkət qabiliyyəti məhdud uşaqların təhsil imkanlarını genişləndirmək üçün Naxçıvan Muxtar Respublikası Təhsil Nazirliyinin tabeliyində Distant Təhsil Mərkəzi yaradılıb, müvafiq kateqoriyadan olan uşaqların tədrisdə iştirakı təmin olunub. Evdən tədrisə qoşulan şagirdlərdən biri olan Şahbuz rayon Külüs kənd sakini Murad Cəfərov digər həmyaşıdları kimi dərs ləvazimatları, məktəbli geyimi ilə təmin olunub, yaşadığı ev distant tədris üçün zəruri olan internet xətti və kompüter avadanlıqları ilə təchiz edilib. Murada və valideynlərinə distant tədris prosesinin gedişinə uyğun müvafiq təlimatlar verilib.