SİYASƏT
“Sahibkarlıq sahəsində aparılan yoxlamaların tənzimlənməsi və sahibkarların maraqlarının müdafiəsi haqqında” yeni qanun layihəsi hazırlanmışdır
Bakı, 14 mart (AZƏRTAC). Martın 14-də Milli Məclisin iqtisadi siyasət və hüquq siyasəti və dövlət quruculuğu komitələrinin birgə iclası keçirilmişdir.
AZƏRTAC xəbər verir ki, iclasda “Sahibkarlıq sahəsində aparılan yoxlamaların tənzimlənməsi və sahibkarların maraqlarının müdafiəsi haqqında” qanun layihəsi müzakirə olunmuşdur.
İqtisadi siyasət komitəsinin sədri Ziyad Səmədzadə demişdir ki, son zamanlar dünyada və ölkəmizdə gedən iqtisadi proseslər, Azərbaycan iqtisadiyyatının dinamik inkişafı bir sıra yeni qanunların hazırlanması zərurətini yaratmışdır. Xalqımızın ümummilli lideri Heydər Əliyevin və Prezident İlham Əliyevin rəhbərliyi altında bir sıra mühüm iqtisadi layihələr həyata keçirilmiş, konsepsiyalar qəbul olunmuşdur. Bu sənədlər əsasında hazırlanmış işlək mexanizmlər nəticəsində ölkə iqtisadiyyatında özəl sektorun payı 80 faizdən çoxdur. Müzakirəyə təqdim olunan yeni qanun sahibkarlığın inkişafını daha da sürətləndirəcək, yeni iqtisadi sistemin formalaşmasına təkan verəcəkdir.
Sonra İqtisadi İnkişaf Nazirliyinin məsul işçisi Anar Əliyev yeni qanun layihəsi barədə ətraflı məlumat vermişdir.
Bildirilmişdir ki, 10 fəsil, 38 maddədən ibarət olan bu qanun Azərbaycanda sahibkarların fəaliyyətini yersiz yoxlamalar və müdaxilələrdən qorumağa xidmət edir.
Qanun layihəsində sahibkarların risk qrupları üzrə bölgüsü (yüksək, orta və aşağı riskli) aparılır və məhz bu bölgünün nəticəsindən asılı olaraq yoxlamaların aparılması tezliyi müəyyən edilir. Sənədə əsasən yüksək risk qrupuna aid sahibkarların fəaliyyəti ildə bir dəfədən çox olmayaraq, orta risk qrupuna aid olanlar iki ildə bir dəfədən çox olmayaraq, kiçik risk qrupuna aid sahibkarlar isə üç ildə bir dəfədən çox olmayaraq təftiş olunacaqlar. Plan üzrə yoxlamanın müddəti orta və kiçik sahibkarlara münasibətdə 5 iş günü olmaqla, iri sahibkarlara münasibətdə isə 10 gündən artıq olmamaqla aparılacaqdır. Plandankənar yoxlama isə müvafiq olaraq iri sahibkarlara münasibətdə 5 gündən, orta və kiçik sahibkarlara münasibətdə 3 gündən artıq olmamalıdır. Yoxlamaların elektron uçotu da aparılmalıdır. Plandankənar (növbədənkənar) yoxlamalar yeni qanun layihəsinə görə yoxlayıcı orqanın istəyi ilə yox, məhz konkret qanunun tələb etdiyi hallarda keçirilə biləcəkdir. Belə ki, bu cür yoxlamalar yalnız sonuncu yoxlama nəticəsində aşkar edilmiş pozuntuların aradan qaldırılmasına dair qərar yerinə yetirilmədikdə, sahibkarın fəaliyyətinin məhdudlaşdırılması barədə qərarın icra vəziyyətinin yoxlanılmasına ehtiyac yarandıqda və konkret faktlara əsaslanan rəsmi müraciətlər olduqda, habelə sahibkar plandankənar yoxlamanın keçirilməsi barədə yoxlayıcı orqana müraciət etdikdə həyata keçirilə bilər. Yoxlamaların keçirilməsi ilə bağlı hər hansı normativ hüquqi aktın aydın olmayan və ya bir-birinə zidd olan müddəalarının sahibkarın xeyrinə şərh edilməsi tələbi qanun layihəsinin özəlliklərindən biridir. Qanun layihəsində sahibkarlıq fəaliyyətinin məhdudlaşdırılmasına yalnız ən son zərurət tədbiri kimi baxılır.
Bundan başqa, qanun layihəsində yoxlayıcı orqanların qərarlarından və hərəkətlərindən (hərəkətsizliyindən) şikayət verilməsi üçün konkret mexanizmlər göstərilir və yoxlayıcı orqanların məsuliyyəti məsələləri də öz əksini tapır. Belə ki, qanun layihəsində göstərilir ki, istənilən sahibkar yoxlama nəticələrindən narazı qaldıqda yuxarı orqanlara və ya məhkəməyə müraciət edə bilər. Yoxlamalar keçirilərkən, yoxlayıcı orqanların qərarları və ya hərəkətləri (hərəkətsizliyi) nəticəsində sahibkara vurulmuş zərərə görə müvafiq yoxlayıcı orqan mülki, intizam, inzibati və ya cinayət məsuliyyəti daşıyır.
Müzakirələr zamanı deputatlar layihə ilə bağlı irad, rəy və təkliflərini bildirmişlər. Sonda qanun layihəsi təsdiqlənmək üçün Milli Məclisə tövsiyə olunmuşdur.