İQTİSADİYYAT
Şamaxıda iqtisadiyyat dinamik inkişaf edir
Şamaxı, 19 aprel (AZƏRTAC). Şamaxıda 2011-ci ilin birinci rübündə sosial-iqtisadi inkişafın yekunları və qarşıda duran vəzifələrə həsr edilmiş yığıncaq keçirilmişdir.
AZƏRTAC xəbər verir ki, rayon icra hakimiyyətinin başçısı Nazim İsmayılovun hesabat məruzəsi dinlənilib müzakirə olunmuşdur.
Məruzəçi bildirmişdir ki, birinci rübdə rayonda ötən ilin müvafiq dövrü ilə müqayisədə 8,2 faiz çox - 19,9 milyon manatlıq ümumi məhsul, o cümlədən 2,1 milyon manat çox - 5,9 milyon manatlıq kənd təsərrüfatı məhsulu istehsal edilmiş, 4 milyon manatlıq tikinti-quraşdırma işləri görülmüş, əsas kapitala 4 milyon manat investisiya yönəldilmiş, 178 daimi iş yeri açılmışdır. Tikinti-quruculuq işləri geniş vüsət almışdır. Prezident İlham Əliyevin 2008-ci il 5 sentyabr və 2009-cu il 21 iyul tarixli sərəncamları ilə ayrılmış 8 milyon manat vəsait ilə Azərbaycan Milli EA-nın N.Tusi adına Şamaxı Astrofiziki Rəsədxanasının maddi-texniki bazasının gücləndirilməsi və əsaslı təmir-tikinti işləri davam etdirilir. Ölkə başçısının 2009-cu il 24 dekabr tarixli Sərəncamı ilə Şamaxı Cümə məscidi Dövlət tarix-memarlıq abidəsinin bərpası ilə əlaqədar ayrılan 4 milyon manat vəsaitlə görülən işlər sürətlə və keyfiyyətlə həyata keçirilir. Olimpiya İdman Mərkəzi, “Şamaxı” mehmanxanası yenidən qurulur, genişləndirilir. Heydər Əliyev Fondunun təşəbbüsü ilə Uşaq İncəsənət Məktəbi üçün yeni bina inşa olunur. “Şərədil” istirahət kompleksində beşulduz hotelin, “Fəxri guşə” istirahət mərkəzinin bazasında turizm obyektinin və sair tikintisi həyata keçirilir.
Natiq yol infrastrukturunun yaxşılaşdırılması, təhsil, səhiyyə, mədəniyyət sahələrində görülən işlər, əhalinin elektrik enerjisi, təbii qazla təminatı və sair sahələrdə yeni layihələrin həyata keçirildiyini qeyd etmişdir.
Yığıncaqda çıxış edənlər uğurlarla yanaşı çatışmazlıqlardan da söz açmış, problemlərin həlli ilə bağlı təkliflərini bildirmişlər.
Natiqlər ölkəmizdə radikal müxalifətin pozucu fəaliyyətini kəskin şəkildə pisləmişlər. Vurğulamışlar ki, ağsaqqallar dövlətimizi, dövlətçiliyimizi müdafiə etməklə Prezident İlham Əliyevin ətrafında sıx birləşmişlər və Azərbaycanın sosial-iqtisadi inkişafında bundan sonra da var qüvvələrini əsirgəməyəcəklər.