Moskva, 27 iyun, AZƏRTAC

Səadət Qədirova beynəlxalq jurnalist, politoloq, beynəlxalq münasibətlər, geopolitika və ictimaiyyətlə iş üzrə ekspertdir. Onun çoxsaylı məqalələri və eksklüziv müsahibələri var, Rusiya və beynəlxalq jurnalistlər ittifaqlarının, RF Dövlət Dumasının Millətlərin İşi Komitəsinin ekspertlər şurasının və Rusiya Xarici İşlər Nazirliyində akkreditə olunmuş qrupun üzvüdür. O, həmçinin TASS agentliyinin diplomatik informasiya strukturları ilə əlaqələr şöbəsinin rəhbəridir. Səadət Qədirova AZƏRTAC-a müsahibəsində özünün “kadyrova.online” YouTube kanalında “Arzular gerçəkləşir” adlı yeni layihəsi haqqında danışıb.

- Səadət, siz YouTube kanalında “Arzular gerçəkləşir” layihəsini yaratmağa necə qərar verdiniz?

-Qızım anadan olduqdan sonra mən natamam ailələrdə doğulan, yaxud uşaqlıqdan xəstəxanalarda olan azyaşlılar haqqında tez-tez düşünürdüm. Bununla bağlı nə edəcəyim barədə fikirləşirdim. Mən jurnalistəm və karyeram boyu maraqlı insanlardan çoxlu müsahibələr almışam. Uzağa getmək lazım deyil, mənim ilk müsahibəmin əfsanəvi Müslüm Maqomayevlə olduğunu söyləmək kifayətdir. Bu, çoxdan olsa da, mən hələ də həmin müsahibəni məmnunluqla xatırlayıram. Mən düşündüm, tanınmış insanlar və hakimiyyət nümayəndələrindən müsahibə almaqla yanaşı, onların uşaqlara hədiyyələr bəxş etməsinə nail olmaq olarmı? Bu ideya xoşuma gəldi və həmin istiqamətdə fəaliyyətə başladım.

-Öz həmsöhbətlərinizi necə seçirsiniz?

-Hər şeydən əvvəl həmin insan maraqlı şəxsiyyət olmalıdır. Mənim xoşuma gəlib-gəlməməsindən asılı olmayaraq çalışıram ki, şəxsi təəssüratımı arxa planda qoyaraq həmsöhbətimin miqyasını qiymətləndirim. Əgər qonaq mənim üçün maraq kəsb edirsə, onda danışıqlara başlayıram.

Ümumiyyətlə, hesab edirəm ki, jurnalistikada şəxsi mülahizələr arxa planda olmalıdır. Lakin müəllif layihəsi olduğu üçün mən istədiyim insanı dəvət edə və arzuladığım sualı verə bilərəm.

Layihəyə bu yaxınlarda start vermişəm. Lakin artıq 10 nəfərdən çox qonağım olub və onlardan hər biri çox maraqlı və geniş dünyagörüşünə malik insanlardır.

-Qəhrəmanlarınız haqqında danışardınız. Sizi ən çox təəccübləndirən kim olub?

-Gəlin sıra üzrə, çəkilişlərin əvvəlindən başlayaq. Emin mənim ikinci qonağım olub. O, bizim qəlbimizi həm xeyirxahlığı ilə fəth etdi, həm də uşağın arzusu olan kağızı qutudan çıxardığında onu çevirərək dedi: “Gəl sənin bütün arzularını yerinə yetirim!” Bu, çox gözlənilməz və xoş oldu. Mariya Zaxarova bütün suallara səmimi cavab verdi və onların heç birindən yayınmadı. Ümumiyyətlə deyim ki, Maşa yenilikçidir və stereotipləri dağıtmağı çox sevir. Onun haqqında sərt ledi imicinin formalaşmasına baxmayaraq, Maşa çox mədəni, tərbiyəli və yumşaq insandır. O, Bakı haqqında çox danışdı və Azərbaycana səfərindən məmnunluğunu ifadə etdi. Sonra Mixail Qusman gəlir. O, iyulun əvvəlində mənim proqramıma gələcək və mənim üçün ən gözlənilməz qonaq olacaq.

-Nə üçün?

-Çünki o, bizim peşəmizdə ən tanınmış və təcrübəli insanlardan biridir. Qusman prezidentlərdən 400-dən çox müsahibə alıb. Bu isə sadəcə oturub söhbət etmək deyil. Müsahibənin arxasında böyük əmək durur. Müsahibə alındı, Mixail Solomonoviç xarici görkəmi etibarilə sərt adama bənzəsə də, çox xeyirxah və səmimidir. Oğlan uşağının sirkə getmək arzusu ilə bağlı kağızı qutudan çıxardıqdan sonra onun özünün uşaqlıqda atası ilə birlikdə Bakı sirkinə getməsini xatırlaması məndə böyük təəssürat yaratdı. Bu oğlan uşaq serebral iflicindən əziyyət çəkirdi və danışa bilmirdi, anası bildirdi ki, sirk onda təkrarolunmaz emosiyalar yaradır. Mən çox şadam ki, biz həmin uşağı sevindirə bildik.

-Tanınmış azərbaycanlılardan kimi dəvət etmək istərdiniz?

-Mən artıq Emin Ağalarovun adını çəkdim. Ondan sonra Yusif Eyvazovu dəvət etmişəm. O da, qutunu çevirdi və oradaca uşağın bütün arzularını yerinə yetirdi. Elşən Məmmədov, Əddis Hacıyev və Çingiz Mustafayevi də qeyd etmək istərdim. Mənim məqsədim layihəni daha qlobal və maraqlı etməkdir. Qonaqların arasında sadəcə Rusiyada yaşayan azərbaycanlıların deyil, bütün MDB ölkələrindən insanların olmasını istəyirəm. Qısa desək, rus dilini bilən hər kəs bizim auditoriyamızdır.

-Siz Rusiyanın aparıcı informasiya agentliyi olan TASS-da işləyirsiniz, gözəl ailəniz, qızınız var. Bütün bunlara yetərincə vaxt ayıra bilirsiniz?

-Vaxtı idarə etmək çox mühümdür. İş nə qədər çox olsa da, mən hamısının öhdəsindən artıqlaması ilə gəlirəm. Qızım anadan olduqdan sonra yeni bir həyata başladım, fəaliyyətimi başqa cür qurdum. Vaxt azlığı həmişə olur. Lakin onu düzgün bölməsən, heç nəyə nail ola bilməzsən.

-Sizin layihənizin gələcək formatı necə olacaq?

-Format dəyişməyəcək, yalnız ssenariləri yeniləyəcəyik. Əddis ilə proqramda biz bunu etdik. Video formatında kulinar layihələr çox yaxşı baxılır, onlar dinamikdir və mənə elə gəldi ki, quruluşçu rəssam özünün kulinar verilişində təkcə danışmağı deyil, həm də yemək hazırlamağı bacarmalıdır. Bu, çox gözəl alındı. Həm də biz Azərbaycan yeməkləri hazırladıq, Çingizlə birlikdə mahnı ifa etdik, tanınmış insanlarla söhbət etməklə yanaşı, həm də birlikdə oxuduq. Lakin siz hələ bütün bunları görəcəksiniz.

-“Arzular gerçəkləşir” layihəsinin müəllifinin ən böyük arzusu nədir?

-Mən bu sualı hər dəfə öz qonaqlarıma verirəm və onların hamısı ona cavab verməkdə çətinlik çəkir. Mən onları yaxşı başa düşürəm, uşaq olduğumuz zaman arzularımızın həyata keçməsi tamamilə realdır. Məsələn, qutuda uşaqların arzuları əsasən oyuncaqlar və əyləncə ilə bağlı olur. Böyüdüyümüzdə isə real şəkildə düşünməyə, dünyaya real baxmağa və özümüz üçün arzuladığımız bir çox şeyləri təxirə salmağa başlayırıq.

Mənim iki qlobal arzum var. Pafoslu səslənsə də, birincisi mənim tarixi vətənimlə bağlıdır. Arzum budur ki, Azərbaycan inkişaf etsin və mütərəqqi dünya ictimaiyyətinin ayrılmaz hissəsi olsun. İkincisi isə, şəxsi arzumdur. Yaxınlarımın və doğmalarımın mənimlə birlikdə sağlam və xoşbəxt olmasını istəyirəm.

Fəridə Abdullayeva

AZƏRTAC-ın xüsusi müxbiri

Moskva