Bakı, 26 avqust, AZƏRTAC

Ölkəmizin müxtəlif ərazilərində xüsusilə son günlər intensiv şəkildə qeydə alınan təbii fəlakətlər sığorta hadisəsi hesab olunur.

AZƏRTAC xəbər verir ki, bu barədə Azərbaycan Sığortaçılar Assosiasiyasının icraçı direktoru Elmar Mirsalayev deyib.

O bildirib ki, təbii fəlakətlərin sığortalı əmlaka vurduğu zərər “İcbari sığortalar haqqında” Azərbaycan Respublikasının Qanunu ilə tənzimlənir: “Son vaxtlar ölkəmizin müxtəlif ərazilərində digər dünya ölkələrində olduğu kimi, qeyri-sabit hava şəraiti hökm sürür. Bu da nəticədə təbii fəlakətlərə səbəb olur. Avqust ayı ərzində ölkəmizin qərb və şimal bölgələrində, xüsusilə Qusar rayonunda 30 millimetr (aylıq normanın 89 faizi), Tovuzda 20 millimetr (aylıq normanın 82 faizi) yağıntı, Quba və Qusarın bəzi kəndlərində dolu düşməsi hadisələrini buna misal göstərə bilərik. Qeyd olunan halların sığortalı əmlaka zərər vurması sığorta hadisəsi hesab olunur. “İcbari sığortalar haqqında” Azərbaycan Respublikasının Qanununda da bildirilir ki, təbii fəlakətlər - zəlzələ, vulkan, fırtına, qasırğa, tufan, dolu, sel, daşqın, leysan, yer sürüşməsi və sair kimi hallar “Daşınmaz əmlakın icbari sığortası” üzrə sığorta hadisəsidir.

E.Mirsalayev qeyd edib ki, “Daşınmaz əmlakın icbari sığortası” üzrə tarif və təminatlar bölgələrə görə dəyişir. “Daşınmaz əmlakın icbari sığortası” “İcbari sığortalar haqqında” Azərbaycan Respublikasının Qanunu ilə tənzimlənir. Müvafiq qanuna görə, yaşayış evləri və mənzillərin icbari sığortası üzrə Bakı şəhəri üçün sığorta tarifi 50 manat, sığorta təminatı 25 min manatdır. Gəncə, Sumqayıt və Naxçıvan şəhərlərində tarif 40 manat, təminat 20 min manatdır. Respublikamızın digər ərazilərində isə tarif 30 manat, təminat məbləği isə 15 min manatdır. Yaşayış evləri və mənzillər istisna olmaqla, digər daşınmaz əmlakın icbari sığortası üzrə məbləğ isə həmin əmlakın yerləşdiyi yerə, həcminə və təyinatına görə müəyyənləşdirilir.

İcraçı direktorun sözlərinə görə, qanunvericiliyin tələbinə əməl etməyərək əmlakını icbari qaydada sığortalamayan şəxslər üçün müxtəlif məbləğlərdə cərimələr nəzərdə tutulub: “Əmlakın icbari sığortası qanunvericiliyə görə hər kəs üçün məcburidir. Belə ki, İnzibati Xətalar Məcəlləsinin 469.1-ci maddəsinə əsasən, müvafiq riskləri icbari qaydada sığorta etdirmək vəzifəsi müəyyən edilmiş fiziki və ya hüquqi şəxslər tərəfindən sığortaçı ilə icbari sığorta müqaviləsinin bağlanmamasına görə fiziki şəxslərin 30 manat, vəzifəli şəxslərin 80 manat, hüquqi şəxslərin isə 200 manat məbləğində cərimə edilməsi nəzərdə tutulub”.