Bakı, 24 oktyabr, AZƏRTAC

Ölkəmizdə sağlamlıq imkanları məhdud uşaqlar üçün reabilitasiyayönümlü sosial xidmətlər sisteminin əsas məqsədi onların dövlət uşaq müəssisələrinə düşməsinin qarşısının alınması, eyni zamanda, həmin müəssisələrdəki uşaqların səmərəli reabilitasiya xidmətləri, de-institusionalizasiya tədbirləri vasitəsilə yenidən doğma ailə mühitinə qaytarılmasıdır. Bunu əmək və əhalinin sosial müdafiəsi naziri Sahil Babayev Azərbaycana Birgə Yardım Təşkilatının (UAFA) rəhbəri Qven Börçel ilə nazirlikdə keçirilən görüşdə bildirib.

Nazirliyin ictimaiyyətlə əlaqələr şöbəsindən AZƏRTAC-a verilən məlumata görə, görüşdə qeyd olunub ki, dövlətin sosial siyasətində sağlamlıq imkanları məhdud uşaqların sağlamlıqlarının bərpası, onların reabilitasiyası və cəmiyyətə inteqrasiyası xüsusi yer tutur. Hazırda nazirliyin tabeliyindəki 1 və 2 saylı sosial xidmət müəssisələrində 330-dan çox sağlamlıq imkanları məhdud uşaq daimi dövlət təminatındadır. Heydər Əliyev Fondunun “Uşaq evləri və internat məktəblərinin inkişafı” proqramı çərçivəsində hər iki müəssisədə nümunəvi yaşayış və reabilitasiya şəraiti yaradılıb. İlk növbədə həmin müəssisələrdə uşaqların ətraf mühitə uyğunlaşmalarına mane olan funksional çatışmazlıqların, davranış problemlərinin aradan qaldırılması üçün sistemli reabilitasiya işlərinə xüsusi əhəmiyyət verilir. Bu kimi işlər, həmçinin de-institusionalizasiya tədbirləri bu il də hər iki müəssisədən 21 nəfər uşağın doğma ailə mühitinə qayıtmağına imkan verib.

S.Babayev nazirliyin sifarişləri əsasında icra olunan və 4 mindən çox uşağı əhatə edən sosial xidmət layihələri, həmin layihələr çərçivəsində sağlamlıq imkanları məhdud uşaqlara göstərilən sosial xidmətlər, yaradılan günərzi qayğı və icma əsaslı reabilitasiya mərkəzləri barədə məlumat verib. O, DOST (Dayanıqlı və Operativ Sosial Təminat) mərkəzlərinin yaradılması sahəsində aparılan işləri də qeyd edib, bu mərkəzlərdə nazirlik üzrə 124 xidmətlə yanaşı, günərzi sosial xidmətlərin göstərilməsinin, sosial xidmətlər üzrə təlimlərin təşkilinin də nəzərdə tutulduğunu bildirib.

Nazir qeyd edib ki, ölkəmizdə sağlamlıq imkanları məhdud uşaqlar üçün reabilitasiya yönümlü sosial xidmətlərin təşkili və bu sahədə imkanların artırılması, institusional və praktik iş mexanizmlərinin təkmilləşdirilməsi, İcma Əsaslı Reabilitasiya və de-institusionalizasiya prosesinin güclənməsi işlərində Azərbaycana Birgə Yardım Təşkilatı (UAFA) ilə əməkdaşlıq müstəvisində icra olunan layihələr mühüm əhəmiyyət daşıyır.

Təşkilatın rəhbəri Q.Börçel Azərbaycanda sosial xidmətlər sisteminin inkişafı, uşaqlara yönələn reabilitasiya məqsədli sosial xidmətlərin genişləndirilməsi üçün aparılan işlərdən və bu sahədə nazirliyin UAFA ilə fəal əməkdaşlığa əhəmiyyət verməsindən məmnunluğunu ifadə edib. O, birgə layihələrin davam etdirilməsində, habelə sosial xidmətlər üçün strategiya planının hazırlanmasında və digər müvafiq istiqamətlərdə əməkdaşlıqda maraqlı olduqlarını söyləyib.

Görüş zamanı icma əsaslı reabilitasiya xidmətlərinin təkmilləşdirilməsi, sosial xidmət müəssisələrindəki sağlamlıq imkanları məhdud uşaqların müəssisə qayğısından ailə qayğısına keçidinin dəstəklənməsi, sosial xidmətlər üzrə işçi heyətinin davamlı təlimi və peşəkarlığının artırılması, strateji planlaşdırma, DOST layihəsi üzrə müvafiq xidmətlərin göstərilməsi və s. məsələlərə dair fikir mübadiləsi aparılıb, nazirliyin sosial xidmətlər sahəsində UAFA ilə gələcək əməkdaşlıq istiqamətləri müzakirə olunub.