İQTİSADİYYAT
Sumqayıt sərnişin stansiyasında məskunlaşan məcburi köçkünlər köçürüləcək
Bakı, 19 iyun, Fərhad Vahidzadə, AZƏRTAC
Dəmir yolunun Bakı-Xırdalan-Sumqayıt xəttində aparılan əsaslı təmir işləri çərçivəsində "Sumqayıt Sərnişin" stansiyasının binasında məskunlaşan məcburi köçkünlər ərazidən köçürüləcəklər.
“Azərbaycan Dəmir Yolları” Qapalı Səhmdar Cəmiyyətinin mətbuat katibliyinin rəisi Nadir Əzməmmədov AZƏRTAC-a bildirib ki, stansiyada yaşayan sakinlərlə razılıq əldə olunub və yaxın günlərdə ailələrin köçürülməsi həyata keçiriləcək. Stansiyada yaşayan 40 ailənin hər birinə təxminən 30 min manat həcmində vəsait ödəniləcək.
Məcburi köçkünlər ərazidən köçürüldükdən sonra "Sumqayıt Sərnişin" stansiyasında təmir bərpa işləri həyata keçiriləcək və sərnişinlərin sərbəst istifadə etməsi üçün bütün şərait yaradılacaq.
Təmir tikinti işləri tam başa çatdıqdan sonra Bakı-Sumqayıt və əks istiqamətdə sərnişinlər yeni KİSS markalı ikimərtəbəli elektrik qatarlarından istifadə etməklə mənzil başına 40 dəqiqəyə çata biləcəklər.