Bakı, 25 sentyabr (AZƏRTAC). Suriyada hökumət qüvvələri ilə müxaliflər arasında gedən döyüşlər Dəməşqətrafı ərazilərdə, həmçinin Hələb, Homs və Hamada daha intensiv xarakter almışdır. 

“Əl Cəzirə” telekanalının məlumatına görə, Dəməşqin cənub hissəsində içərisinə partlayıcı qurğu yerləşdirilmiş avtomobil partladılmışdır. Ölənlərin və yaralıların sayı barədə hələlik dəqiq məlumat verilmir.

Bu arada BMT Baş Məclisinin 68-ci sessiyası Nyu-Yorkda öz işinə başlamışdır. Sessiyanın ilk günündə əsas müzakirə mövzularından biri Suriya problemi olmuşdur.

Türkiyə Prezidenti Abdullah Gül çıxışı zamanı demişdir ki, Suriya münaqişəsində artıq kimyəvi silah tətbiqi olunur, ona görə kimyəvi silahların beynəlxalq təşkilatlara təhvil vermək haqqında razılığın əldə olunması ilə münaqişə bitməyəcəkdir. Beynəlxalq ictimaiyyət Bəşər Əsəd hökumətinin digər cinayətlərin məsuliyyətindən boyun qaçırmasına imkan verməməlidir.

Fransa Prezidenti Fransua Olland isə BMT Təhlükəsizlik Şurasını Suriyanın kimyəvi silah arsenalının məhvi ilə bağlı müvafiq qərar qəbul etməyə çağırmışdır. Toplantıda çıxış edən ABŞ Prezidenti Barak Obama bildirmişdir ki, Bəşər Əsədin hakimiyyətdə qalması ölkədə zorakılıq hallarının artmasına gətirib çıxaracaqdır. O, BMT Təhlükəsizlik Şurasını kimyəvi silahla bağlı tutarlı qərar qəbul etməyə çağıraraq bəyan etmişdir ki, əgər Suriya hökuməti öhdəliklərinə riayət etməsə, cəza tədbirləri ilə üzləşəcəkdir.

Öz növbəsində BMT-nin baş katibi Pan Gi Mun Dəməşq yaxınlığında kimyəvi silahdan istifadə edənlərin cəzalandırılmasına çağırmışdır. Onun sözlərinə görə, Suriya münaqişəsi zamanı 100 mindən çox adam ölmüş, 7 milyon sakin öz evindən didərgin düşmüşdür. Baş katib Təhlükəsizlik Şurasını təcili olaraq kimyəvi silahla bağlı lazımi qərar qəbul etməyə səsləyərək problemin yalnız sülh yolu ilə həllinin mümkünlüyünü vurğulamışdır.