TALİBLƏRİN BAŞÇILARI ƏFQANISTANIN MƏRKƏZİ BANKINDAN 100 MİLYON DOLLAR APARMIŞLAR
“Taliban” hərəkatının başçıları dağlarda gizlənməzdən əvvəl Əfqanıstan Mərkəzi Bankından təxminən 100 milyon dollar götürmüşlər. Bu məlumatı “Nyu-York tayms” qəzeti bankın və antitalib qüvvələrinin rəsmi nümayəndələrinə istinadən yaymışdır.
İTAR-TASS-ın verdiyi xəbərə görə, “Taliban”ın lideri molla Məhəmməd Ömərin imzası olan çeklərdən biri oktyabrın 16-da, ABŞ hərbi hava qüvvələrinin Əfqanıstanı bombalamağa başlamasından 9 gün sonra bankın Qəndəhar şöbəsinin əməkdaşlarına təqdim edilmişdir. Mollanın köməkçilərinin dollarla və Pakistan rupisi ilə aldıqları 5 milyon vəsait un kisəsinə doldurulub aparılmışdır. Noyabrın 12-də taliblərin başçıları bankın Kabildəki əsas ofisindən eynilə həmin yolla 6 milyon dollar götürmüşlər. Bankın digər şöbələrindən də onlarca milyon dollar aparılmış, əvəzində heç bir çek təqdim olunmamışdır.
Bankın meneceri Alla Həşmi demişdir: “Onlar şöbələrdəki bütün pulları yığışdırıb apardılar. Biz dəqiq məbləği göstərə də bilmirik. Onlar, sadəcə olaraq, gəlib heç bir çek və ya qəbz təqdim etmədən pulları götürdülər”.
Bölmənin digər xəbərləri
