Bakı, 13 oktyabr, AZƏRTAC 

Bu gün Azərbaycanda, inkişaf etmiş ölkələrdə olduğu kimi, 11 yoluxucu xəstəliyə qarşı peyvənd tətbiq olunur. Uşaqlarımızın sağlam böyüməsini istəyiriksə, onlar mütləq peyvənd olunmalıdırlar. Təbii ki, əgər uşaqda heç bir əks-göstəriş olmazsa. Valideynlər əgər kiminsə sözü ilə övladlarını peyvənd etdirmirlərsə, mən deyərdim ki, bu olduqca yanlış bir addımdır. Onlar əslində uşaqlarının sağlamlığına bir növ qəsd edirlər. Buna görə də mən tövsiyə edərdim ki, valideynlər uşaqlarını peyvənd etdirməkdən çəkinməsinlər. Əksinə, vaxtlı-vaxtında bu peyvəndlərin vurulmasında özləri maraqlı olmalıdırlar.

AZƏRTAC xəbər verir ki, bu sözləri Azərbaycan Tibb Universitetinin Tədris-Terapevtik Klinikasının direktoru, Əməkdar Elm Xadimi, professor Surxay Musayev deyib.

Son illər xüsusilə məktəblilər arasında bronx-ağciyər xəstəliklərinə (pnevmoniya, bronxit, bronxiolit) daha çox rast gəlindiyini söyləyən S.Musayev həmin xəstəliklərin məktəbəqədər yaşlı uşaqlar arasında daha geniş yayıldığından təəssüfləndiyini bildirib. Klinikanın direktoru qeyd edib ki, uşaqlar arasında ürək, qan-damar, sinir sistemi xəstəlikləri də yayılıb. Bu, əsasən irsi keçir və ya sonradan yaranır.

Dövrümüzün ən böyük problemi olan oturaq həyat tərzinin fəsadlarından danışan S.Musayev bildirib ki, elm və texnikanın inkişafı insanların, xüsusən uşaqların fiziki aktivliyinin xeyli dərəcədə azalmasına gətirib çıxarıb. Halbuki fizioloqların fikrincə, uşaqların fiziki fəallığa tələbatı böyüklərə nisbətən iki dəfədən artıqdır. Aparılan tədqiqatlar göstərir ki, uşaqların 75 faizi hipodinamiyadan əziyyət çəkir və gələcəkdə də həmin uşaqlarda daha çox ürək-damar, sinir, onkoloji və endokrin sistemlərin patologiyasına rast gəlinir. Hipodinamiya uşaqlarda orqan və sistemlərin normal inkişaf və fəaliyyətinə mənfi təsir göstərir.

Pediatr payız fəslinin gəlişi ilə uşaqları, xüsusilə kiçikyaşlı uşaqları narahat edən angina xəstəliyi barədə valideynlərə öz məsləhətini verib: “El arasında boğazda “qlanda” deyilən damaq badamcıqları əslində insan orqanizminə müxtəlif xəstəliklərin daxil olmasının qarşısını almaq kimi mühüm bir funksiyanı yerinə yetirir. Bu zaman badamcıqların özü sadə dildə desək, xəstələnir, lakin xaricdən ötürülən mikrobların orqanizmə daxil olmasına imkan vermir, bir növ möhkəm qoruyucu rolunu oynayır. Həmin vaxt həkimin məsləhəti ilə damaq badamcıqlarını müalicə yolu ilə sağaltmaq olur. Amma bir zaman gəlir ki, damaq badamcıqları artıq öz funksiyasının öhdəsindən gələ bilmir və daxil olan mikroorqanizmlər, xüsusilə boğaz yolunda toplanmış streptokoklar artıq orqanizmə, qana və ya birbaşa ürək, qan-damar sisteminə daxil olur, ürək qişalarını, qapaqları və yaxud orqanizmə keçirsə oynaqları, digər orqanları zədələyir. Əgər soyuqlamış damaq badamcıqları müxtəlif terapevtik müalicələrlə, fizioterapevtik üsulların köməyi ilə sağalmırsa, qoruyucu funksiyasını yerinə yetirə bilmədiyi təqdirdə “artıq ətə” çevrilir. Məhz bu zaman cərrahi müdaxiləyə ehtiyac yaranır.

Bəzən valideynlər səhlənkarlıq göstərərək uşaqlarının boğazı ağrıyarkən “anginadır” deyib üstündən heç nə olmamış kimi keçirlər. Ən dəhşətli hal isə odur ki, bəzən boğazı ağrıyan uşağı həkimə deyil, türkəçarə ilə məşğul olan birinin yanına apararaq həmin şəxsin xəstənin boğazını əli ilə basmağına imkan yaradırlar. Bu, boğaz yolunu zədələməklə yanaşı, bir çox infeksiyaların yaranmasına səbəb ola bilər. Ona görə də mən bu məsələlərdə valideynlərdən həssaslıq göstərməyi, uşaqlarının səhhəti ilə bağlı yalnız həkim göstərişinə müvafiq olaraq hərəkət etməyi tövsiyə edirəm”.