Təlim-tədris kursları başa çatır
Bakı, 9 iyun (AZƏRTAC). Xəbər verdiyimiz kimi, Mədəniyyət və Turizm Nazirliyi Türkiyənin Mədəniyyət və Turizm Nazirliyinin, Türkiyə Əməkdaşlıq və İnkişaf Agentliyinin (TİKA) dəstəyi ilə Azərbaycanın turizm potensiallı şəhər və rayonlarında fəaliyyət göstərən mehmanxana və digər yerləşdirmə obyektlərində çalışanlar üçün təlim-tədris kursları keçirir.
Mədəniyyət və Turizm Nazirliyinin mətbuat xidmətindən AZƏRTAC-a bildirmişlər ki, Xaçmaz rayonunun Nabran qəsəbəsində yerləşən “Atlant” istirahət mərkəzində iyunun 2-dən etibarən davam edən kursların ikinci mərhələsində Quba, Qusar və Xaçmaz rayonlarında fəaliyyət göstərən mehmanxana və mehmanxana tipli obyektlərin əməkdaşları 4 istiqamət üzrə ixtisaslarını artırırlar. Bunlar hotel idarəçiliyi, masa xidməti, qeyd-qəbul və mərtəbə xidmətləri ixtisaslarıdır.
Kurslarda 120 nəfərə yaxın dinləyici iştirak edir. Türkiyədən dəvət edilmiş peşəkar mütəxəssislər tərəfindən keçirilən təlim kursları iyunun 9-da başa çatacaqdır. Həmin gün dinləyicilərə kursu bitirmələri barədə sertifikatlar veriləcəkdir.
Bölmənin digər xəbərləri
