SİYASƏT
Tibb təhsili olan 35 yaşadək vətəndaşlar hərbi hissələrin tibb məntəqələrində və hospitallarda vakant vəzifələrə qəbul üçün müraciət edə bilərlər
Bakı, 17 fevral, AZƏRTAC
Müdafiə Nazirliyi işğaldan azad edilmiş ərazilərdə dislokasiya olunan hərbi hissələrin tibb məntəqələrində, həmçinin həmin ərazilərdə fəaliyyət göstərən hospitallarda mövcud olan müxtəlif tibbi ixtisaslar üzrə vakant hərbi və mülki vəzifələrdə xidmət etmək və çalışmaq üçün işə qəbul elan edir.
AZƏRTAC xəbər verir ki, bu barədə Müdafiə Nazirliyinin mətbuat xidmətinin mətbuat katibi polkovnik-leytenant Anar Eyvazov fevralın 17-də jurnalistlərə müsahibəsində deyib.
Mətbuat katibi qeyd edib ki, tibb təhsili və fiziki cəhətdən sağlam olan 35 yaşadək vətəndaşlarımız bu qəbul üzrə müraciət edə bilərlər. Eyni zamanda, daha əvvəl Silahlı Qüvvələrin tərkibində hərbi həkim və ya feldşer vəzifələrində xidmət keçmiş və sonradan ehtiyata buraxılmış 40 yaşadək zabit və gizirlər də eyni qaydada müraciət edə bilərlər.
Namizədlərin Müdafiə Nazirliyinin Tibb Baş İdarəsinə və ya yaşadıqları əraziyə yaxın olan hərbi hissələrin birinə müraciət etməsi kifayət edir.