Avqustun 5-də Milli Məclisin Azərbaycan–Türkiyə parlamentlərarası əlaqələr üzrə işçi qrupunun iclası keçirilmişdir.

Gündəlikdə duran məsələlərin müzakirəsinə başlamazdan əvvəl deputatlar və dəvət olunmuş qonaqlar Milli Məclisin vaxtsız vəfat etmiş deputatı Şadman Hüseyinin xatirəsini bir dəqiqəlik sükutla yad etdilər.

Sonra qrupun rəhbəri, Milli Məclisin mədəniyyət məsələləri daimi komissiyasının və Azərbaycan-Türkiyə Dostluq Cəmiyyətinin sədri Anar Rzayev çıxış edərək dedi ki, bu il oktyabrın 29-da Türkiyə Cümhuriyyətinin yaranmasının 80 ili tamam olacaqdır. Qardaş Türkiyə Azərbaycanın ən yaxın dostu və strateji tərəfdaşı olduğu üçün yubiley ölkəmizdə də təntənəli tədbirlərlə qeyd edilməlidir.

İşçi qrupunun müşaviri, Mərmərə Qrupu Vəqfi Avrasiya İqtisadi Zirvələrinin baş katibi Vaqif Qasımov yubiley tədbirləri planı barədə məlumat verdi.

Deputatlar və dəvət olunan şəxslər “Türkiyə Cümhuriyyəti yaradılmasının 80 illiyi ilə əlaqədar keçiriləcək tədbirlərdə Milli Məclisin Azərbaycan-Türkiyə parlamentlərarası əlaqələr üzrə işçi qrupunun iştirakı barədə”, “2003-cü il sentyabrın 15-də Bakı şəhərinin Şərq Ordular Qrupu, Qafqaz İslam Ordusu və Azərbaycan Milli Ordu hissələri tərəfindən xilas edilməsinin 85 illiyinin keçirilməsi haqqında” və “Azərbaycan-Türkiyə parlamentlərarası əlaqələr üzrə işçi qrupunun Türkiyə-Azərbaycan parlamentlərarası dostluq qrupu tərəfindən Türkiyə Böyük Millət Məclisində (TBMM) Xocalı soyqırımının tanınması haqqında” məsələləri müzakirə etdilər.

Müzakirələr zamanı qeyd olundu ki,Türkiyə Respublikasının 80 illik yubileyinin Bakıda da qeyd olunması Azərbaycan Prezidenti Heydər Əliyevin “Biz bir millət, iki dövlətik” kəlamının məntiqi davamı olacaqdır.

Yubileylə bağlı avqust ayının sonunadək təntənəli şəkildə “Zəfər Bayramı” qeyd ediləcək, elmi-praktik konfranslar keçiriləcəkdir. Bundan başqa, sentyabr ayının 14-dən 16-dək Bakı şəhərinin 1918-ci il sentyabrın 15-də Qafqaz İslam Ordusu tərəfindən azad edilməsinin 85 illiyi qeyd olunacaq, oktyabr ayının sonlarında “Cümhuriyyət bayramı”nın 80 illiyi ilə bağlı Milli Məclisin sessiyası, hər iki ölkənin qardaşlaşmış 9 şəhərində bayram şənlikləri keçiriləcəkdir.

Yubiley tədbirləri noyabr ayının 10-dan 16-dək Türkiyə Cümhuriyyətinin ilk Prezidenti Mustafa Kamal Atatürkün vəfatının 65 illiyinə həsr olunmuş “Atatürk həftəsi” ilə başa çatacaqdır.

Müzakirələr zamanı deputatlar Zəlimxan Yaqub, Nizami Cəfərov, Elman Məmmədov, Asya Manafova və başqaları bildirdilər ki, iki dost və qardaş ölkə arasındakı əlaqələrin inkişafı üçün Azərbaycan və Türkiyənin dövlət başçılarının yaratdıqları şəraitdən istifadə edərək, daha gərəkli addımlar atılmalıdır. Bu həm də gələcək nəsillər üçün örnək olacaqdır.

Xocalı soyqırımının TBMM tərəfindən tanınmasının vacibliyi iclasda xüsusi vurğulandı. Sonda işçi qrupunun türkiyəli həmkarlarına müraciət etmələri barədə qərar qəbul olundu.

Tədbirdə iştirak edən Türkiyənin Azərbaycandakı səfiri Əhməd Ünal Çeviköz dedi ki, Türkiyə Cümhuriyyətinin 80 illiyinin Azərbaycanda qeyd olunması iki qardaş ölkə arasında əlaqələrin daha da möhkəmlənməsinə xidmət edəcəkdir. Diplomat bunu və həmçinin Azərbaycanın müxtəlif bölgələrində türk əsgərlərinin məzarlarının abadlaşdırılmasını şanlı tariximizin gələcək nəsillərə çatdırılmasında mühüm bir addım kimi qiymətləndirdi. Səfir dedi ki, yubiley tədbirlərinin keçirilməsi ilə əlaqədar Türkiyə tərəfindən lazım olacaq bütün yardımlar ediləcəkdir.

İclasda TBMM-in Türkiyə-Azərbaycan dostluq qrupunun təbrik məktubu oxundu.