UKRAYNA PREZİDENTİ VİKTOR YUŞŞENKONUN NİTQİ
Hörmətli azərbaycanlı dostlar!
Zənnimcə, hər hansı layihənin gerçəkləşdirilməsini təmin etmək üçün bir zəruri şərt var – sənin qeyd dəftərçəndə nəzərdə tutulan layihənin həyata keçirilməsini birlikdə təmin etdiyin tərəfin telefon nömrəsi olmalıdır. Bugünkü səfər, Ukraynadan gələn nümayəndə heyəti, məncə, buna çox gözəl sübutdur ki, Azərbaycanla, onun rəhbərliyi, iqtidarı, xalqı ilə münasibətlərimiz ən yüksək səviyyədədir.
İş elə gətirmişdir ki, bu münasibətlərin illərlə formalaşmış gözəl ənənəsi var. Zənnimcə, o da eyni dərəcədə əhəmiyyətlidir ki, biz bu ənənəni qiymətləndiririk və bu münasibətləri qoruyub saxlamağın, onlara daha yaxşı cəhətlər əlavə etməyin, növbəti nəsilə ötürməyin nə dərəcədə vacib olduğunu başa düşürük. Mən sizin rəhbərliklə aramızda yaranmış etimadın səviyyəsini çox yüksək qiymətləndirirəm.
Bu gün biz tətbiqi layihələrə, həyata keçirmək üçün kifayət qədər aşkar olan layihələrə çox vaxt ayırdıq. Layihələrin gerçəkləşdirilməsi üçün hakimiyyət mexanizmlərindən, dövlət qurumlarından nə dərəcədə səmərəli və tez istifadə etməyə nail olmağımız məsələsində, bəlkə də, risk var. Məmur, bir tərəfdən, fiziki baxımdan böyük işlərə qadirdir, digər tərəfdən isə, haqqında danışdığımız layihələrin təşkilində ciddi maneə də ola bilər. Düşünürəm ki, biz bu münasibətlərin siyasi müstəvidən, hökumətlər arasındakı münasibətlər müstəvisindən işgüzar qurumların – digər əsaslar olan, digər stimulların işlədiyi, öz oyun qaydaları olan qurumların səviyyəsinə mümkün qədər tezliklə keçirmək üçün öz üzərimizdə məsuliyyət hiss etməliyik. Bu gün müzakirə etdiklərimizin üçdə iki hissəsi bazar layihələrinə, praktik olaraq, açıq, rəqabətli layihələrə aiddir. Bu layihələrin həyata keçirilməsini təmin etməyin ən yaxşı yolu hökumətin onları mümkün qədər tezliklə vicdanlı işgüzar strukturlara verməsindən ibarətdir.
Onu da vurğulamaq istərdim ki, biz Azərbaycanda Ukrayna xalqına olan münasibəti çox yüksək qiymətləndiririk. Cənab Prezident, Azərbaycandakı Ukrayna diasporunun həyatı üçün belə normal şərait təmin edildiyinə görə Sizə, komandanıza, hökumətinizə çox minnətdaram. Demək istərdim ki, Siz Ukraynada yaşayan Azərbaycan diasporu barəsində Ukrayna tərəfindən eyni cavabı həmişə eşidəcəksiniz. Ümumiyyətlə, bizim məqsədimiz Ukraynadakı hər hansı icmanın, o cümlədən də Azərbaycan icmasının həyatı üçün elə dinclik və rahatlıq yaratmaqdır ki, hansı torpaqda doğulmasından asılı olmayaraq, hər bir insan ayağa qalxıb böyük iftixar hissi ilə deyə bilsin: mən ukraynalıyam, çünki Ukraynada yaşayıram və Ukrayna dövləti mənə insan ləyaqətinə layiq olan firavanlığı verir. Ona görə də təhsillə, dilin inkişafı, məktəbəqədər tərbiyə, kütləvi informasiya vasitələri, mədəni xarakterli tədbirlərlə bağlı layihələr və ya digər təşəbbüslər ən yüksək səviyyədə dəstəklənəcəkdir.
Mən bu badəni iki böyük, iki maraqlı xalqın, nadir perspektivə malik xalqların şərəfinə qaldırmaq istərdim. Bu gün son on beş ilin bizi necə dəyişdirdiyindən danışdıq. Belə başa düşürəm ki, bəlkə də, insan meyarı baxımından milyonlarla adamın fəlakətləri, bəlkə də, minlərlə adamın faciələri olmuşdur, bəlkə də, bugünkü günün üstünlüklərindən heç də hamı bəhrələnməmişdir. Amma, gəlin yada salaq ki, bu on beş ildə iki dövlət – Azərbaycan və Ukrayna dövlətləri yaradılmışdır. Bu ideya milyonlarla əcdadımızın düşüncəsinin bəhrəsi idi, lakin onda ulduzlara görə də, vəziyyətə görə də müstəqil, suveren dövlətdən danışmaq üçün belə imkan yox idi. Bu gün biz hamımız nadir bir zəmanədə yaşayırıq. İstərdim ki, biz mövcud problemlərdən, – baxmayaraq ki, sanki, onlar mühümdür, onlarla həm məişət səviyyəsində, həm də siyasi səviyyədə hər gün qarşlaşırsan, – heç olmasa bir anlığa uzaqlaşaq və bizi suveren dövlətlərimizin yaranmasına gətirib çıxaran zəmanəni, hər halda, layiqincə qiymətləndirək.
Mən Azərbaycan və Ukrayna xalqlarının şərəfinə, Azərbaycan Respublikasının Prezidenti İlham Heydər oğlunun və onun xanımının sağlığına, burada olanların hamısının sağlığına badə qaldırıram.
X X X
(Dövlət başçılarının nitqləri böyük diqqətlə dinlənildi və alqışlarla qarşılandı).
Bölmənin digər xəbərləri
