Haaqa, 18 may, AZƏRTAC

Azərbaycan Respublikasının Niderland Krallığındakı səfirliyinin təşkilatçılığı ilə Haaqada Ulu Öndər Heydər Əliyevin anadan olmasının 100 illiyi qeyd edilib.

AZƏRTAC xəbər verir ki, tədbirdə Niderlandda akkreditə olunan diplomatik korpusun təmsilçiləri, senatorlar, tarixçilər, tədqiqatçılar, yerli ictimaiyyətin və Azərbaycan icmasının nümayəndələri iştirak ediblər.

Azərbaycanın Niderlanddakı səfiri Rəhman Mustafayev çıxış edərək Ulu Öndər Heydər Əliyevin Azərbaycana rəhbərliyi dövründə Vətəni, xalqı qarşısında misilsiz xidmətlərindən söz açıb. Bildirib ki, 1990-cı illərin əvvəllərində Azərbaycan yenicə əldə etdiyi müstəqilliyini itirmək, parçalanmaq təhlükəsi ilə üz-üzə qalmışdı. Ölkəni belə ağır vəziyyətdən yalnız Heydər Əliyev xilas edə bilərdi. Xalqın təkidli tələbi ilə yenidən hakimiyyətə gəlmiş Ulu Öndər ilk günlərdən şəxsiyyətinin böyüklüyünü, əsl dövlət xadimi kimi müdrikliyini ortaya qoydu. Təcrübəli siyasi xadim daxili vəziyyəti sabitləşdirməyə və gənc respublikanı böhrandan çıxarmağa nail oldu, müharibə və işğala məruz qalan, siyasi, iqtisadi və sosial böhranlarla iflic vəziyyətinə düşən ölkənin dağılmasının qarşısını aldı. Səfir həmin dövrdə Ulu Öndərin yanında çalışdığını bildirərək, o dövrlərdəki xatirələrini tədbir iştirakçıları ilə bölüşüb. Vurğulayıb ki, fenomenal şəxsiyyət olan Heydər Əliyev çətin vəziyyətə düşmüş ölkəni qısa müddətdə dirçəltməyə nail oldu.

Diplomat qeyd edib ki, 1993-cü ilin oktyabrında keçirilən prezident seçkilərində Heydər Əliyev Azərbaycan Respublikasının Prezidenti seçildi. Onun Prezident olduğu 1993-2003-cü illərdə müstəqilliyimiz möhkəmləndi, müasir dövlət quruculuğunun möhkəm təməli qoyuldu. O, daxili siyasətində ətrafdakı təhlükələrə və geosiyasi mürəkkəbliklərə baxmayaraq, cəmiyyətimizin sosial sabitliyini və tolerant xarakterini qoruyub saxlaya bildi. 1995-ci ilin noyabrında Ümummilli Liderin rəhbərliyi ilə müstəqil Azərbaycanın ilk Konstitusiyası hazırlandı və ümumxalq səsverməsi yolu ilə qəbul edildi.

Bildirilib ki, Ulu Öndər Heydər Əliyevin rəhbərliyi ilə 1994-cü ildə iqtisadi sahədə həyata keçirilən yeni enerji strategiyası Azərbaycanın dünya iqtisadiyyatına inteqrasiyasında həlledici rol oynadı, respublikamızın iqtisadi inkişafı, ictimai-siyasi sabitliyi və müstəqil xarici siyasəti üçün möhkəm zəmin yaratdı. Azərbaycanın dünya iqtisadi sisteminə inteqrasiyası və ölkənin enerji təhlükəsizliyi 1994-cü il sentyabrın 20-də Bakıda “Əsrin müqaviləsi”nin imzalanması ilə başlayıb. Bu gün Avropanın enerji təhlükəsizliyində böyük rolu olan Bakı-Tbilisi-Ceyhan və Bakı-Tbilisi-Ərzurum kimi neft və qaz kəmərlərinin memarı məhz Heydər Əliyev olub.

R.Mustafayev vurğulayıb ki, əsası Ümummilli Lider Heydər Əliyev tərəfindən qoyulan strategiya Prezident İlham Əliyevin rəhbərliyi ilə uğurla davam etdirilir. Ermənistanın işğalı altındakı ərazilərimiz 44 günlük Vətən müharibəsində Prezident, Müzəffər Ali Baş Komandanın qətiyyəti və Azərbaycan Ordusunun qüdrəti sayəsində azad edilib, ölkəmizin ərazi bütövlüyü bərpa olunub.

Sonra Ulu Öndər Heydər Əliyevin həyatı və siyasi fəaliyyətinə dair sənədli film nümayiş etdirilib, fotosərgi ilə tanışlıq olub.

Azərbaycanın Əməkdar artisti, pianoçu və bəstəkar İsfar Sarabski və qrupunun Ulu Öndərin anadan olmasının 100 illiyinə həsr edilmiş konserti böyük maraqla qarşılanıb. İsfar Sarabski və tarzən Bəhruz Zeynal kontrabasda Makar Novikov, zərb alətlərində Saşa Maşın müşayiəti ilə “Planet” albomundakı musiqiləri səsləndiriblər. Konsertdə İsfar Sarabskinin bəstələdiyi “Planet“, “Qarabağ atları” və digər bəstələr, eləcə də tar musiqi alətinin ifasında etnocaz üslubundakı kompozisiyalar xüsusi maraq doğurub.