Zaqatala-Qax, 13 iyul, Mustafa Dadaşov, AZƏRTAC

Azərbaycanı müstəqil dövlət quruculuğuna aparan yol əslində 1969-cu il iyulun 14-dən - ümummilli lider Heydər Əliyevin ilk dəfə respublika rəhbərliyinə gəlməsindən sonra başlanıb. Ulu Öndərin siyasi hakimiyyətdə olduğu illər Azərbaycanın quruculuq salnaməsinin ən parlaq səhifələrini təşkil edir.

AZƏRTAC-ın bölgə müxbiri xəbər verir ki, bu fikir ümummilli lider Heydər Əliyevin Azərbaycanda hakimiyyətə gəlməsinin 49-cu ildönümü münasibətilə iyulun 12-də Zaqatala şəhərində keçirilən “Uğurlu gələcəyi yazan və yaradan” mövzusunda elmi-praktik konfransda səsləndirilib.

Rayon rəhbərliyi və ictimaiyyətin nümayəndələri əvvəlcə Ulu Öndərin abidəsi önünə gül dəstələri düzüb, xatirəsini ehtiramla yad ediblər.

Heydər Əliyev Mərkəzində keçirilən konfransda çıxış edən rayon icra hakimiyyətinin başçısı Mübariz Əhmədzadə bildirib ki, ötən əsrin 70-ci illərindən etibarən Azərbaycanın siyasi həyatı və bütövlükdə cəmiyyətimiz Ulu Öndərin böyük səyləri nəticəsində yeni inkişaf mərhələsinə qədəm qoyub. Azərbaycanın müasir tarixinin bütöv bir mərhələsi, eləcə də müstəqil dövlətimizin inkişafı məhz Ümummilli Liderin adı və fəaliyyəti ilə bağlıdır. Heydər Əliyev öz dərin zəkası, liderlik xarizması, milli ideallara, adət-ənənələrə möhkəm bağlılığı, zəngin idarəçilik keyfiyyətləri ilə ölkəmizin gələcək inkişafı üçün möhkəm zəmin yaradıb.

Konfransda dinlənilən məruzə və çıxışlarda dahi rəhbərin Azərbaycanın müstəqilliyinin möhkəmləndirilməsi yolunda tarixi xidmətlərindən, onun respublikamıza rəhbərlik etdiyi dövrlərdə ölkəmizin qazandığı uğurlardan geniş bəhs edilib, Ulu Öndərin siyasi xəttinin Prezident İlham Əliyev tərəfindən uğurla davam etdirildiyi xüsusi vurğulanıb.

x   x   x

Xalqımızın ümummilli lideri Heydər Əliyevin Azərbaycanda siyasi hakimiyyətə gəlməsinin 49-cu ildönümü münasibətilə Qax şəhərində keçirilən toplantının iştirakçıları əvvəlcə Ulu Öndərin şəhərin mərkəzində ucaldılmış abidəsi önünə gül-çiçək düzüb, xatirəsini ehtiramla yad ediblər.

AZƏRTAC-ın bölgə müxbiri xəbər verir ki, Heydər Əliyev Mərkəzində keçirilən tədbirdə çıxış edən rayon icra hakimiyyətinin başçısı Musa Şəkiliyev Azərbaycanın dövlətçilik ənənələrinin bərpasının, respublikamızın iqtisadi qüdrətinin artmasının Heydər Əliyevin ilk dəfə respublika rəhbərliyinə gəldiyi gündən - 1969-cu il iyulun 14-dən başlandığını diqqətə çatdırıb. Qeyd olunub ki, o zamandan başlayaraq Heydər Əliyev ideyaları həyatımızın başlıca gerçəkliyinə, inkişafımızın təməl daşına çevrilib.

Çıxışlarda vurğulanıb ki, Heydər Əliyev Azərbaycana rəhbərlik etdiyi bütün dövrlərdə xalqını, Vətənini düşünüb, ürəyi Azərbaycanın müstəqilliyinin möhkəmləndirilməsi, doğma xalqının xoşbəxtliyi üçün çırpınıb. Onun formalaşdırdığı azərbaycançılıq ideyası Azərbaycanın müasir dünyada xüsusi yerini müəyyən edib, dünya azərbaycanlılarının həmrəyliyi üçün möhkəm zəmin yaradıb.

Qeyd olunub ki, Ümummilli Liderin hakimiyyətdə olduğu illər respublikanın hər yerində olduğu kimi, Qax rayonunda da iqtisadiyyatın sürətli inkişafı baxımından xüsusilə fərqlənir. Həmin illərdə rayonda böyük quruculuq işləri görülüb, yeni istehsal müəssisələri fəaliyyətə başlayıb, onlarca sosial təyinatlı obyekt tikilib istifadəyə verilib, yeni yollar, körpülər salınıb.

Çıxışlarda dahi rəhbərin dövlətçiliyimizin qorunması və möhkəmlənməsinə, respublikamızın iqtisadi tərəqqisinə gətirib çıxarmış siyasi xəttinin bu gün Prezident İlham Əliyev tərəfindən uğurla davam etdirildiyi xüsusi vurğulanıb.