Bakı, 30 mart, AZƏRTAC

Ötən həftə dünyada 10 milyondan çox insan koronavirusa yoluxub, 45 mindən çox insan bu xəstəlik nəticəsində həyatını itirib. Əvvəlki yeddi gün ilə müqayisədə ölüm hallarının sayı 43 faiz artıb, yoluxanların sayı isə 14 faiz azalıb.

AZƏRTAC xəbər verir ki, bu barədə Ümumdünya Səhiyyə Təşkilatının (ÜST) həftəlik bülletenində deyilir.

Hesabatda bildirilir ki, martın 21-dən 27-dək COVID-19 virusuna yeni yoluxma hallarının sayı ötən həftə ilə müqayisədə 14 faiz aşağı düşüb. Eyni dövrdə ölüm hallarının sayı isə 43 faiz artıb. Görünür, bu, Amerika regionunun bəzi ölkələrində (Çili və ABŞ) ölüm hallarının müəyyən edilməsində dəyişikliklərlə, eləcə də Hindistan və Cənubi-Şərqi Asiya regionundan olan məlumatların retrospektiv korrektəsi ilə bağlıdır. Həftə ərzində ÜST-yə 10.805.132 nəfərin yoluxması barədə məlumatlar daxil olub, 45.711 ölüm halı qeydə alınıb.

Əvvəlki həftə ilə (martın 14-dən 20-dək) müqayisədə yoluxanların sayında azalma ÜST-nin bütün 6 regionunda müşahidə edilib. Xüsusən bu, Şərqi Aralıq dənizi regionunda (mənfi 32 faiz), Afrikada (mənfi 29 faiz) və Qərbi Sakit okean regionunda (mənfi 24 faiz) özünü daha çox büruzə verib. Dünyada həftə ərzində bütün yeni yoluxma hallarının 49 faizi Avropanın payına düşür. Bu regionda yoluxma sayı 4 faiz azalıb.

Ölüm hallarının artımı Amerikada (182 faiz) və Cənubi-Şərqi Asiyada (116 faiz) qeydə alınıb. Qalan regionlarda ölüm hallarının nəzərəçarpacaq dərəcədə azaldığı müşahidə edilib: Afrikada (30 faiz), Şərqi Aralıq dənizi regionunda (22 faiz) və Avropada (17 faiz).

Həftə ərzində ən çox yoluxanlar barədə məlumat Koreya Respublikasından (2.442.195) daxil olub. Sonrakı yerlərdə Almaniya (1.576. 261), Vyetnam (1.127.716), Fransa (845.119) və İtaliya (503.932) gəlir. 7 gün ərzində koronavirus səbəbindən daha çox ölənlər Çilidə qeydə alınıb - 11.858 nəfər. Bu siyahıda sonrakı yerləri ABŞ (5.367), Hindistan (4.525), Rusiya (2.859) və Koreya Respublikası (2.471) tutur.