WUF13 Azərbaycanın şəhərsalma uğurlarını dünyaya tanıtdı – ŞƏRH
Bakı, 26 may, AZƏRTAC
Azərbaycan Birləşmiş Millətlər Təşkilatının Ümumdünya Şəhərsalma Forumunun 13-cü Sessiyasına (WUF13) ev sahibliyi etdi. WUF13 Azərbaycanda keçirilməklə bu sahədə yeni uğura imza atılıb. Belə ki, WUF13-də 45 mindən artıq iştirakçı qeydiyyatı oldu və bu da bütövlükdə sessiyalar daxilində ən yüksək göstəricidir.
Bu fikirləri AZƏRTAC-a açıqlamasında Milli Məclisin deputatı, iqtisadçı-ekspert Vüqar Bayramov bildirib. O diqqətə çatdırıb ki, Azərbaycan şəhərsalma ənənəsinə və bu istiqamətdə təqdim olunan mexanizmlərə görə regionda fərqlənən ölkələrdəndir.
“Bütövlükdə, şəhərsalma ənənəsi və bu sahədə əldə edilən uğurlar, o cümlədən paytaxt daxil olmaqla digər şəhərlərimizin inkişafı birbaşa Ulu Öndər Heydər Əliyevin hakimiyyətdə olduğu illərə təsadüf edir. Bakının inkişafı birmənalı şəkildə 1969-cu ildə reallaşan siyasət və həyata keçirilən dəstək nəticəsində mümkün olub. Ona görə də Azərbaycanın şəhərlərinin, xüsusən Bakının inkişafı, infrastrukturun formalaşması, yeni sənaye və digər müəssisələrin qurulması Ümummilli Liderin adı ilə bağlıdır. Məhz onun siyasəti nəticəsində Bakı keçmiş SSRİ dövründə İttifaqın aparıcı şəhərlərindən birinə çevrilmişdi.
Bu ənənə Prezident İlham Əliyevin dövründə də davam etdirilib, daha da genişləndirilib, yeni şəhərlər salınıb. Qarabağ və Şərqi Zəngəzur bərpa olunub və yenidən qurulub. Bütün bunlar ondan xəbər verir ki, Azərbaycan Prezident İlham Əliyevin rəhbərliyi ilə həm şəhərsalmada, həm postmünaqişə dövründə yaşayış məntəqələrinin bərpası, “ağıllı şəhər”, “ağıllı kənd” modelindən istifadə sahəsində nəinki regional, bəzi məsələlərdə qlobal səviyyədə uğura imza atan ölkələrdəndir. Azərbaycan WUF13-ə ev sahibliyi etməklə bu sahədəki uğurlarını qlobal ictimaiyyətə bir daha təqdim etmiş oldu”,- deyə o bildirib.
V.Bayramov əlavə edib ki, WUF13, eyni zamanda, Azərbaycan üçün yeni əməkdaşlıq imkanları deməkdir: “Çünki Azərbaycanın potensialının təqdim edilməsi və kifayət qədər çoxlu sayda nümayəndə heyətinin iştirak etməsi forumdan sonrakı mərhələdə, xüsusən də qeyri-neft sektoruna sərmayələrin cəlb edilməsi baxımından yeni imkanlar yaradıb. Bu kontekstdən, biz Azərbaycanın beynəlxalq əməkdaşlığının güclənməsi və beynəlxalq səviyyədə nüfuzunun daha da artmasının, eyni zamanda, qeyri-neft sektoruna daha çox xarici sərmayənin cəlbini müşahidə edəcəyik ki, bu da WUF13 dövrünün Azərbaycan üçün gətirdiyi dividendlərdir”.
Bölmənin digər xəbərləri
