Naxçıvan, 7 dekabr, AZƏRTAC

Cəlil Məmmədquluzadə adına Naxçıvan Dövlət Musiqili Dram Teatrında “Xalq mahnı və təsniflərinin ifaçılıq müsabiqəsi - 2016”nın yekun mərhələsi olub.

AZƏRTAC xəbər verir ki, müsabiqə Naxçıvan Muxtar Respublikası Mədəniyyət və Turizm Nazirliyi, Naxçıvan Muxtar Respublikası Dövlət Televiziya və Radio Verilişləri Komitəsinin təşkilatçılığı ilə keçirilib.

Tədbirdə çıxış edən Naxçıvan Muxtar Respublikasının mədəniyyət və turizm naziri Natəvan Qədimova bildirib ki, Azərbaycan xalqının bədii yaradıcılığının və musiqi mədəniyyətinin zəngin bir hissəsi olan mahnı və təsniflərimiz əsrlərdən bəri cilalana-cilalana dövrümüzə qədər gəlib çatmış nadir sənət nümunələridir. Bu sənət inciləri xalqımızın pak, yüksək mənəviyyatını, daxili aləmini, arzularını, ümidlərini özündə əks etdirərək onun məişəti, zəngin mədəniyyəti ilə bağlı olub, xalqın mədəni inkişafında əvəzsiz rol oynayıb. Xalq mahnılarında, təsniflərdə, eləcə də muğam və aşıq yaradıcılığında xalqımızın müdrikliyini, gələcəyə inamını, məhəbbətini, düşüncə və təfəkkürünü, mübarizə və döyüş ruhunu görmək mümkündür.

Qeyd edilib ki, ölkəmizdə, o cümlədən Naxçıvan Muxtar Respublikasında xalq musiqisinin, muğam sənətinin yaşadılması istiqamətində ardıcıl tədbirlər görülür. Naxçıvan Muxtar Respublikası Ali Məclisi Sədrinin 2009-cu il 7 fevral tarixli “Naxçıvan Muxtar Respublikasında Xalq yaradıcılığı günlərinin keçirilməsi haqqında” Sərəncamına əsasən, hər il keçirilən xalq yaradıcılığı günlərində zəngin folklor nümunələri ilə yanaşı, milli musiqimiz, muğamlarımız da səslənir. 2012-ci ilin muxtar respublikamızda “Milli dəyərlər ili” elan edilməsi, həmin il keçirilən “Milli dəyərlərimiz - milli sərvətimiz” folklor və muğam müsabiqəsi yaddaqalan tədbirlərdən biri kimi əlamətdar olub. Naxçıvan Muxtar Respublikası Mədəniyyət və Turizm Nazirliyi və Dövlət Televiziya və Radio Verilişləri Komitəsinin təşkilatçılığı ilə bu ilin aprel ayından “Xalq mahnı və təsniflərinin ifaçılıq müsabiqəsi”nə start verilib. Müsabiqə seçim turu və əsas turdan ibarət olub. Seçim turu bu ilin mart ayında mədəniyyət və incəsənət xadimlərindən ibarət seçim qrupu tərəfindən muxtar respublikanın bütün rayonlarında keçirilib.

Natəvan Qədimova çıxışının sonunda mədəniyyət və incəsənətimizə göstərilən qayğıya görə Naxçıvan Muxtar Respublikası Ali Məclisinin Sədrinə minnətdarlığını ifadə edib.

Naxçıvan Muxtar Respublikasının Dövlət Televiziya və Radiosunun müsabiqənin bütün mərhələlərini geniş şəkildə işıqlandırdığını deyən Naxçıvan Muxtar Respublikası Dövlət Televiziya və Radio Verilişləri Komitəsinin sədri Sahil Tahirli bildirib ki, muxtar respublikanın rayonlarında keçirilən müsabiqənin mərhələlərindən hazırlanmış verilişlər geniş ictimaiyyət tərəfindən maraqla qarşılanıb. Bu verilişlər muğam sənətimizi, mahnı və təsniflərimizi geniş təbliğ etməklə yanaşı, istedadların tanıdılması baxımından da əhəmiyyətli olub.

Qeyd edilib ki, aprel ayından noyabr ayına qədər keçirilmiş və muxtar respublikanın mədəni həyatında əlamətdar hadisə kimi dəyərləndirilən “Xalq mahnı və təsniflərinin ifaçılıq müsabiqəsi - 2016” muxtar respublikada yaşayan istedadlı şəxslərin aşkar edilməsinə, onların yaradıcılıq potensiallarının düzgün istiqamətləndirilməsinə, həmçinin milli musiqimizin təbliği və yaşadılmasına dəyərli töhfə olub.

Aparıcılar bildiriblər ki, “Xalq mahnı və təsniflərinin ifaçılıq müsabiqəsi - 2016”nın qalibləri bir I yer, iki II yer və iki III yer olmaqla, üç yer üzrə müəyyənləşdirilib. Naxçıvan şəhərindən qatılan Yusif Hacıyev birinci yerin qalibi elan edilib. Babək rayonunun Nehrəm kəndindən Səfər Cəfərov, Naxçıvan şəhərindən Elmar Qasımov ikinci yerin, Ordubad rayonundan Əsmər Hüseynova və Kəngərli rayonunun Böyükdüz kəndindən İlham Məmmədov isə üçüncü yerin qalibi olublar.

Naxçıvan Muxtar Respublikasının mədəniyyət və turizm naziri Natəvan Qədimova və Naxçıvan Muxtar Respublikası Dövlət Televiziya və Radio Verilişləri Komitəsinin sədri Sahil Tahirli qaliblərə diplom və mükafatları təqdim ediblər.

Müsabiqə müddətində ifaçılarla məşq aparan müəllimlərin də zəhməti təşkilatçılar tərəfindən qiymətləndirilib, onlar diplom və hədiyyələrə layiq görülüblər. Müsabiqənin digər iştirakçılarına da diplom və fəxri fərmanlar verilib.

Münsiflər heyətinin üzvlərinə müsabiqədə fəal iştiraklarına görə təşkilatçılar tərəfindən güllər təqdim edilib və ansamblın üzvləri diplomlarla təltif olunublar.

Sonra müsabiqənin yekun konserti olub.

İlk olaraq Məhərrəm Quliyev, Rəşad Nəcəfov, Səfər Cəfərov və Elmar Qasımov “Mənim Azərbaycanım” mahnısını ifa ediblər.

Fuad Qədimovun, Əsmər Hüseynovanın, Yusif Hacıyevin ifa etdikləri “Gedirəm axı”, “Ay qız”, “A Leyli” Azərbaycan xalq mahnıları, Araz Cabbarov, Təyyar Mədətli və İlham Məmmədovun birgə ifa etdikləri “Qarabağ şikəstəsi”, başqa mahnı və təsniflər alqışlarla qarşılanıb.

Konsert müsabiqə iştirakçılarının ifa etdikləri “Naxçıvan” mahnısı ilə başa çatıb.