Bakı, 24 sentyabr (AZƏRTAC). Yeni Azərbaycan Partiyasının yaradılmasının 20 illik yubileyi münasibətilə partiyanın Nizami rayon təşkilatının ərazi təşkilatlarında silsilə tədbirlərə start verilmişdir.

AZƏRTAC xəbər verir ki, YAP-ın “Qidromaş” QSC ərazi ilk partiya təşkilatında keçirilən tədbirdə çıxış edən qurumun sədri Əhməd Hümbətov bildirmişdir ki, YAP ümummilli lider Heydər Əliyevin ideyalarını reallığa çevirən bir siyasi təşkilatdır. YAP bu gün ölkənin aparıcı siyasi qüvvəsi kimi, dünyanın nüfuzlu partiyalarından birinə çevrilmişdir.

“Yeni Azərbaycan Partiyası Azərbaycan xalqının seçimidir” - deyən təşkilatın sədr müavini Fərhad Bədirov isə vurğulamışdır ki, YAP hər zaman cəmiyyətimizin iradəsinin ifadəçisidir.

Digər iştirakçılar da çıxışlarında 600 minə yaxın üzvü olan YAP-ın qarşıdan gələn seçkilərdə də inamlı qələbə qazanacağına əminliklərini diqqətə çatdırmışlar.

Sonda partiyaya yeni üzv qəbul edilənlərə YAP-ın vəsiqələri paylanmışdır.

X X X

YAP-ın yaranmasının 20 illiyi “Vətən” ərazi ilk partiya təşkilatında da qeyd olunmuşdur.

Təşkilatın sədri Samir Mehdiyev çıxışında partiyanın yaranma tarixindən, onun Azərbaycanın həyatında oynadığı mühüm roldan bəhs etmişdir. Bildirilmişdir ki, YAP Azərbaycanın siyasi palitrasına sivil mübarizə metodları gətirmişdir. Hər zaman dövlətçilik naminə əhəmiyyətli addımlar atan YAP Azərbaycan xalqının mütləq əksəriyyətinin vahid seçiminə çevrilmişdir.

Tədbirdə çıxış edənlər YAP-ın növbəti seçkilərdə də qalib gələcəyinə ümidvar olduqlarını vurğulamışlar.

Sonda partiya sıralarına daxil olmaq istəyənlərlə bağlı qərar qəbul edilmişdir.

Qeyd edək ki, yubiley tədbirləri YAP Nizami rayon təşkilatının bütün ərazi təşkilatlarında keçirilir.