Zaqatalada balıqçılığa maraq artır
Zaqatala, 7 mart (AZƏRTAC). Əhalinin etibarlı ərzaq təminatı dövlətin iqtisadi siyasətinin başlıca istiqamətlərindən biridir. “2008-2015-ci illərdə Azərbaycan Respublikasında əhalinin ərzaq məhsulları ilə etibarlı təminatına dair Dövlət Proqramı”na uyğun olaraq, daxili istehsal hesabına əhalinin ərzaq məhsulları ilə tələbatının tam ödənilməsini təmin etməkdən ötrü son illər Zaqatala rayonunda da məqsədyönlü iş aparılır.
Rayon icra hakimiyyətindən AZƏRTAC-a bildirmişlər ki, özəl bölmənin inkişafı üçün yaradılmış əlverişli mühit yerli iş adamlarının yeni istehsal sahələri açmaq marağını daha da artırmışdır. Hazırda rayonda balıqçılığın inkişafı üçün zəruri tədbirlər həyata keçirilir. Rayon ərazisindən axan Qanıx və Tala çayları sahilində yerləşən Danaçı, Makov, Əliabad, Muğanlı, Car və digər kəndlərdə son illər 30-dək balıqçılıq təsərrüfatı yaradılmışdır. Bu təsərrüfatlarda əsasən çəki, karp, ağ amur və digər balıq növləri yetişdirilir. İstehsal olunan məhsul hələlik yalnız daxili bazarın tələbatını ödəyir.
Hazırda rayonda balıqçılıq sənayesinin gələcək inkişafı üçün vacib baza yaradılır, yeni yaradılmış balıqçılıq təsərrüfatlarının dövlət qeydiyyatına alınması üçün müvafiq sənədləşmə işi aparılır.
Bölmənin digər xəbərləri
