ELM VƏ TƏHSİL
Zoologiya İnstitutu Rusiyanın Bitki və Heyvanların Ekologiyası İnstitutu ilə əməkdaşlıq edəcək

Bakı, 10 may, AZƏRTAC
Azərbaycan Milli Elmlər Akademiyasının Zoologiya İnstitutu ilə Rusiya Elmlər Akademiyasının Ural şöbəsinin Bitki və Heyvanların Ekologiyası İnstitutu arasında əməkdaşlıq müqaviləsi imzalanıb.
Zoologiya İnstitutundan AZƏRTAC-a bildirilib ki, müqavilədə birgə multidissiplinar tədqiqatların aparılması, bioloji resursların qiymətləndirilməsi, Xəzər dənizinin bioloji müxtəlifliyini öyrənmək üçün beynəlxalq laboratoriyanın yaradılması, Xəzər dənizinin faunasının kadastrının hazırlanması, Ural və Azərbaycan faunasının müqayisəli analizi, “Binəqədi faunası” üzrə paleozooloji tədqiqatların aparılması nəzərdə tutulub.