DÜNYA
Venesiyada leysan yağışları şəhərin 80 faizini basıb
Bakı, 13 noyabr, AZƏRTAC
Venesiyada suyun səviyyəsi 183 santimetrə çatıb, şəhərin 80 faizini su basıb. ANSA agentliyi şəhər administrasiyasının fövqəladə vəziyyət elan etməyə hazır olduğunu bildirir.
AZƏRTAC TASS informasiya agentliyinə istinadla xəbər verir ki, Venesiyanın Müqəddəs Mark meydanı suyun altındadır; ərazidə suyun hündürlüyü bir metri ötüb. Eyniadlı kilsəni də su basıb.
Venesiyada suyun ən yüksək səviyyəsi 1966-cı ildə qeydə alınıb. Həmin vaxt suyun səviyyəsi rekord həddə – 190 santimetrə çatıb, halbuki 130 santimetr kritik hədd sayılır.
“Bu dəfə biz əsl fəlakəti yaşayırıq və zərər qaçılmazdır”, - deyə Venesiya meri Luici Brunyaro bildirib.
“Suyun yüksək səviyyəsi” Venesiyanın coğrafi mövqeyi üçün səciyyəvidir. Bu, bir qayda olaraq payızda və yazda artır və dəniz səthinin qabarmasından asılıdır. Bu dəfə suyun səviyyəsi yağışlar səbəbindən artıb. Daşqına dənizdən əsən külək də təsir göstərib.