ELM VƏ TƏHSİL
27 Sentyabr Böyük Qələbəmizə aparan yolun başlanğıcıdır
Bakı, 24 sentyabr, AZƏRTAC
2020-ci il 27 sentyabr Azərbaycan xalqının tarixində unudulmaz günlərdən birinə çevrildi. Həmin gün Ermənistanın Azərbaycana qarşı növbəti hərbi təcavüzünə cavab olaraq, ordumuz əks-hücuma keçdi və işğal altındakı torpaqlarımızın azad edilməsi uğrunda Vətən müharibəsinə başladı. 44 gün çəkən döyüşlərdə Müzəffər Ali Baş Komandanın rəhbərliyi ilə rəşadətli Ordumuz erməni qəsbkarlarını diz çökdürdü.
Bu fikirləri AZƏRTAC-a açıqlamasında AMEA-nın akademik Abdulla Qarayev adına Fiziologiya İnstitutunun şöbə müdiri biologiya üzrə fəlsəfə doktoru, dosent Gilas Qurbanova bildirib. O vurğulayıb ki, Vətən müharibəsində qəhrəmancasına döyüşmüş, ölkəmizin ərazi bütövlüyü uğrunda canlarını qurban vermiş əsgər və zabitlərimizə, bütün şəhidlərimizə dərin ehtiram əlaməti olaraq, Prezident İlham Əliyevin 2020-ci il 2 dekabr tarixli Sərəncamına əsasən sentyabrın 27-si respublikada Anım Günü kimi qeyd ediləcək.
27 Sentyabr Böyük Qələbəmizə aparan yolun başlanğıcıdır, qürurverici bir gündür. Həmin gün ilk həmlədə Rəşadətli Ordumuz tərəfindən kəndlərimizin azad olunması bu inamı daha da gücləndirdi, xalqın “Dəmir yumruq” ətrafında birləşməsinə yol açdı. Müzəffər Ali Baş Komandan xalqa müraciətində “Bizim işimiz haqq işidir, biz qalib gələcəyik” söylədi. Azərbaycan Prezidenti hər çıxışı ilə həm xalqı qələbəyə ruhlandırır, həm də uzun illərdən bəri informasiya savaşında üzləşdiyimiz bütün sədləri öz dəmir məntiqi ilə vurub dağıdır, savaş meydanında hər gün irəliləyən Şanlı Ordunun Müzəffər Ali Baş Komandanı, siyasət meydanında güclü təzyiqlərə sinə gərən, qüdrətli dövlət xadimi kimi davamlı olaraq zəfər tariximizin parlaq səhifələrini yazırdı. Birinci vitse-prezident Mehriban Əliyevanın həmin günlərdə sosial şəbəkələrdə paylaşdığı “Qoy uca Tanrı hər bir Azərbaycan vətəndaşına müqəddəs Qarabağ torpağını öpməyi nəsib etsin” sözləri isə Azərbaycan xalqında torpaqlarımızın işğaldan tamamilə azad olunacağına, üçrəngli bayrağımızın Şuşada dalğalanacağına sonsuz əminlik yaratdı. Əsgər və zabitlərimizin, ümumən ordumuzun, insanlarımızın böyük ruh yüksəkliyi də bundan xəbər verirdi.
Dünya hərb tarixi üçün yeni olan 44 günlük haqq savaşı bizim xalq olaraq bir-birimizə, xüsusən də sərkərdəmizə inam və sevgimizin nümayişinə çevrildi. Beləcə sentyabrın 27-də Ermənistanın hərbi təxribatlarına qarşı əks-hücum əməliyyatı ilə başlayan və noyabrın 10-da düşmənin təslim olması ilə nəticələnən Vətən müharibəsində dövlət başçısı, Müzəffər Ali Baş Komandan İlham Əliyev xalqımızın zəfər salnaməsini yazdı.
“Şuşasız bizim işimiz yarımçıq olar”, - deyən Müzəffər Ali Baş Komandan ulu babalarımızın miras qoyduğu qiymətli əmanəti azad etməklə müasir müstəqil dövlətimizin banisi ümummilli lider Heydər Əliyevin ən ümdə vəsiyyətini şərəflə yerinə yetirdi.
Şuşanın işğaldan azad edilməsi, bu əzəmətli məkana üçrəngli bayrağımızın sancılması Vətən müharibəsində dönüş nöqtəsi oldu. Ermənistanın kapitulyasiya aktı olan 10 noyabr Bəyanatı ilə Kəlbəcər, Laçın və Ağdam rayonlarının qan tökülmədən Azərbaycana qaytarılmasına, ərazi bütövlüyümüzün bərpasına nail oldu.
Azərbaycan Prezidentinin və birinci xanımın işğaldan azad olunmuş ərazilərə səfərləri, Qarabağda aparılan bərpa-quruculuq işləri xalqımızın o torpaqlara qayıdışının təntənəsidir. İşğaldan azad olunmuş ərazilərdə bayrağımızı ucaldan dövlətimizin başçısı erməni vandallarının torpaqlarımızda törətdikləri vəhşiliklərə, o cümlədən Kəlbəcər və Ağdam rayonlarının boşaldılması zamanı evlərin və digər mülki obyektlərin dağıdılaraq yandırılmasına, törədilən ekoloji fəlakətə görə Ermənistanın beynəlxalq müstəvidə cavab verəcəyi haqda mühüm mesajlar verdi.
Bütün bu zəfərdə qardaş Türkiyə Azərbaycanın yanında oldu. Zəfərdən sonra isə İlham Əliyevin və Rəcəb Tayyib Ərdoğanın 15 İyun – Milli Qurtuluş Günündə Şuşa Bəyannaməsini imzalamaları iki qüdrətli ölkənin münasibətlərini iqtisadi, siyasi və hərbi baxımdan ən yüksək səviyyəyə çatdırdı. Növbəti on ildə Qarabağın dirçəldilərək cənnətə çevrilməsi və onun potensialının ölkə iqtisadiyyatına yönəldilməsi prioritet məsələ kimi qarşıda durur.
Güclü iqtisadiyyatı, zəfərdən doğan böyük ruh yüksəkliyi, milli həmrəyliyi olan müstəqil dövlətimiz yeni hədəflərə uğurla çatacaq! Çünki onun İlham Əliyev kimi qətiyyətli rəhbəri, düşmən niyyətlərini məhv edən Müzəffər Ali Baş Komandanı və milli maraqları hər şeydən uca tutan Prezidenti var.
Prezident Silahlı Qüvvələr Günü münasibətilə Azərbaycan Ordusunun rəhbər və şəxsi heyətinin bir qrupu ilə görüşündə bir daha tarixi Zəfərimizi şərtləndirən amillərə, beynəlxalq münasibətlərdə gücün və hüququn roluna diqqəti yönəldərək artıq Dağlıq Qarabağ münaqişəsi anlayışının olmadığını bildirdi. Bununla yanaşı belə bir çağırış da ifadə edildi ki, biz şəhidlərimizi, Xocalı qurbanlarını, dağıdılmış şəhərlərimizi unuda bilmərik. Bu fikirlər Azərbaycan cəmiyyətinə, dünya azərbaycanlılarına, xüsusən gənc nəslə ünvanlanmış çox önəmli nəsihət kimi dəyərləndirilərək daim diqqətdə saxlanılmalıdır. Günümüzün əsas tələbi məhz gənclərimizin milli ruhda tərbiyə olunması, şəhidlərimizin həyat yolunun onlar üçün vətənpərvərlik məktəbi olmasıdır. Məhz gənclərimizin torpaq, Vətən sevgisi onların silahlanaraq dövlətimizin başçısı, Müzəffər Ali Baş Komandan İlham Əliyevin “hücum” əmrini 44 gündə qəhrəmancasına, rəşadətlə yerinə yetirmələrini şərtləndirdi. Bu gün böyük qürur hissi ilə qeyd edirik ki, Birinci və İkinci Qarabağ müharibələrində şəhid olan Vətən oğullarının qisası döyüş meydanında alındı, Azərbaycanın dünyaya səs salan “Dəmir yumruq” əməliyyatı nəticəsində Ermənistan diz çökdü, dünya kimin haqlı, kimin haqsız olduğunu, beynəlxalq hüququn zamana və məkana görə tətbiqinin sonda hansı nəticələrə gətirib çıxardığını gördü. Vətən müharibəsinin ədalətin, qürurun, milli ləyaqətin, Azərbaycan xalqının əyilməz ruhunun təntənəsi olduğu bütün dünyaya bəyan edildi.
Müharibənin başlanmasından ötən bu müddətin təhlili əldə edilən nəhəng uğurların, illərlə aparılmış hazırlıqların bəhrəsidir və indi böyük quruculuq işlərinə start verilib.
Ümumiyyətlə, bu hazırlıq işlərinin aparılmasında əsas amil şübhəsiz ki, xalq-iqtidar birliyi oldu. Əminliklə demək olar ki, dövlətimizin siyasəti xalq tərəfindən dəstəklənir. Müharibə və onun nəticələri bir daha təsdiqlədi ki, münaqişənin tezliklə həllinə inamı yaradan dövlətimizin düşünülmüş siyasəti nəticəsində əldə etdiyimiz uğurlarla yanaşı, Azərbaycan xalqının Prezidentin ətrafında sıx birliyi də əsas oldu. Dövlətimizin başçısı İlham Əliyevin sözlə əməl birliyi bütün sahələrdə özünü nümayiş etdirir. Bu isə öz növbəsində xalqın Prezidentinə, onun siyasətinin gələcəyinə əminliyi gücləndirir.
Xalq müzəffər rəhbərinin ətrafında bir yumruq kimi birləşir. Əsl “Dəmir yumruq” kimi. Bu mənada işğaldan azad edilmiş Hadrut qəsəbəsində ucaldılan “Dəmir yumruq” abidəsi xalqımızın, dövlətimizin, rəhbərimizin iradə və əzminin nümayişidir. Düşmənə əsl göz dağı, dərsdir. Təbliğat xarakterli, düşmənə mesajlar ünvanlayan belə mühüm addımlar Prezident, Müzəffər Ali Baş Komandan İlham Əliyevin müharibədən sonrakı dövrdə revanşist bəyanatlar səsləndirən düşmənə “Dəmir yumruğ”u xatırlatmasının davamıdır. Bu mənada düşmən hər zaman o “Dəmir yumruğ”u başının üzərində hiss etməli və torpaqlarımıza göz dikməyi xəyalına belə gətirməməlidir.
İşğal altında olan torpaqlarımız yüzlərlə qəhrəman şəhidlərimizin, əsgər və zabitlərimizin, qazilərimizin qanı və canı bahasına azad edilib. Onlarla mülki vətəndaşlarımız xəyanətkar düşmənin döyüş cəbhələrindən uzaqlarda yerləşən ərazilərə raket zərbələrindən həlak olub. 27 Sentyabr - Anım Günü bizə, hər bir Azərbaycan övladına, Vətən müharibəsində itirdiyimiz insanları xatırladacaq, onların xatirəsi daim qəlbimizdə yaşayacaq.