Lənkəran, 2 oktyabr, Bağır Əliyev, AZƏRTAC

Oktyabrın 1-də Nəcəf bəy Vəzirov adına Lənkəran Dövlət Dram Teatrında ötən mövsümün yekunları və yeni mövsümdə qarşıda duran vəzifələrə həsr olunmuş yığıncaq keçirilib.

AZƏRTAC-ın bölgə müxbiri xəbər verir ki, yığıncaqda çıxış edən teatrın direktoru Tofiq Heydərov ötən dövrdə COVID-19 pandemiyası səbəbindən Lənkəran teatrının kollektivinin də ölkənin digər teatr-konsert müəssisələri kimi öz fəaliyyətini karantin rejiminin tələblərinə uyğun davam etdirdiyini bildirib. Yaradıcılıq fəaliyyəti əsas etibarilə onlayn formatda davam etdirilsə də, zərurət yarandığı təqdirdə ənənəvi məşqlər də aparılıb, yaradıcı heyətin iş məhsuldarlığının artırılmasına diqqət yetirilib. Ötən dövrdə teatrın binasında cari təmir işləri görülüb, texniki avadanlıqlar saz vəziyyətə gətirilib.

T.Heydərov 44 günlük Vətən müharibəsində Müzəffər Ali Baş Komandan İlham Əliyevin qətiyyəti, Azərbaycan Ordusunun qəhrəmanlığı sayəsində cəbhədə qazanılan şanlı Zəfərin hər bir azərbaycanlı kimi, teatrın kollektivini də qürurlandırdığını, yeni yaradıcılıq uğurlarına sövq etdiyini söyləyib. Hərbi vətənpərvərlik mövzusunda qələmə alınmış səhnə əsərlərinə xüsusi önəm verən yaradıcı heyət Vətən müharibəsində də öz ənənəsinə sadiq qalaraq, sosial şəbəkə və platformalarda onlayn qaydada sistemli təbliğat işi qurub. Bu çərçivədə “İgid əsgər, möhkəm dayan!”, “Əziz, doğma Şuşamız”, “Qarabağ bizimdir!”, “Qarabağ Azərbaycandır”, “Müzəffər Ali Baş Komandan” başlıqlı ədəbi-bədii audiokompozisiyalar hazırlanıb, onların şəhər və kəndlərdə səsləndirilməsi təmin edilib.

Qeyd olunub ki, “Nizami Gəncəvi İli” çərçivəsində Mədəniyyət Nazirliyi və Azərbaycan Teatr Xadimləri İttifaqının təşkilatçılığı ilə keçirilən “Sənsiz” bədii qiraət müsabiqəsində Lənkəran teatrının aktrisaları Gülər Kərimova münsiflər heyətinin qərarı ilə diplom və pul mükafatı, Vəfa Hacızadə isə diplomla təltif olunub.

Bir neçə ildir ki, teatr mövsümünün açılış və bağlanış mərasimləri doğma səhnədən kənarda (Biləsuvar, Neftçala, Lerik, Yardımlı rayonlarında) keçirilir. Karantin qaydalarına uyğun olaraq, iyulun 16-da Astaranın Burzubənd kəndində açıq məkanda C.Cabbarlının “Vəfalı Səriyyə, yaxud göz yaşı içində gülüş” tamaşası ilə 130-cu mövsümə yekun vurulub.

Teatrın direktoru bildirib ki, kollektivlə birgə bir neçə ay öncə Ağdam Dövlət Dram Teatrının qonağı olub. Görüş zamanı iki teatr arasında yaradıcılıq əlaqələri müzakirə edilib, qarşılıqlı əməkdaşlığa dair niyyət sazişi imzalanıb. Sazişə əsasən, teatrlar arasında yaradıcı münasibətin qurulması, qarşılıqlı qastrol səfərlərinin təşkili, rejissor və aktyor mübadiləsi, texniki dəstək, yaradıcı görüşlər və təcrübə mübadiləsi nəzərdə tutulur.

Diqqətə çatdırılıb ki, Nazirlər Kabineti yanında Operativ Qərargah teatrların fəaliyyətinin bərpa edilməsinə icazə verdiyi üçün yaxın günlərdə rejissor, Xalq artisti F.Məhərrəmovun rəhbərliyi ilə osetin dramaturqu G.Xuqayevin “Varlı ev” tamaşasının məşqlərinə başlamaq nəzərdə tutulub. Hazırda teatrda gənc rejissor T.Abdullayevin X.Əlibəylinin şeirləri əsasında uşaqlar üçün səhnələşdirdiyi “Ləpələrin nağılı” tamaşasının son məşqləri gedir. Teatrın kollektivi, həmçinin Mədəniyyət Nazirliyi və Teatro.az sənət portalının elan etdiyi “4.4 Qısa Tamaşalar Festivalı”na qatılacaq. Bu məqsədlə teatrın baş rejissoru, Əməkdar incəsənət xadimi Oruc Qurbanov Karel Çapekin “Ana” faciəsini tamaşaya hazırlayır.

Yığıncaqda çıxış edənlər yeni teatr mövsümündə qarşıda duran vəzifələrlə bağlı təkliflərini bildiriblər.

Qeyd edək ki, Lənkəran Dövlət Dram Teatrı yeni mövsümə oktyabrın ikinci yarısında C.Cabbarlının “Vəfalı Səriyyə və ya göz yaşı işində gülüş” tamaşası ilə başlayacaq.