QAN YADDAŞI
20 Yanvar faciəsinin qurbanları Moldovada da anılıb
Kişineu, 21 yanvar, AZƏRTAC
Kişineunun “Kortyard Mariott” otelinin konfrans zalında 20 Yanvar faciəsinin qurbanlarının xatirəsinə həsr olunmuş elmi-praktik konfrans keçirilib.
AZƏRTAC xəbər verir ki, tədbir Azərbaycanın Moldovadakı səfirliyi və Moldova Azərbaycanlılar Konqresinin birgə təşkilatçılığı ilə baş tutub. Tədbirdə Azərbaycan diasporunun nümayəndələri, rəsmilər, bu ölkədə diplomatik korpusun təmsilçiləri, ictimai-siyasi xadimlər, tələbələr və yerli KİV nümayəndələri iştirak ediblər.
Əvvəlcə 20 Yanvar şəhidlərinin əziz xatirəsi bir dəqiqəlik sükutla yad edilib.
Sonra Moldova Azərbaycanlılar Konqresinin müavini Ramiz Ənsarov Azərbaycanın bu ölkədəki səfiri Qüdsi Osmanovun konfrans iştirakçılarına müraciətini oxuyub. Müraciətdə səfir qeyd edir ki, 20 Yanvar Azərbaycan xalqının milli iradəsinin əyilməməzliyinin rəmzidir. “20 Yanvar faciəsini törətməklə Sovet rəhbərliyi Azərbaycan xalqının iradəsini və qürurunu sındırmaq istəyirdi. Lakin buna nail ola bilmədi. Güclü iradəyə malik olan xalqımız bütün dünyaya göstərdi ki, tarixin ən əlamətdar məqamlarında yumruq kimi birləşib, milli maraqlarını müdafiə etməyə qadirdir. Bunu bir daha 44-günlük Vətən müharibəsində də xalqımız nümayiş etdirdi. Prezident İlham Əliyevin ətrafinda bir yumruq kimi birləşən xalq öz ərazi bütövlüyünü bərpa etdi, Azərbaycanın ayrılmaz hissəsi olan Qarabağı işğaldan azad etdi”,- deyə səfirin müraciətində qeyd edilib.
R.Ənsərov öz çıxışında yanvarın 19-dan 20-nə keçən gecə baş verən qanlı hadisələrdən söz açıb və qeyd edib ki, Moldova Azərbaycan icması xaricdə yaşayan gənc azərbaycanlıların xalqımızın tarixində bütün əlamətdar hadisələrin hörmət və ehtiramla anması, xatırlaması üçün böyük işlər aparır.
Moldova Parlamentinin deputatı, Moldova Prezidentinin seçildiyi “Hərəkət və həmrəylik” partiyasının sədri İqor Qrosu çıxışında Sovet İttifaqının dağılmasından sonra postsovet ölkələrindəki proseslərə toxunub, Moldova və Azərbaycanın müstəqilliyinin formalaşma tarixinin oxşarlığını və hər iki ölkənin suverenliyinin layiqli oğullarının canı bahasına əldə olunduğunu qeyd edib.
Moldovada Qaqauziya icmasının rəhbəri Nikolay Terzi öz çıxışında ulu öndər Heydər Əliyev ilə görüşünü xatırlayıb, Azərbaycan xalqını ərazi bütövlüyünü bərpası münasibətilə təbrik edib və Azərbaycan və qaqauz xalqları arasında səmimi dostluq və qardaşlıq münasibətlərini vurğulayıb. O qeyd edib ki, qaqauz xalqı hər zaman Azərbaycan xalqının kədər və sevincini bölüşür.
Moldovada Dağ yəhudilər Assosiasiyasının nümayəndəsi Roman Aronov qeyd edib ki, Azərbaycan xalqı öz cəsarəti və əyilməməzliyi ilə müstəqilliyini qazanıb. O, tarixboyu iki xalqın başına gələn sınaqlardan bəhs edərək, Azərbaycan və yəhudi xalqları arasındakı dostluğa da toxunub.
Dağlıq Qarabağ münaqişəsinə həsr olunmuş kitabların müəllifi Dmitri Tereburke isə qeyd edib ki, XX əsrin 80-ci illərin sonu 90-cı illərin əvvəllərində Azərbaycanda gedən proseslər Sovet İttifaqında milli hərəkatın başlanğıcını qoyub və İttifaqın sonunu təyin edib. O, Azərbaycan xalqını Qarabağ münaqişəsinin həlli münasibətilə təbrik edib və bu hadisənin bütün bölgə üçün əhəmiyyətini qeyd edib.
Həmçinin tədbirdə Konqresin nümayəndələri Maarif Rəhimov, Zamir Qubadov və Ağası Məmmədli çıxış ediblər. Çıxışçılar tədbir iştirakçılarına şahidi olduqları dəhşətli 20 Yanvar hadisələrindən bəhs ediblər. Qeyd olunub ki, hər bir azərbaycanlı üçün bu gün, eyni zamanda, dövlətçilik naminə qürur, əyilməməzlik və fədakarlıq rəmzidir.
Tədbirin sonunda konfrans iştirakçılarına 20 Yanvar hadisələrinə həsr olunmuş sənədli film nümayiş olunub.
Faciə qurbanlarının xatirəsinə ehsan verilib.
Tədbir Moldova KİV-də geniş işıqlandırılıb.
Emil Hüseynli
AZƏRTAC-ın xüsusi müxbiri
Kişineu