QAN YADDAŞI
20 Yanvar şəhidləri xalqımızın qəhrəmanlıq salnaməsinə yeni parlaq səhifə yazdılar
Bakı, 20 yanvar, AZƏRTAC
“1990-cı ilin 20 Yanvarı Azərbaycan xalqının tarixinin ən faciəli, qara səhifəsi, həm də qəhrəmanlıq, rəşadət səhifəsidir. Biz o günlərdən nə qədər çox uzaqlaşsaq, həmin günlərin Azərbaycan xalqının tarixində necə mühüm yer tutduğunu bir o qədər dərk edəcəyik və bəlkə də gələcək nəsillər buna daha doğru, daha düzgün qiymət verəcəklər. Ancaq bir şey həqiqətdir ki, 1990-cı ilin 20 Yanvarı Azərbaycan xalqının həyatında dönüş mərhələsi, dönüş nöqtəsi olmuşdur”.
Ulu Öndər Heydər Əliyevin bu müdrik kəlamları 1990-cı il 20 Yanvar hadisələrində mərd oğul və qızlarımızın qəhrəmanlığına verdiyi yüksək qiymətdir. Xalqın birliyi və milli ləyaqət hissinin başdan–ayağa qədər silahlanmış imperiya ordusuna qalib gəldiyi qanlı 20 Yanvar hadisələrindən 33 il keçir. Ulu Öndərin qeyd etdiyi kimi, 1990-cı ilin 20 Yanvarı Azərbaycan xalqının həyatında dönüş mərhələsi, dönüş nöqtəsi oldu.
Bu fikirləri AZƏRTAC-a açıqlamasında Demokratiya və İnsan Hüquqları Komitəsinin sədri, hüquq üzrə fəlsəfə doktoru Çingiz Qənizadə bildirib.
Hüquq müdafiəçisi deyib ki, Vətənimizin müdafiəsi, bir qarış belə torpağımızı düşmənə qıymayan və bu yolda sinələrini sipər edən şəhidlərimiz həyat durduqca yaşayır, yetişən gənc nəslin vətənpərvərlik ruhunda böyümələrində örnək olurlar. Dövlətimiz şəhidlərimizə daim yüksək diqqət və qayğı göstərir, onların adlarını əbədiləşdirir, ailə üzvlərinin sosial müdafiəsinin gücləndirilməsi istiqamətində bütün vasitələrdən istifadə edir. Hər il Prezident İlham Əliyev tərəfindən əhalinin sosial müdafiəsinin gücləndirilməsi ilə bağlı tədbirlər paketinin qəbul edilməsi artıq ənənə halı alıb. 2023-cü ildə elan edilən sosial tədbirlər sırasında 20 Yanvar şəhidlərinin ailələrinin, ümumiyyətlə, bütün şəhidlərimizin sosial təminatına yönəlmiş Prezident Fərmanı böyük rəğbətlə qarşılanıb. Fərmanda 20 Yanvar şəhidlərinin ailələri üçün Azərbaycan Respublikası Prezidentinin təqaüdünün aylıq məbləği 2023-cü il yanvarın 1-dən 500 manatdan 600 manata qaldırılıb. 20 Yanvar hadisələrinin 33-cü ildönümü ərəfəsində belə bir addımın atılması istiqlaliyyət yolunda canını qurban verənlərin ailə üzvlərinin sosial təminatının daha yaxşılaşdırılmasına xidmət edir. Eyni zamanda , şəhidlərimizin əziz xatirəsinin daim möhtərəm Prezidentimiz və dövlətimiz tərəfindən uca tutulduğunun bariz nümunəsidir. 20 Yanvar şəhidləri tarixdə azadlıq və demokratiya şəhidləri kimi qalıb. Bu, xalqın yaddaşında xüsusi yer tutan tarixi bir qəhrəmanlıq səhifəsi olmaqla yanaşı, Qarabağın Ermənistana birləşdirilməsinə qarşı Azərbaycan xalqının qəhrəmanlıq simvoludur.
Komitə sədri vurğulayıb ki, 20 Yanvar faciəsi qan yaddaşımız olmaqla yanaşı, həm də xalqımızın qürur mənbəyidir. Həmin dəhşətli hadisələri xalqımız 33 ildən sonra - bu gün də həm ağrı-acı, həm də qürur hissi ilə yaşayır: “Söz yox ki, həmin hadisələrdə mərd oğul və qızlarımız Azərbaycanın azadlığı və müstəqilliyi uğrunda şəhidlik zirvəsinə ucaldılar. Lakin xalqın iradəsi sınmadı və milli ruhu sarsılmadı. İmperiyanın silahlanmış ordusu qarşısında təslim olmayan ümummilli mənafelərin müdafiəsi naminə canlarından keçərək şəhidlik zirvəsinə ucalmış Vətən övladları misilsiz fədakarlıqları ilə xalqımızın qəhrəmanlıq salnaməsinə yeni parlaq səhifə yazdılar.
Ç.Qənizadə həmin hadisələrin iştirakçısı kimi o müdhiş gecəni xatırladaraq deyib: “Həmin o soyuq qış gecəsində Bakının küçə və meydanları əliyalın insanlarla dolu idi. O gecə küçə və meydanlara çıxanların hamısını bir amal birləşdirirdi: “Torpaqdan pay olmaz, öldü var, döndü yoxdur”. Hər bir kəsin ən böyük arzusu Azərbaycanı müstəqil, azad görmək idi. Rus imperiyası qadağan olunmuş odlu silahlarla əliyalın insanları gülləbaran etsə də, tankların, zirehli maşınların altında əzsə də, Azərbaycanın üzərinə azadlıq günəşi doğurdu. Şəhidlərimiz bu azadlığı öz qanları ilə qazandı. Mərd oğul və qızlarımızın bu qəhrəmanlığı tariximizdə dönüş nöqtəsi oldu və çox keçmədən Azərbaycan XX əsrdə ikinci dəfə müstəqilliyinə qovuşdu. Şəhidlərimiz tarixə azadlıq müjdəsi gətirdilər”.
Həmin vaxtdan başlayaraq, Azərbaycan istiqlaliyyət, azadlıq yolunda mətin və qətiyyətli addımlarla irəlilədiyini diqqətə çatdıran hüquq müdafiəçisi ölkəmizin simasının müqayisəolunmaz dərəcədə dəyişdiyini bildirib: “Xalqın təkidli xahişi ilə ölkəyə rəhbərlik edən Ulu Öndər Heydər Əliyevin həyata keçirdiyi islahatlar nəticəsində Azərbaycanın müstəqilliyi daha da möhkəmləndirildi və əbədiləşdirildi. Bu siyasi kursu layiqincə davam etdirən Prezident İlham Əliyevin siyasi uzaqgörənliyi və qətiyyəti sayəsində torpaqlarımız Ermənistanın işğalından tamamilə azad edildi. Bu gün 90-cı ilin Bakısından, 33 il əvvəlki Azərbaycandan əsər-əlamət qalmayıb. Bu gün Azərbaycan dünyada qalib ölkə kimi tanınır. İmzalar içində imzamız, bayraqlar sırasında bayrağımız var. Ölkəmiz dünyada söz sahibinə çevrilib”.
Ç.Qənizadə deyib ki, bu gün hər birimizin müqəddəs ziyarətgahına çevrilmiş Şəhidlər xiyabanı xalqımızın illərlə məruz qaldığı böyük faciə ilə yanaşı, yenilməz iradəsinin rəmzidir. Hər il 20 Yanvar günü Şəhidlər xiyabanına insan seli axışır. Məhz bu xiyabanda uyuyanların fədakarlığı nəticəsində xalqımız azadlıq arzusuna qovuşub.