İQTİSADİYYAT
ADA Universitetində “Big Data” Tədqiqat Mərkəzi fəaliyyətə başlayıb
Bakı, 15 dekabr, Nihad Budaqov, AZƏRTAC
BP və tərəfdaşlarının dəstəyi ilə Azərbaycanda ilk dəfə ADA Universitetində “Big Data” Tədqiqat Mərkəzi fəaliyyətə başlayıb.
AZƏRTAC xəbər verir ki, dekabrın 15-də bu münasibətlə keçirilən tədbirdə ADA Universitetinin rektoru, professor Hafiz Paşayev mərkəzin yaradılmasının ölkənin akademik cəmiyyəti üçün çox vacib olduğunu deyib: “Mərkəz bütün sahələr üzrə tədqiqat bacarıqlarının genişləndirilməsinə və tədqiqat ekosisteminin inkişaf etdirilməsinə kömək edəcək”.
Hafiz Paşayev qeyd edib ki, İnformasiya Texnologiyaları və Mühəndislik İnstitutu iş sahəsi və lazımi hesablama avadanlıqları ilə təchiz olunan laboratoriya yaratmaqla mərkəzin fəaliyyətə başlamasında əsas rol oynayıb: “Əminəm ki, mərkəz akademik cəmiyyət və sektorlar arasında olan qarşılıqlı faydalı əməkdaşlığı daha da möhkəmləndirəcək”.
BP-nin Azərbaycan, Gürcüstan və Türkiyə üzrə regional prezidenti Qəri Counz deyib: “BP və tərəfdaşları bu yeni “Big Data” Mərkəzini açmaqdan məmnunluq duyur. Mərkəz bu qəbildən olan ilk və mən deyərdim ki, unikal tədqiqat ocağıdır. Bu, ölkədə yeni sənaye sahəsinin inkişafına təkan verəcək. İnanırıq ki, bu, ölkənin qlobal “big data” bazarının bir hissəsinə çevrilməsi və böyükhəcmli məlumatların emalında regionda aparıcı yer tutması üçün geniş imkanlar yaradır”.
“Ən əsası isə bu mərkəz ölkədə data üzrə ixtisaslaşmış alimlərin, data və informasiya üzrə mühəndislərin və “big data”nın təhlili üzrə peşəkar mütəxəssislərin yetişdirilməsinə təkan verəcək. Biz Təhsil Nazirliyi və ADA Universiteti ilə qurduğumuz əməkdaşlıqdan məmnunuq. Biz birlikdə data elmləri üzrə təcrübə də daxil olmaqla bir sıra sahələrdə iş bilgisinin, bacarıqların və səriştələrin inkişaf etdirilməsinə dəstək olmaq üçün çox işlər görə bilərik”, - deyə Q.Counz əlavə edib.
Qeyd edilib ki, ötən ildən həyata keçirilən bu layihə BP və tərəfdaşlarının ölkədə təhsilin inkişafına və iş bilgisinin artırılmasına dəstəyinin bir hissəsidir. Layihənin başlamasından ötən bir il ərzində data təhlili üzrə kitabxana yaradılıb, aparat və proqram təminatı daxil olmaqla bütün avadanlıqlar və resurslar, eləcə də, 30 iş terminalı quraşdırılıb, işçi heyətə təlim keçirilib və hazırda mərkəz fəaliyyət göstərməyə tam hazırdır.
ADA Universitetinin İnformasiya Texnologiyaları və Mühəndislik İnstitutunun dekan müavini Araz Yusubov isə mərkəzin ölkə və region üçün əhəmiyyətindən danışıb.
Bildirilib ki, ADA Universitetində “Big Data”nın Təhlili və data elmi üzrə yeni magistr dərəcəsi proqramı da fəaliyyətə başlayacaq. Bu da ölkənin data mütəxəssislərinə və “big data” üzrə analitiklərə olan ehtiyaclarının qarşılanmasına xidmət edəcək. Mərkəz, həmçinin daha geniş təsirə malik olacaq. O, dövlət təşkilatları və özəl sektorun təmsilçiləri üçün açıq olacaq və onlara öz resurslarından istifadə imkanı yaradacaq.
Layihənin icrasına 2016-cı ilin oktyabr ayında başlanılıb və ADA Universiteti tərəfindən həyata keçirilib. Layihənin dəyəri 410 min ABŞ dollarıdır.