AZƏRTAC-ın xəbər verdiyi kimi, Azərbaycan Uşaqlar Birliyinin “Təbəssüm” rəqs kollektivi iyulun 15-dən Krımdakı “Artek” Beynəlxalq uşaq mərkəzindədir və “Dünyanı yaxşılığa doğru dəyişək!” devizi ilə keçirilən Beynəlxalq festivalda iştirak edir. Qara dəniz İqtisadi Əməkdaşlıq Təşkilatının (QİƏT) himayəsi ilə keçirilən bu foruma 25 ölkənin elçiləri gəlmişlər. Diqqətəlayiq haldır ki, iyulun 28-də keçirilmiş Sülh günündə “Artek”in himninin ifa edilməsi Azərbaycanın gənc nümayəndələrinə etibar olunmuşdur.

Ölkəmizin Ukraynadakı səfiri Tələt Əliyev AZƏRTAC-ın müxbirinə bu barədə məlumat verərək demişdir: “Sözün düzü, müstəqil Azərbaycanın yeni, istedadlı nəslini təmsil edən uşaqlarımızın çıxışını gördükdə özümü çox xoşbəxt sandım və böyük qürur duydum. Mübaliğəsiz deyim ki, uşaqlarımız yaradıcılıq müsabiqələrində də, disputlarda da, mətbuat konfranslarında da xüsusilə fərqlənirdilər. Azərbaycanın Dövlət Himni səsləndikdə isə 25 gənc istedadımız, hamısı bir nəfərtək, himnimizi ürəkdən ifa etdi”.

Gözoxşar Azərbaycan milli geyimində olan uşaqlar öz məharəti və gözəl çıxışları ilə “Ümid və Xeyirxahlıq” Ümumukrayna Xeyriyyə Fondu Himayədarlar Şurasının başçısı, Ukrayna Prezidentinin xanımı Lyudmila Kuçmanı, bu ölkənin Dövlət Ailə və Gənclər İşləri Komitəsinin sədri Valentina Dovjenkonu, xarici səfirləri, festivalın iştirakçılarını və qonaqlarını heyran etdilər. Səfir T.Əliyevin sözlərinə görə, Azərbaycanın gənc elçiləri öz yaradıcılığı və fəallığı ilə uşaq diplomatiyasının inkişafına təkan verdilər. Sülh günü iştirakçılarının qəbul etdikləri Müraciət məhz ölkələr arasında dostluq münasibətlərinin inkişafına köməyə, sülhün və sabitliyin dəstəklənməsinə həsr olunmuşdur. Azərbaycan “Artek”də açılmış sərgidə də layiqincə təmsil edilmişdir. Ekspozisiyamızda xalq sənəti məmulatları, xalçalar, Qobustanın qayaüstü təsvirlərinin fraqmentləri və digər əşyalar tamaşaçılara xoş təsir bağışlamışdır.

Səfir Tələt Əliyev “Artek” Beynəlxalq uşaq mərkəzinin baş direktoru Valeri Palçuka xatirə olaraq Azərbaycan töhfələri bəxş etdi.

Festival avqustun 4-də başa çatacaqdır.