CƏMİYYƏT
Ağacların kəsilməsi və qurudulması ilə bağlı ən az müraciət Qaradağ və Xəzər rayonlarından daxil olur
Bakı, 22 iyun, Göyçək Mahmudlu, AZƏRTAC
İyunun 22-də Ekologiya və Təbii Sərvətlər Nazirliyində (ETSN) yaşıllıqların mühafizəsinə həsr olunmuş mətbuat konfransı keçirilib.
AZƏRTAC xəbər verir ki, nazirliyin mətbuat xidmətinin rəhbəri İradə İbrahimova ağacların tək-tək və ya kütləvi şəkildə kəsilməsi faktlarının olduğunu təəssüflə qeyd edib. O, yaşıllıqları məhv edənlərə qarşı sərt tədbirlərin, hətta sanksiyaların həyata keçirilməsinin vacibliyini diqqətə çatdırıb: “Əsasən Bakıda bəzi sahibkarlar, ayrı-ayrı şəxslər tərəfindən qanunsuz ağac kəsintisinə yol verilir. Tikinti şirkətləri yaşıllıq sahələrinə həssas münasibət göstərmir, tikinti və abadlaşdırma zamanı yaşıllıqların yerləşdiyi əraziləri nəzərə almırlar. Ona görə də bu sahədə həm güclü təbliğat işinin aparılmasına, digər tərəfdən də tələbkarlığın, yəni, yaşıllıqların mühafizəsi sahəsində mövcud qanunvericilikdə dəyişikliklərin edilməsinə və daha sərt sanksiyaların tətbiqinə ehtiyac var. Bu balans və tarazlıq saxlanılmalıdır. Təbiətə, yaşıllığa israfçılıq prizmasından baxılması artıq dünyanın heç bir yerində qəbul edilmir. Artıq ölkəmizdə də ətraf mühitə qayğıkeş münasibət formalaşır. Amma təəssüf ki, bəzən yaşıllıqlara qarşı biganə, sevgisiz münasibətin də şahidi oluruq.
İnsanların ətraf mühitə, yaşıllıqlara münasibətinin dəyişdirilməsi üçün kütləvi informasiya vasitələri nümayəndələrinin və ictimaiyyətin dəstəyinə böyük ehtiyacımız var. Hesab edirik ki, yaşıllıqlara qarşı zərərverici münasibət göstərənlər ictimaiyyət tərəfindən qınaq obyektinə çevrilməli, onların biganəliyi ağaclara sevgi ilə əvəzlənməlidir. Uşaqdan böyüyədək yaşıllığın qorunmasına münasibət dəyişilməli, hər bir ağaca dəyər verilməli və məhəbbət göstərilməlidir”.
Mətbuat katibi bir ağacın yetişdirilməsi üçün minimum 30 il vaxt tələb olunduğunu, lakin bəzən etinasızlıq edildiyini, ağacların kəsildiyini və illərlə çəkilmiş zəhmətin bir an içərisində heç olduğunu vurğulayıb.
“Nazirliyin “Qaynar xətt”inə ağacların kəsilməsi və qurudulması ilə bağlı ən çox müraciət paytaxtın Nəsimi, Xətai, Suraxanı, Binəqədi, Sabunçu, Yasamal rayonlarından daxil olur. Ən az şikayətin daxil olduğu rayonlar isə Qaradağ və Xəzərdir.
Respublikanın bölgələrindən isə Kürdəmir, İmişli, Qazax, Qəbələ, İsmayıllı, Quba rayonlarından ağac kəsintisi halları ilə bağlı daha çox şikayət alırıq”, - deyə İ.İbrahimova bildirib.
Mətbuat xidmətinin rəhbəri hər kəsi yaşıllıqların mühafizəsində birliyə dəvət edib.
ETSN-in ekoloji təbliğat şöbəsinin ictimaiyyətlə əlaqələr və təbliğat sektorunun müdiri Umayra Tağıyeva yaşıllıqları şəxsi mənafelərinə qurban verənlərə tətbiq edilən cərimələrin miqdarının kifayət qədər olmadığını deyib və məbləğin artırılmasının vacibliyini qeyd edib. O bildirib ki, yaşıllıqların məhv edilməsinə görə cərimələrin dəfələrlə artırılması ilə bağlı nazirlik tərəfindən təkliflər hazırlanır.
U.Tağıyeva hazırda qanunvericilikdə fiziki şəxslər üçün cərimələrin 2200-3000, vəzifəli şəxslər üçün 5000-7000, hüquqi şəxslər üçün isə 25000-45000 arasında dəyişdiyini diqqətə çatdırıb.
Sonda kütləvi informasiya vasitələrinin nümayəndələrini maraqlandıran suallar cavablandırılıb.