SİYASƏT


Ağalar Vəliyev: Ulu öndər Heydər Əliyev liderlik funksiyasını hər zaman ləyaqətlə həyata keçirib

Bakı, 14 iyul, AZƏRTAC

Bu gün yeni tariximizin yaradıcısı, müstəqil dövlətçiliyimizin banisi, dahi siyasətçi, böyük dövlət xadimi Heydər Əliyevin Azərbaycanda siyasi hakimiyyətə gəlişinin 51-ci ildönümü tamam olur.

Ulu öndər Heydər Əliyev həm Sovetlər Birliyi dövrünün siyasi-ideoloji çətinlikləri, həm də Azərbaycanda müstəqillik mərhələsinin başlanğıc illərinin mürəkkəblikləri şəraitində hər zaman liderlik funksiyasını ləyaqətlə həyata keçirib. Dövlət rəhbəri olaraq fəaliyyət göstərdiyi 35 ilə yaxın bir dövrdə Azərbaycanın bütün problemlərinin həlli və ümummilli ideallarının gerçəkləşməsi onun adı ilə üzvi surətdə bağlıdır.

AZƏRTAC xəbər verir ki, bu fikirləri Milli Məclisin deputatı Ağalar Vəliyev ulu öndər Heydər Əliyevin birinci dəfə Azərbaycanda siyasi hakimiyyətə gəlişinin ildönümü ilə bağlı bildirib.

Deputat qeyd edib ki, Heydər Əliyevin inkişaf strategiyasının tarixi onun 1969-cu ildə Azərbaycan rəhbərliyinə gəlməsindən başlayır. Həmin il iyulun 14-də keçirilən tarixi plenumda Heydər Əliyev Azərbaycan Kommunist Partiyası Mərkəzi Komitəsinin birinci katibi seçilib və bununla da ölkəmiz sosial-iqtisadi inkişafında yeni epoxaya qədəm qoyub.

Bu dövrədək zəngin iqtisadi potensialının və təbii sərvətlərinin olmasına baxmayaraq Azərbaycan keçmiş İttifaq respublikaları arasında bütün göstəricilərə və yaşayış səviyyəsinə görə axırıncı yerlərdən birini tuturdu. Ümummilli Liderin о zaman siyasi rəhbərliyə gəlişi sovet rejiminin sərt qanunlarına baxmayaraq, Azərbaycanda bütün sahələrdə hərtərəfli tərəqqiyə yol açdı. Tarixi anlamda qısa zaman kəsiyini əhatə edən 1969-1982-ci illərdə Ulu Öndərin dahiyanə zəkası, titanik əməyi və çoxşaxəli fəaliyyəti sayəsində Azərbaycan inkişaf etmiş respublika kimi İttifaq tərkibində öncül sıralara yüksəldi.

O dövrün bəzi statistik göstəricilərinə nəzər salsaq görərik ki, gələcəyə hesablanmış 250-dən çox strateji obyekt istifadəyə verilib və bununla da iri sənaye müəssisələrinin sayı 1048-ə çatdırılıb. Bütövlükdə 14 il ərzində respublikada əvvəlki yarım əsrdəki qədər sənaye məhsulu istehsal olunub, sənaye istehsalı 2,7 dəfə, kənd təsərrüfatı 2,5 dəfə, milli gəlir 2,6 dəfə artıb və Azərbaycan iqtisadiyyatının inkişafına 7,2 milyard manatlıq, yaxud əvvəlki 50 ildəkindən 4,5 dəfə çox kapital qoyulub.

Heydər Əliyevi səciyyələndirən ən parlaq xüsusiyyətlərdən biri də onun hər zaman təhsilin, səhiyyənin, elmin, mədəniyyətin və bütövlükdə humanitar sahələrin inkişafına qayğı ilə yanaşması idi.

Təsadüfi deyil ki, məhz 1969-1982-ci illərdə Azərbaycanın bu sahələrdə intibahının əsası qoyulub. Ulu Öndərin İttifaq dönəmində respublikaya rəhbərliyi illərində ən böyük xidmətlərindən biri də xalqımızın milli və mənəvi dəyərlərinin qorunub saxlanılması ilə yanaşı azərbaycançılıq ideologiyasının formalaşması üçün möhkəm zəmin yaratması idi. Bunun bariz nümunəsi kimi, 1978-ci ildə qəbul olunmuş Azərbaycan SSR-nin Konstitusiyasında Sovetlər Birliyinin digər respublikalarından fərqli olaraq Azərbaycan dilinin dövlət dili kimi təsbit edilməsini vurğulamaq olar.

Miqyasına görə Azərbaycanın şanlı quruculuq salnaməsinin ən dolğun və şərəfli səhifələrini təşkil edən 1969-1982-ci illərdə Ümummilli Lider müdrik uzaqgörənliklə hazırda dünya iqtisadiyyatına sürətlə inteqrasiya edən müstəqil Azərbaycanın möhkəm iqtisadi bünövrəsini yaratdı.

A.Vəliyev bildirib ki, ulu öndərimiz Heydər Əliyevin əsasını qoyduğu sosial-iqtisadi inkişaf strategiyasının Prezident İlham Əliyev tərəfindən son 17 il ərzində dünyanın qlobal çağırışlarına uyğun olaraq uğurla davam etdirilməsi Azərbaycanı Avratlantik məkanda mühüm strateji mərkəzə, Cənubi Qafqaz regionunun liderinə, sürətlə tərəqqi edən, beynəlxalq aləmdə böyük nüfuzu olan, transmilli layihələri reallaşdıran və mötəbər tədbirlərə ev sahibliyi edən qüdrətli dövlətə çevirib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.