REGİONLAR


Ağsu rayonunun Qəşəd kəndində su təchizatı sisteminin açılış mərasimi keçirilib VİDEO

Ağsu, 29 iyun, Adil Ağayev, AZƏRTAC

Yaponiya hökumətinin maliyyə dəstəyi ilə həyata keçirilən “Ağsu rayonunun Qəşəd kəndində su təchizatı sisteminin tikintisi” layihəsi başa çatıb. Ümumi dəyəri 82 min 747 ABŞ dolları olan layihə kənddə sakinlərin suya olan ehtiyaclarının ödənilməsini təmin edəcək.

Layihəyə əsasən Qəşədin şimalından, dağlardakı çeşmələrdən götürülən su 10 kilometrlik borularla yaşayış məntəqəsində qurulan 30 tonluq anbara gətirilir. Buradan isə ayrı-ayrı məhəllələrdə tikilən 3 bulağa və 79 paylayıcı nöqtəyə axıdılır.

AZƏRTAC xəbər verir ki, iyunun 29-da kənddə layihənin açılış mərasimi keçirilib.

Mərasimdə iştirak etmək üçün Ağsuya səfər edən Yaponiyanın Azərbaycandakı səfiri Teruyuki Katori əvvəlcə rayon icra hakimiyyətinin başçısı Ənvər Seyidəliyevlə görüşüb. Görüşdə qonağa Ağsu rayonu, onun iqtisadiyyatının əsas sahələri, ixracyönümlü məhsulları, sosial-iqtisadi inkişafı barədə ətraflı məlumat verilib. Azərbaycan-Yaponiya münasibətlərinin yüksək səviyyədə olduğunu vurğulayan icra hakimiyyətinin başçısı həyata keçirilən sosial layihələrin iki ölkə arasında dostluq münasibətlərinin daha da möhkəmlənməsinə böyük töhfə olduğunu bildirib.

Səfir Teruyuki Katori Azərbaycana mart ayında gəldiyini, dünən Şəkidə keçirilən Beynəlxalq musiqi festivalında yapon qrupunun çıxışına tamaşa etdiyini vurğulayıb. O, Şəkidən gələrkən yolboyu meşəliklərə, təbii gözəlliklərə valeh olduğunu, üzüm bağlarını, zəmiləri, heyvan sürülərini görərkən insanların zəhmətsevərliyini təqdir etdiyini söyləyib.

Sonra Qəşəd kəndində su təchizatının açılış mərasimi keçirilib. Rayon icra hakimiyyətinin başçısı Ənvər Seyidəliyev, Milli Məclisin deputatı Tahir Kərimli çıxış edərək, layihənin yaşayış məntəqəsinin su təchizatının ödənilməsində əhəmiyyətindən söz açıblar.

Yaponiyalı diplomat layihənin başa çatması münasibətilə sakinləri təbrik edib. Bu il Yaponiya ilə Azərbaycan arasında diplomatik əlaqələrin yaradılmasının 25-ci ildönümünün tamam olduğunu vurğulayan səfir İnkişafa Rəsmi Yardım (ODA) proqramı çərçivəsində reallaşdırılan layihələrin Azərbaycanda infrastrukturun yaxşılaşdırılması, su təchizatı və digər sosial sahələr, kənd təsərrüfatı kimi geniş sektorları əhatə etdiyini bildirib.

Səfir Ağsuda artıq ikinci layihənin həyata keçirildiyini, ümumən indiyədək respublikada layihələr üzrə imzalanan müqavilələrin sayının 222-yə çatdığını, bu layihələrin ümumi dəyərinin 18 milyon 950 min 433 ABŞ dolları təşkil etdiyini qeyd edib.

Mərasimdə çıxış edən kənd sakinləri su təchizatı ilə əlaqədar çətinliklərin aradan qaldırılmasına göstərdikləri yardıma görə səfirə, Yaponiya hökumətinə təşəkkürlərini bildiriblər.

Qeyd edək ki, layihə üzrə qrant müqaviləsi Yaponiyanın Azərbaycandakı səfirliyi ilə “Vətəndaşların Əmək Hüquqları Müdafiəsi Liqası” Qeyri-Hökumət Təşkilatı arasında imzalanıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.