CƏMİYYƏT


Əmək və Əhalinin Sosial Müdafiəsi Nazirliyi ötən bir ildə 31 min şəhid ailəsi və müharibə əlilinə 38 min dövlət xidməti göstərib

Bakı, 11 oktyabr, AZƏRTAC

Bu günlərdə şanlı tarixin - 44 günlük Vətən müharibəsindəki Qələbənin ildönümünü, Ali Baş Komandan, Prezident İlham Əliyevin rəhbərliyi altında Azərbaycan Ordusunun və daim həmrəylik nümayiş etdirən Azərbaycan xalqının birgə qazandığı böyük Qələbəni qeyd edirik. Əlbəttə ki, bu qələbə hər bir müharibədə olduğu kimi şəhid və qazilərin hesabına qazanılıb. Prezident İlham Əliyev bütün dövlət qurumlarına tapşırıq verib ki, şəhid ailələrinin və müharibədə yaralanmış əsgərlərin qayğısına qalmaq lazımdır. Həmin kateqoriyadan olan vətəndaşlara göstərilən diqqət və qayğının ən böyük təzahürü isə həyata keçirilən silsilə tədbirlərdir. Postmüharibə dövründə Əmək və Əhalinin Sosial Müdafiəsi Nazirliyi 31 min şəhid ailəsi və müharibə əlilinə 38 min dövlət xidməti göstərib, həmçinin digər qurumlar da 10 minlərlə vətəndaşa dəstək olub. Bu dövr ərzində qazilərə və şəhid ailəsi üzvlərinə təyin olunan sosial ödənişlərin vaxtında və keyfiyyətli icrası həyata keçirilib. Prezident İlham Əliyevin ötən il imzaladığı müvafiq sərəncamlar da şəhid ailələri və müharibə əlillərinin müavinətlərinin ciddi şəkildə artırılmasına xidmət edir. Bunun nəticəsində şəhid ailələri və müharibə əlillərinə verilən təqaüdlər orta hesabla 2 dəfə artırılıb.

AZƏRTAC xəbər verir ki, bu sözləri əmək və əhalinin sosial müdafiəsi naziri Sahil Babayev deyib.

Nazir bildirib ki, təqaüdlərin vaxtında təyin olunması istiqamətində ciddi işlər aparılıb və bu günədək təxminən 17 min şəhid ailəsi və müharibə qazisinə müavinətlər və sosial ödənişlər təqdim edilib. Digər tərəfdən, şəhid ailələri və müharibə əlillərinin mənzillə təminatı proqramı da ciddi şəkildə genişləndirilib, Prezident İlham Əliyev bununla bağlı iki sərəncam imzalayıb. Təkcə bu il 3 min ailəyə fərdi evlərin təqdim edilməsinə dair tapşırıqlar verilib. Bu günə qədər 1700 şəhid ailəsi və müharibə əlilinə mənzil təqdim edilib. Sosial cəhətdən həssas vətəndaşlara verilən evləri də əlavə etsək, bu göstərici 2 mindən çoxdur. Bundan başqa, müharibə qazilərinə avtomobillərin verilməsi proqramı da davam etdirilir və cari ildə müharibədə döyüşən, Vətən müharibəsində əlillik qazanan qazilərə 144 avtomobil təqdim edilib. Onlarla, həmçinin sosial-psixoloji dəstəyin aparılması istiqamətində ciddi işlər görülür. Təxminən 10 min nəfərə təkcə Əmək və Əhalinin Sosial Müdafiəsi Nazirliyi tərəfindən sosial-psixoloji, psixokorreksiya işlərinə dair dəstək verilib".

S.Babayev qeyd edib ki, qazilərin ən müasir reabilitasiya vasitələri ilə təminatı digər vacib proqramlardandır: "Proqram çərçivəsində əlilliyi olan şəxslərə 35 min reabilitasiya vasitəsi təqdim edilib. Müxtəlif əzalarını itirmiş qazilər isə dünyanın ən müasir elektron protezləri ilə təmin olunublar. Elektron protezlərlə təmin olunmuş qazilərin sayı 145 nəfərdir. Aşağı ətrafların elektron protezlə təminatı ehtiyacı olanların əksəriyyəti üçün reallaşdırılıb və nəhayət, ötən həftə isə yuxarı ətrafların elektron protezlə təminatı proqramına başlanılıb. Hesab edirik ki, yaxın 2 ay ərzində amputasiya edilmiş bütün qazilərin protezlə təminatını başa vuracağıq".

Nazir əlavə edib ki, şəhid ailələri və qazilərə dövlət dəstəyinin əsas prioritetlərindən biri də onların məşğulluğu məsələsidir: "Müharibədə iştirak edən yaralanmış əsgərlər və zabitlərin, əlilliyi olan şəxslərin, şəhid ailələrinin məşğulluğu xüsusi diqqətdə saxlanılır və bu günədək həmin kateqoriyadan olan 7 min 800 nəfərdən çox vətəndaş məşğulluq tədbirlərinə cəlb edilib. Onların əksəriyyəti məhz özünüməşğulluq proqramı ilə əks olunub. Belə ki, 5 min 200 nəfər şəhid ailəsi və müharibə əlili özünüməşğulluq proqramı ilə təmin edilib. Bu proqram davamlı şəkildə icra olunur. Ümumiyyətlə sosial proqramlar prioritet olaraq şəhid ailələri və müharibə əlillərinə yönəlmiş şəkildə icra olunur. "Məşğulluq marafonu"na dövlət qurumları ilə yanaşı, özəl müəssisələr də maraq göstərib. Bu günədək təxminən 600 özəl və dövlət qurumu vakansiyalarını "Məşğulluq marafonu" üzrə yerləşdiriblər, 1000-dək qazi və şəhid ailəsi üzvü isə proqram çərçivəsində işə düzəliblər. "Məşğulluq marafonu" silsilə şəkildə icra olunur və proqramın icrası davamlı olaraq həyata keçiriləcək. Şəhid ailələri, əlilliyi olan şəxslər və müharibə iştirakçıları daim dövlətin diqqət mərkəzindədir və bu sahədə proqramlar Ali Baş Komandanın tapşırığına uyğun, mərhələli və əhatəli şəkildə icra edilir".

 

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.