Bakı, 14 mart, AZƏRTAC

Əmək və Əhalinin Sosial Müdafiəsi Nazirliyində “Azərbaycanda İnnovasiyanın və Məşğulluğun İnkişafı” layihəsinin icrası işlərinə və “Dövlət məşğulluq xidmətlərinin modernləşdirilməsində Azərbaycan Respublikasının Əmək və Əhalinin Sosial Müdafiəsi Nazirliyinə dəstək” tvinninq layihəsi çərçivəsində təlim səfərlərinin nəticələrinə dair “Məlumat mübadiləsi saatı” keçirilib.

AZƏRTAC xəbər verir ki, əmək və əhalinin sosial müdafiəsi naziri Səlim Müslümov tədbiri giriş sözü ilə açaraq, əmək resurslarının səmərəli məşğulluğuna şərait yaradılmasının sosial-iqtisadi inkişaf strategiyasının əsas prioritetlərindən olduğunu bildirib: “Əmək və Əhalinin Sosial Müdafiəsi Nazirliyi tərəfindən də aktiv məşğulluq tədbirləri ildən-ilə gücləndirilir. Həmin tədbirlərin davamı olaraq, bu ilin yanvar-fevral aylarında nazirliyin məşğulluq orqanlarının xətti ilə 27,5 min nəfər işsiz və işaxtaran münasib işlə təmin olunub, 473 nəfər üçün peşə hazırlığı və əlavə təhsil kursları təşkil olunub. Həmçinin son iki ayda 28,4 min nəfər gənc əmək bazarının tələblərinə uyğun düzgün peşə və ixtisas seçimlərinə köməklik göstərilməsi üçün peşəyönümü tədbirlərinə cəlb edilib”.

Qeyd olunub ki, aztəminatlı ailələrin yoxsulluqdan çıxışına və kiçik ailə biznesinə keçidinə imkan verən özünüməşğulluq proqramının icrası işləri də bu il daha geniş müstəvidə davam etdirilir: “Bu il proqramda iştirak etmək üçün müraciət edən, özünüməşğulluq fəaliyyəti üçün müvafiq potensialı olanlardan 2 min nəfərə yaxını kiçik biznesin təşkili və idarə olunması üzrə zəruri biliklərə yiyələnmək üçün təlim kurslarına cəlb olunub. Kursları bitirənlərdən qiymətləndirmə əsasında uğurlu biznes-planlara malik olanlar müəyyən edilməklə onlar kiçik ailə təsərrüfatlarını qurmaq üçün aktivlərlə təmin ediləcəklər. İl ərzində proqram çərçivəsində 6-7 min kiçik ailə təsərrüfatının yaradılması planlaşdırılıb”.

Aktiv məşğulluq tədbirlərinin təşkilində beynəlxalq əməkdaşlıq müstəvisində icra olunan layihələrin də əhəmiyyətini qeyd edən nazir deyib: “Gənclərin əmək bazarına inteqrasiyasında onların müasir iş axtarışı bacarıqlarına yiyələnmələri vacib amillərdən biridir. BMT İnkişaf Proqramı ilə birgə icra etdiyimiz “Azərbaycanda İnnovasiyanın və Məşğulluğun İnkişafı” layihəsi bu sahədə fəal dəstək rolu oynayır. Layihə ilk dəfə işaxtaran ali təhsilli gənclərə qabaqcıl beynəlxalq təcrübədən irəli gələn SYSLAB (Yenilik və Məşğulluq üzrə Sistem Laboratoriyası) metodologiyası üzrə sınanmış iş axtarışı bacarıqlarının aşılanması məqsədinə xidmət edir. Ötən dövrdə həmin layihə çərçivəsində Bakı, Sumqayıt, və Gəncə şəhərlərində, Masallı rayonunda fəaliyyət göstərən SYSLAB Təlim Mərkəzlərində ümumilikdə 640 gənc təlimlərə cəlb olunub və öyrədilən müasir iş axtarışı bacarıqları sayəsində onlardan 85 faizi müxtəlif müəssisələrdə münasib işlə təmin ediliblər. Bu ilin əvvəlindən qeyd olunan layihənin müddəti uzadılıb, Masallı və Gəncə şəhərlərində SYSLAB Təlim Mərkəzləri fəaliyyətini davam etdirir, digər bir sıra regionlarda da belə Mərkəzlərin təşkili nəzərdə tutulur”.

Ümumilikdə gənclərin məşğulluğunun təminatının diqqətdə saxlandığını qeyd edən nazir ötən il və cari ilin iki ayında nazirliyin xətti ilə münasib işlərlə təmin olunanlardan 33,3 faizinin, peşə hazırlığı təşkil olunanlardan 60 faizə yaxın hissəsinin gənclər olduğunu bildirib: “Eyni zamanda, keçən il özünüməşğulluq proqramında iştirak edənlərin 25,2 faizini gənclər təşkil edib. Bu il də proqram iştirakçılarından təqribən 30 faizinin gənclərdən ibarət olması nəzərdə tutulub”.

Nazir bildirib ki, son illərdə aparılan islahatların əsas hədəflərindən biri də dövlət məşğulluq xidmətlərinin fəaliyyətinin təkmilləşdirilməsi, həmin xidmətlərin müasir dünya praktikasında mövcud olan modern üsullar əsasında qurulmaqla səmərəliliyinin və əmək bazarında rolunun artırılmasıdır: “Bu sahədə “Dövlət məşğulluq xidmətlərinin modernləşdirilməsində Azərbaycan Respublikasının Əmək və Əhalinin Sosial Müdafiəsi Nazirliyinə dəstək” tvinninq layihəsi xüsusi əhəmiyyət kəsb edir. Həmin məqsədə nail olunmasında, məşğulluq xidmətlərinin əhatə dairəsinin genişləndirilməsi üçün institusional əsasların formalaşdırılmasında layihə öz dəstəyini göstərir. Həmin layihə eyni zamanda müvafiq sahədə qabaqcıl Avropa təcrübəsi ilə yaxından tanışlığa və bununla əlaqədar təlim səfərlərinin təşkilinə də imkan yaradıb. Bu günlərdə layihə çərçivəsində nazirliyin əməkdaşlarının Litva, Avstriya və İsveçə də təlim səfərləri həyata keçirilib”.

Nazir tədbirin həm “Azərbaycanda İnnovasiyanın və Məşğulluğun İnkişafı” layihəsi üzrə aparılan işlər və gələcək hədəflər, həm də qeyd olunan tvinninq layihəsi üzrə təlim səfərlərinin yekunları, səfərlər zamanı əldə olunan təcrübələr barədə məlumat mübadiləsinə imkan verdiyini qeyd edib.

Tədbirdə BMT-nin Azərbaycandakı rezident əlaqələndiricisinin müavini Alessandro Frakasetti “Azərbaycanda İnnovasiyanın və Məşğulluğun İnkişafı” layihəsi üzrə görülən işlərə dair təqdimatla çıxış edib.

Əmək və Əhalinin Sosial Müdafiəsi Nazirliyinin Məşğulluq siyasəti və demoqrafiya şöbəsinin müdir müavini Rəna Abdullayeva nazirliyin nümayəndələrinin “Dövlət məşğulluq xidmətlərinin modernləşdirilməsində Azərbaycan Respublikasının Əmək və Əhalinin Sosial Müdafiəsi Nazirliyinə dəstək” tvinninq layihəsi çərçivəsində Litva, Avstriya və İsveçə təlim səfərlərinin nəticələri, həmin ölkələrdə həyata keçirilən məşğulluq siyasəti və xidmətləri barədə məlumat verib.

Təqdim olunan məlumatlar əsasında müzakirələr aparılıb.