İQTİSADİYYAT


Ankarada AQTA sədri ilə Türkiyənin kənd təsərrüfatı və meşəçilik naziri arasında görüş keçirilib

Ankara, 29 sentyabr, AZƏRTAC

Azərbaycan Respublikası Qida Təhlükəsizliyi Agentliyinin (AQTA) sədri Qoşqar Təhməzlinin rəhbərlik etdiyi nümayəndə heyəti Türkiyəyə səfər edib. Səfər çərçivəsində Azərbaycan nümayəndə heyəti Türkiyənin kənd təsərrüfatı və meşəçilik naziri Bekir Pakdemirli ilə görüşüb.

AZƏRTAC xəbər verir ki, görüşdə qida təhlükəsizliyi sahəsində iki ölkə arasında əməkdaşlığın daha da genişləndirilməsi məqsədilə normativ hüquqi bazanın təkmilləşdirilməsi, “Azərbaycan Respublikası Hökuməti ilə Türkiyə Respublikası Hökuməti arasında baytarlıq sahəsində əməkdaşlıq üzrə Saziş”in və “Azərbaycan Respublikası Hökuməti ilə Türkiyə Respublikası Hökuməti arasında bitki mühafizəsi və karantini sahəsində əməkdaşlıq üzrə Saziş”in imzalanması prosesinin sürətləndirilməsi məsələləri ətrafında fikir mübadiləsi aparılıb. Ölkəmizdə heyvan sağlamlığının təmin olunması və baytarlıq nəzarəti sahəsində işin daha səmərəli təşkili, həmçinin heyvanların identifikasiyası sisteminin qurulması ilə bağlı məsələləri diqqətə çatdıran AQTA sədri Qoşqar Təhməzli qida təhlükəsizliyi, heyvan və bitki sağlamlığı sahələrində birgə əməkdaşlığın bundan sonra da genişləndiriləcəyini vurğulayıb.

Nazir Bekir Pakdemirli qeyd edib ki, Azərbaycan və Türkiyə arasında qida və kənd təsərrüfatı məhsulları üzrə ticarət əlaqələrinin genişləndirilməsi məqsədilə iki ölkənin müvafiq qurumları arasında səmərəli əməkdaşlıq qurulub.

Tərəflər qida məhsullarının idxal-ixracına nəzarət prosesini sürətləndirmək məqsədilə elektron sistemlərin uyğunlaşdırılması və elektron sertifikatların tanınması üzrə işlərin həyata keçirilməsi, qida məhsullarının izlənilməsi sahəsində Türkiyə təcrübəsinin öyrənilməsi istiqamətində müzakirələr aparıblar. Görüşdə, həmçinin Azərbaycanın işğaldan azad olunmuş rayonlarında heyvan xəstəliklərindən azad zonanın (HXAZ) yaradılması üzrə əməkdaşlıq, xəstəlikdən azad zona yaradılana qədər xüsusi karantin proseduralarını tətbiq etməklə diri heyvan və heyvan mənşəli məhsulların Türkiyəyə ixrac imkanlarının nəzərdən keçirilməsi məsələləri ətrafında fikir mübadiləsi aparılıb.

Görüş çərçivəsində “Azərbaycan Respublikası Hökuməti ilə Türkiyə Respublikası Hökuməti arasında qida təhlükəsizliyi sahəsində əməkdaşlıq haqqında Saziş”, “Azərbaycan Respublikasının Qida Təhlükəsizliyi Agentliyi ilə Türkiyə Respublikasının Kənd Təsərrüfatı və Meşəçilik Nazirliyi arasında qida təhlükəsizliyi sahəsində əməkdaşlıq haqqında Niyyət Bəyannaməsi”, eləcə də “Qida təhlükəsizliyi sahəsində əməkdaşlıq üzrə Birgə Fəaliyyət Planı” və bir sıra digər memorandum və saziş layihələri imzalanıb.

Sabir Şahtaxtı

AZƏRTAC-ın xüsusi müxbiri

Ankara

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.