MƏDƏNİYYƏT


Ankarada Avrasiya Yazıçılar Birliyində akademik İsa Həbibbəyli ilə görüş keçirilib

Ankara, 16 iyul, AZƏRTAC

Ankarada fəaliyyət göstərən Avrasiya Yazıçılar Birliyində (AYB) AMEA-nın vitse-prezidenti, Nizami Gəncəvi adına Ədəbiyyat İnstitutunun direktoru akademik İsa Həbibbəyli ilə görüş keçirilib.

AZƏRTAC xəbər verir ki, əvvəlcə Avrasiya Yazıçılar Birliyinin sədri, yazıçı-publisist Yaqub Öməroğlu tədqiqatçı alim İsa Həbibbəylinin yaradıcılığı, AMEA-nın Nizami Gəncəvi adına Ədəbiyyat İnstitutu ilə AYB arasındakı əməkdaşlıq münasibətlərinin istiqamətləri və nəticələri barədə geniş məlumat verib.

Görüşdə iştiraka, səmimi sözlərə, əsərlərinə verilən diqqətə görə minnətdarlığını ifadə edən AMEA-nın vitse-prezidenti İsa Həbibbəyli əvvəlcə 44 günlük Vətən müharibəsində qazanılan rəşadətli Qələbədən danışıb. Müzəffər Ali Baş Komandan İlham Əliyevin rəhbərliyi ilə cəsur Azərbaycan Ordusunun cəbhədə qazandığı tarixi Qələbəni savaş dastanı kimi dəyərləndirən alim əminliklə bildirib ki, türk dünyasının şair və yazıçıları, o cümlədən AYB üzvləri Qarabağ Zəfəri, eləcə də Şuşanın fəthi barədə göz oxşayan əsərlər yaradacaqlar.

Avrasiya Yazıçılar Birliyi ilə əməkdaşlıq münasibətlərinin ən bariz nümunəsi AYB-nin aylıq ədəbiyyat dərgisi olan “Kardeş kalemler” jurnalının iyun nömrəsinin dahi Azərbaycan şairi, böyük filosof Nizami Gəncəviyə həsr edilməsidir. “Nizami Gəncəvi kimi dünya şöhrətli şəxsiyyətlərin həyatı və yaradıcılığı ilə məşğul olmaq yalnız, sadəcə, tədqiqat fəaliyyəti deyil, milli kimliyimizin təşviqi, qorunması və inkişafı naminə mühüm bir mücadilədir”, - deyə alim fikirlərini davam etdirib.

Akademik İsa Həbibbəyli vurğulayıb ki, Nizami Gəncəvinin həyatı və yaradıcılığının araşdırılması və təbliği istiqamətində səmərəli fəaliyyətlərinə görə Avrasiya Yazıçılar Birliyinin sədri Yaqub Öməroğlu, türkiyəli professorlar Orhan Söyləməz və Çingiz Alyılmaz AMEA-nın xüsusi diplomlarına layiq görülüblər.

Qeyd edək ki, Avrasiya Yazıçılar Birliyi ilə Azərbaycan Milli Elmlər Akademiyasının (AMEA) Nizami Gəncəvi adına Ədəbiyyat İnstitutunun birlikdə nəşr etdirdiyi jurnalın bu nömrəsi Azərbaycan Respublikası Prezidentinin Sərəncamı ilə 2021-ci ilin “Nizami Gəncəvi İli” elan olunması münasibətilə çapa hazırlanıb. Nəşrin “Ön söz” müəllifi AYB-nin sədri, yazıçı-publisist Yaqub Öməroğludur. Jurnalda AMEA Nizami Gəncəvi adına Ədəbiyyat İnstitutunun direktoru, akademik İsa Həbibbəyli, institutun şöbə müdiri, AMEA-nın müxbir üzvü Nüşabə Araslı, türkiyəli professorlar Əhmət Kartal, Mustafa İsen və digər görkəmli alimlərin Nizami Gəncəvinin həyat və yaradıcılığına həsr olunan elmi-ədəbi məqalələri oxuculara təqdim olunub.

Sabir Şahtaxtı

AZƏRTAC-ın xüsusi müxbiri

Ankara

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.