CƏMİYYƏT
“Asan İmza”nın tətbiqi təcrübəsi Londonda identitet üzrə seminarda müzakirə olunub
Bakı, 14 iyun, AZƏRTAC
Böyük Britaniyanın paytaxtı Londonda “Accenture” şirkəti ilə birgə əməkdaşlıqda Dünya İqtisadi Forumu tərəfindən "Rəqəmsal identitet, güvən və dəyər" mövzusunda seminar təşkil olunub. Tədbirdə rəqəmsal sahə, korporativ strategiya və biznes sektorunun rəhbərləri identifikasiya ilə bağlı məsələləri araşdırıb, problemləri səsləndirib, qabaqcıl təcrübələri ilə bölüşüblər, sahələrarası və daxili əməkdaşlıq üçün imkanları müəyyənləşdiriblər.
B.EST Solutions şirkətindən AZƏRTAC-a bildirilib ki, görüşün əsas məqsədi gələcək rəqəmsal identitet və müştərilərlə əlaqələrin öyrənilməsi, eləcə də sahələrarası və sektorlararası imkanların və problemlərin aşkar edilməsindən ibarət olmuşdu. Tədbirdə düşünülmüş rəqəmsal identitet modeli - rəqəmsal identitet sahəsinin rolu və tendensiyasını nəzərə almış səhiyyə, maliyyə xidmətləri, mobillik, pərakəndə ticarət və dövlət xidmətləri kimi iqtisadi inkişaf sahələrində əsas məsələləri əhatə etmişdi.
Seminarda identitet sahəsində tanınan şəxslər iştirak etmişlər. Bunların sırasında Böyük Britaniyanın rəqəmsal identiteti üzrə direktoru Liza Barrett; Rəqəmsal identitet məhsulları üzrə baş vitse-prezident Çarlz Uolton, “Mastercard”; “Hitachi” şirkətinin baş rəqəmsal direktoru Ram Ramakander; “Omiyard Networks” şirkətinin rəqəmsal identitet üzrə direktoru Teya Anderson; Avropa Komissiyasında ezam olunmuş milli ekspert, strateq Karlos Homes Munyo; “Cambridge Blockchain” şirkətinin baş icraçı direktoru Metyu Kommons; Open Data, “Amazon Web Services”in rəhbəri, dövlət sektoru - Ced Sandvol; Saymon Uilkoks - Avtomatlaşdırma və innovasiyalı tranformasiya, Heathrow, eləcə də Dünya İqtisadi Forumu, “Accenture” nümayəndələri və ekspertlərini qeyd etmək olar.
“Asan İmza” mobil identitetinin operatoru hesab edilən B.EST Solutions şirkətinin təsisçisi və direktoru, Milli İdentitetlərin Qlobal İttifaqının (GANMI) həmsədri olan Jana Krimpe rəqəmsal identitet və digər nümayəndələrlə etibarlılıq məsələlərini müzakirə etmişdi. Jana Krimpe Azərbaycanı təmsil edən yeganə nümayəndə idi. O, bütün dünyada yüksək qiymətləndirilən milli rəqəmsal identitetin fəaliyyətini aktiv şəkildə yüksəldir. Azərbaycan mobil rəqəmsal identitet və onun müxtəlif dövlət və özəl sektorun elektron xidmətlərə inteqrasiyasında dünyanın aparıcı yerlərindən birini tutur, bura, eyni zamanda, “Asan İmza”nın Azərbaycan Respublikasının Prezidenti yanında İqtisadi İslahatların Təhlili və Kommukasiya Mərkəzi tərəfindən hazırlanmış dövlət-özəl sektorda əməkdaşlıq prinsipinə əsaslanan Azexport.az portalına inteqrasiyası da daxildir.
2017-ci ilin əvvəlindən başlayaraq Azərbaycan Respublikası Prezidentinin Fərmanı ilə xarici ticarət prosedurlarının genişləndirilməsi və Azərbaycanın Rəqəmsal Ticarət Qovşağı qismində Azexport.az portalının gücləndirilməsi məqsədilə əlavə tədbirlər görülür. Belə ki, Azərbaycanın dünya üzrə bütün diplomatik nümayəndəliklərinə Azərbaycanda işləmək və ya ölkənin iqtisadiyyatına sərmayə qoymaq istəyən xarici vətəndaşlara mobil rezidentlik – mobil identifikasiyanın elektron sertifikatlarını (“Asan İmza”) təqdim etmək səlahiyyətləri verilib.
Azərbaycan mobil rezidentlik layihəsini həyata keçirən ilk ölkə, dünyada reallaşdırılan elektron rezidentlik layihəsi üzrə Estoniyadan sonra ikinci ölkədir.
B.EST Solutions dünya üzrə bir çox konfranslarda, sammitlərdə və forumlarda iştirak edir. Əsas məqsəd isə “Made in Azerbaijan” “Asan İmza” innovativ məhsulunu bütün dünyada tanıtmaq və onu qabaqcıl təcrübəyə daxil etməkdən ibarətdir.