Astara, 19 iyul, Bağır Əliyev, AZƏRTAC

İyulun 19-da Astara Rayon İcra Hakimiyyətində keçirilən geniş şura iclasında bu ilin birinci yarısının yekunları və qarşıda duran vəzifələr müzakirə edilib.

AZƏRTAC xəbər verir ki, hesabat yığıncağında çıxış edən Astara Rayon İcra Hakimiyyətinin başçısı Qəzənfər Ağayev bu ilin altı ayında rayonda sosial-iqtisadi inkişaf sahəsində görülən işlərdən danışıb.

Bildirilib ki, rayonda ümumi əkin sahəsi 2300 hektaradək. Təkcə çəltik əkini 8 dəfədən çox artırılaraq 450 hektara çatdırılıb. Çay, tərəvəz və bostan bitkilərinin yetişdirilməsində də artımlar var. Bu il daha çox torpaqda əkin aparılması məhsul istehsalında da özünü göstərəcək.

Qeyd olunub ki, iqtisadi və sosial inkişafın əsas keyfiyyət göstəricisi olan ümumi məhsul və xidmətlərin həcmi ötən ilin müvafiq dövrünə nisbətən 5 faiz, əsas kapitala yönəldilmiş vəsaitin həcmi isə 56 faiz artıb. Orta hesabla bir nəfərə düşən ümumi məhsul buraxılışının həcmi 813 manat təşkil edib.

Bu dövrdə rayonda tikinti-abadlıq və quruculuq sahəsində də rayonda xeyli iş görülüb. Prezidentin Sərəncamına uyğun olaraq Astara şəhərində, Xəzər dənizi sahilində park-bulvar kompleksinin genişləndirilməsi işlərinə başlanılıb, nəzərdə tutulan işlər layihəyə əsasən ardıcıl həyata keçirilir. Xəzər dənizi sahili boyu park-bulvar və çimərlik ərazisində “AAAF Park Astara” layihəsi çərçivəsində idman sağlamlıq kompleksləri tikilib istifadəyə verilib, 2017-ci ildə mənzil fonduna daxil olan ictimai yaşayış binalarında təmir-tikinti işləri görülüb. Eyni zamanda, kənd investisiya layihəsi çərçivəsində Pəlikəş kəndində müasir tipli xəstəxana binası tikilib istifadəyə verilib. Taxtanakəran-Toradi, Taxtanakəran-Miki avtomobil yolunun tikintisinin ikinci mərhələsinə başlanılıb, hazırda bu istiqamətdə işlər davam etdirilir.

Diqqətə çatdırılıb ki, Astara şəhəri və ətraf qəsəbələrin su təchizatı və kanalizasiya sistemlərinin yenidən qurulması Azərbaycan Respublikasının regionların 2014-2018-ci illərdə sosial-iqtisadi inkişafı Dövlət Proqramına salınaraq, layihənin icrasına başlanılıb. Bu günə qədər 2 ədəd 5000 kubmetrlik su anbarı və manevr otağının tikintisi başa çatıb, Heydər Əliyev prospekti və Kaverin küçəsində 8500 metr boru çəkilib.

Həmçinin ilin birinci yarısında 94 evin qazlaşdırılması həyata keçirilib. Əhali abunəçiləri üçün 60 ədəd qaz sayğacı quraşdırılaraq istifadəyə verilib, rayon üzrə quraşdırılmış sayğacların ümumi sayı 16640-a çatdırılıb.

Rayon Məşğulluq Mərkəzində 762 nəfər işaxtaran qeyri-məşğul vətəndaş qeydiyyata alınıb. Onların 112 nəfərini qadınlar təşkil edir. Ötən müddət ərzində Mərkəzə iş üçün müraciət edənlərin 321 nəfəri müxtəlif idarə və müəssisələrdə işlə təmin olunub.

Ümumtəhsil məktəblərin maddi texniki bazasının möhkəmləndirilməsi ilə əlaqədar Astara şəhər 6 nömrəli, Maşxan kənd tam orta, Deqədi və Ovala kənd əsas məktəblərində cari təmir işləri aparılıb, Ərçivan qəsəbə 1 nömrəli, Asxanakəran və Hamoşam kənd məktəblərinin cari təmirinə hazırlıq işlərinə başlanıb. Əlavə olaraq Siyatük və Balaca Şahağac məktəbləri üçün modul tipli binaların quraşdırılması nəzərdə tutulub.

Məruzədə qeyd olunub ki, ilin birinci yarısında rayonda aqrar sahənin inkişafına diqqət artırılıb. Rayonda 447,5 hektarında çəltik, 146,8 hektarda buğda, 31,5 hektar arpa, qalan sahələrdə isə tərəvəz, paxlalı bitkilər, bostan bitkiləri və yonca əkilib. Sitrus meyvə bağlarının ümumi sahəsi artaraq 2200 hektarı keçib. Sitrusçuluqla yanaşı, çay, çəltik və tərəvəz istehsalı da diqqət mərkəzində olub. Rayonda yaradılmış çayçılıq təsərrüfatlarının ərazisi genişləndirilərək 345 hektara çatdırılıb. May ayından indiyə qədər rayon üzrə 214 min 962 kiloqram yaşıl çay yarpağı yığılaraq çay fabriklərinə təhvil verilib. Hazırda yaşıl çay yarpağının yığılması davam etdirilir.

Yığıncaqda çıxış edənlər bu ilin birinci yarısında rayonda sosial-iqtisadi sahədə qazanılmış uğurlardan danışıb, mövcud problemlərlə bağlı təkliflərini bildiriblər.