CƏMİYYƏT
Avropa İttifaqının tvinninq layihələri ilə tanışlıq məqsədilə brifinq keçirilib
Bakı, 27 noyabr, AZƏRTAC
Noyabrın 27-də Avropa İttifaqının (Aİ) tvinninq layihələri ilə tanışlıq məqsədilə brifinq keçirilib.
AZƏRTAC xəbər verir ki, brifinqdə çıxış edən Aİ-nin Azərbaycandakı nümayəndəliyinin əməkdaşı Ülviyyə Abdullayeva 10 il ərzində qurumun ölkəmizdə 50-yə yaxın tvinninq layihəsi həyata keçirdiyini deyib.
Ekologiya və Təbii Sərvətlər Nazirliyinin ekoloji siyasət şöbəsinin sektor müdiri Mehman Nəbiyev layihə çərçivəsində monitorinq sisteminin təkmilləşdirilməsi istiqamətində görülən işlərdən danışıb.
Sonra Aİ-nin rezident tvinninq müşaviri Katya Loven “Avropa İttifaqının nümunəvi təcrübələri əsasında Azərbaycanda Milli Ekoloji Monitorinq Sisteminin (MEMS) təkmilləşdirilməsi” layihəsi haqqında məlumat verib. O, bildirib ki, layihənin ümumi məqsədi strateji ekoloji siyasətin planlaşdırılması, uyğunluğa nəzarəti dəstəkləyən yüksəkkeyfiyyətli məlumatların təmin edilməsi və ekoloji monitorinq sisteminin gücləndirilməsi ilə Azərbaycanın ekoloji fəaliyyətinin təkmilləşdirilməsinə yardım etməkdir.
O, deyib: “Layihənin fəaliyyətlərinin Avropa Qonşuluq Siyasətinin Azərbaycan üçün Fəaliyyət Planında qeyd edilmiş prioritet tədbirlərin həyata keçirilməsinə öz töhfəsini verəcək. Tvinninq layihəsinin fəaliyyətləri ətraf mühitin monitorinqinin və qiymətləndirmə metodologiyalarının müasirləşdirilməsində Ekologiya və Təbii Sərvətlər Nazirliyinə dəstək olacaq. Bura ekoloji məlumatların toplanması, emalı, ötürülməsi, təhlili və əlaqələndirilməsi üzrə qərar qəbulu üçün yüksəkkeyfiyyətli, etibarlı məlumat təmin edən informasiya sisteminin işlənib hazırlanması daxildir. Layihənin fəaliyyət istiqaməti havanın keyfiyyəti və hava emissiyalarını ön plana çıxarmaqla ətraf mühitin müxtəlif sahələrini əhatə edəcək. 2016-cı il noyabrdan başlanılan layihə gələn ilin yanvarında başa çatacaq. Layihə 1,4 milyon avroluq büdcə ilə AQTA 2012 proqramı çərçivəsində Avropa İttifaqı tərəfindən maliyyələşdirilir”.
Daha sonra Aİ-nin rezident tvinninq müşaviri Zinaida Qorina “Azərbaycan Respublikasının Milli Akkreditasiya Sisteminin Gücləndirilməsi” tvinninq layihəsi ilə bağlı məlumat verib. Z.Qorina layihənin Azərbaycan-Avropa İttifaqı Tərəfdaşlıq və Əməkdaşlıq Sazişinin həyata keçirilməsini dəstəklədiyini və metrologiya, standartlaşdırma, texniki tənzimləmə sahələrində bir sıra layihələrin davamı olduğunu qeyd edib. O, həmçinin bildirib: “Tvinninq layihəsi çərçivəsində Azərbaycan Akkreditasiya Agentliyi ilə əməkdaşlıq burada akkreditasiya sisteminin təkmilləşdirilməsinə töhfə verəcək və Avropa tələblərinə cavab verməklə ölkənin iqtisadi artımına dəstək olacaq. Layihə akkreditasiya və uyğunluğun qiymətləndirilməsi sahəsində qarşılıqlı tanınmanı təmin etməklə yanaşı, Azərbaycan məhsullarının və xidmətlərinin keyfiyyətinin yaxşılaşdırılmasına da kömək edəcək. Tvinninq layihəsinin ümumi məqsədi Azərbaycanın iqtisadi inkişafına və Avropanın tələblərinə cavab verən akkreditasiya sistemi vasitəsilə dünya bazarına çıxışı təmin etməkdir. Layihə məhsul və xidmətlərin keyfiyyətinin yüksəldilməsinə təkan verərək onların Avropa bazarında rəqabətədavamlı olmasına şərait yaradacaq. Həmçinin Azərbaycan Akkreditasiya Agentliyinin imkanlarını Laboratoriyaların Akkreditasiyası Beynəlxalq Əməkdaşlıq Təşkilatının, Beynəlxalq Akkreditasiya Forumunun və Akkreditasiya üzrə Avropa Əməkdaşlıq Təşkilatının tələblərinə uyğun olaraq gücləndirmək əsas prioritet istiqamətlərdəndir. Dəyəri 1 milyon 200 min avro olan layihə ötən il iyulun 1-də başlanılıb və onun icrasının 24 ay davam etdirilməsi nəzərdə tutulub”.
Sonda kütləvi informasiya vasitələri nümayəndələrini maraqlandıran suallar cavablandırılıb.
Qeyd edək ki, “Avropa İttifaqının nümunəvi təcrübələri əsasında Azərbaycanda Milli Ekoloji Monitorinq Sisteminin (MEMS) təkmilləşdirilməsi” layihəsi Finlandiya, Avstriya və Latviya (Aİ-yə üzv dövlətlərlə) ilə birgə həyata keçirilir. Ekologiya və Təbii Sərvətlər Nazirliyi bu ölkələrin müvafiq qurumları ilə sıx əməkdaşlıq edir.
“Azərbaycan Respublikasının Milli Akkreditasiya Sisteminin Gücləndirilməsi” tvinninq layihəsi isə Almaniya, İtaliya və Latviya ilə birgə icra olunur. Azərbaycan Akkreditasiya Agentliyi isə həmin ölkələrin qurumları ilə əməkdaşlıq əlaqələrinə malikdir.
Ümumilikdə, tvinninq əməkdaşlıq, partnyorluq, bilik və bacarıqların mübadiləsi deməkdir.