ELM VƏ TƏHSİL


AzMİU tələbələrinin dizayn layihələri Bakının fərqli məkanlarında reallaşa bilər

Bakı, 30 sentyabr, AZƏRTAC

Azərbaycan Memarlıq və İnşaat Universitetinin (AzMİU) Memarlıq fakültəsinin dizayn ixtisası üzrə təhsil alan tələbələrinin Dənizkənarı Bulvar İdarəsi, Azərbaycan Milli Xalça Muzeyi və “Sandıqca” mağazalar şəbəkəsi üçün hazırladığı dizayn nümunələrinin təqdimatı keçirilib.

AzMİU-dan AZƏRTAC-a bildirilib ki, “İctimai məkanda müvəqqəti, pərakəndə ticarət məqsədli kiçik memarlıq həcminin interyerinin yaradılması” layihəsi çərçivəsində hazırlanan işlərə ilkin baxış keçirilib və tövsiyələr verilib.

İtaliya–Azərbaycan Dizayn Mərkəzinin təşkilatçılığı ilə reallaşan təqdimatda AzMİU-nun rəhbərliyi, professor-müəllim heyəti, tələbələr, Dənizkənarı Bulvar İdarəsi və Azərbaycan Milli Xalça Muzeyinin nümayəndələri də iştirak ediblər.

Mərkəzin rəhbəri Fərid Kərimov qeyd edib ki, bu cür layihələrin həyata keçirilməsi tələbələr üçün çox müsbət haldır və real işlər üzərində çalışmaq onlara daha çox təcrübə qazanmağa imkan verir.

AzMİU-nun prorektoru professor Nərgiz Abdullayeva tələbələrə təşəkkür edib və universitetdə dizayn ixtisası üzrə mütəxəssis hazırlığı ilə bağlı görülən işlərdən danışıb. Prorektor qeyd edib ki, AzMİU-da digər ixtisaslarla yanaşı, dizayn ixtisası üzrə də mütəmadi olaraq qabaqcıl dünya universitetlərinin təcrübələri öyrənilir və tədrisdə tətbiq edilir.

Dənizkənarı Bulvar İdarəsinin aparat rəhbəri Çingiz Məmmədov və Azərbaycan Milli Xalça Muzeyinin direktoru sənətşünaslıq üzrə fəlsəfə doktoru Şirin Məlikova çıxışlarında layihənin önəminə toxunaraq bu istiqamətdə əməkdaşlığın inkişaf etdirilməsinin vacibliyini vurğulayıblar. Qonaqlar tələbələrin təklif etdikləri layihələrlə yaxından tanış olaraq onları heyrətamiz adlandırıblar.

Sonda tələbələrə layihədə iştiraklarına görə sertifikatlar təqdim olunub. Qaliblər xüsusi həvəsləndirici hədiyyələrlə mükafatlandırılıblar.

Qeyd edək ki, layihə çərçivəsində hazırlanan uğurlu dizayn nümunələrinin gələcəkdə Azərbaycan Milli Xalça Muzeyində və Dənizkənarı Bulvar İdarəsinin ərazisində reallaşdırılması da istisna olunmur.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.