ELM VƏ TƏHSİL
Azərbaycan Dövlət Rəssamlıq Akademiyasında Mehdi Hüseynzadənin xatirəsi anılıb
Bakı, 19 noyabr, P.İmanova, AZƏRTAC
Noyabrın 19-da Azərbaycan Dövlət Rəssamlıq Akademiyasında (ADRA) İkinci Dünya müharibəsi dövründə kəşfiyyat-təxribat qrupun rəhbəri, Sovet İttifaqı Qəhrəmanı və rəssam Mehdi Hüseynzadənin anadan olmasının 100 illiyinə həsr edilən tədbir keçirilib.
AZƏRTAC xəbər verir ki, mərasimdə ADRA-nın prorektoru, professor Fuad Salayev tədbirin Prezident İlham Əliyevin “Sovet İttifaqı Qəhrəmanı Mehdi Hüseynzadənin 100 illik yubileyinin keçirilməsi haqqında” 2018-ci il 23 iyun tarixli Sərəncamına əsasən təşkil edildiyini söyləyib. Bildirib ki, adı Azərbaycanın qəhrəmanlıq tarixinə əbədi həkk edilən əfsanəvi partizan Mehdi Hüseynzadə rəssamlıqla da məşğul olub, Bakı Rəssamlıq Məktəbini bitirib.
Mədəniyyət Nazirliyinin sektor müdiri Qalib Qasımov dövlətimizin başçısının Sovet İttifaqı Qəhrəmanı M.Hüseynzadənin anadan olmasının 100 illik yubileyinin qeyd edilməsi haqqında müvafiq Sərəncamının əhəmiyyətini vurğulayıb. Bildirib ki, Sərəncamın icrası məqsədilə Müdafiə, Təhsil və Mədəniyyət nazirlikləri tərəfindən tədbirlər planı təsdiqlənib. M.Hüseynzadənin yubileyinə həsr edilən tədbirin keçirilməsində məqsəd əfsanəvi döyüşçünün rəssamlıq fəaliyyətinə nəzər salmaq və onu ictimaiyyətə çatdırmaqdır.
Q.Qasımov M.Hüseynzadənin xatirəsinin əbədiləşdirilməsi məqsədilə ölkəmizdə bir çox işlərin görüldüyünü diqqətə çatdırıb. Bildirib ki, əfsanəvi döyüşçünün qəhrəmanlığından bəhs edən “Uzaq sahillərdə” filmi çəkilib, müxtəlif əsərlər yazılıb. M.Hüseynzadənin vaxtilə təhsil aldığı Bakı Rəssamlıq Məktəbinin bu gün ADRA-nın nəzdində fəaliyyətini davam etdirdiyi nəzərə alınaraq onun 100 illiyinə həsr olunmuş anım mərasiminin akademiyada təşkil olunması rəmzi məna daşıyır.
Sonra akademiyanın təsviri sənət tarixi və nəzəriyyəsi kafedrasının professoru, Əməkdar incəsənət xadimi, sənətşünas Ziyadxan Əliyev M.Hüseynzadənin bədii yaradıcılığı, təsviri sənət tarixi və nəzəriyyəsi kafedrasının baş müəllimi, sənətşünaslıq üzrə fəlsəfə doktoru Samir Sadıqov isə əfsanəvi kəşfiyyatçının xatirəsinin əbədiləşdirilməsi məqsədilə aparılan işlər barədə məruzə ilə çıxış ediblər.
Çıxış edənlər Mehdi Hüseynzadənin həyat və döyüş yolundan, qəhrəmanlığından, bədii yaradıcılığından söz açıblar.
Anım mərasimində M.Hüseynzadənin həyatı və rəssamlıq fəaliyyəti ilə bağlı Azərbaycan Dövlət Rəsm Qalereyası tərəfindən hazırlanmış təqdimat olub.