İQTİSADİYYAT
“Azərbaycan Hava Yolları” MDB dövlətləri arasında ilk dəfə “Boeing-787-8” Dreamliner təyyarəsinə sahib olub VİDEO
Bakı, 24 dekabr, Ceyhun Rüstəmov, AZƏRTAC
“Azərbaycan Hava Yolları” Qapalı Səhmdar Cəmiyyəti (QSC) aviaparkını “Arzular layneri” adlanan ən müasir “Boeing-787-8” Dreamliner sərnişin təyyarəsi ilə gücləndirib. Prezident İlham ƏIiyevin dəstəyi nəticəsində yüksəliş dövrünü yaşayan “Azərbaycan Hava Yolları” bununla da MDB dövlətləri və bir sıra Şərq ölkələri arasında bu cür ən müasir hava gəmisi alan ilk aviaşirkət olub.
AZƏRTAC xəbər verir ki, dekabrın 24-də “Azərbaycan Hava Yolları” QSC-nin prezidenti Cahangir Əsgərov və “Boeing” Korporasiyasının Yaxın Şərq, Rusiya və Mərkəzi Asiya ölkələrində satış üzrə vitse-prezidenti Martin Bentrott “Azərbaycan Hava Yolları” QSC ilə “Boeing” Korporasiyası arasında “Boeing-787-8” Dreamliner təyyarəsinin qəbuluna dair protokol və “Azərbaycan Hava Yolları” ilə “Boeing” arasında əməkdaşlığın davam etdirilməsi və genişləndirilməsi barədə müqavilə imzaladılar.
Daha sonra “Silk Way Group”un prezidenti Zaur Axundov ilə “Boeing”in satış müdiri Serdar Gürz arasında “Silk Way Cargo” yük aviaşirkəti tərəfindən 2015-2016-cı illərdə 3 yeni, müasir “Boeing 747-8” təyyarələrinin alınması haqqında müqavilə imzalandı.
“Azərbaycan Hava Yolları” QSC-nin MDB-də ilk dəfə olaraq “Boeing-787-8” Dreamliner tipli ən müasir təyyarəni almasından məmnun olduqlarını bildirən “Boeing”in Yaxın Şərq, Rusiya və Mərkəzi Asiya ölkələrində satış üzrə vitse-prezidenti Martin Bentrott qeyd etdi ki, ən son texniki nailiyyətləri özündə birləşdirən “Arzular layneri” daha uzaq məsafələrə uçuşlar həyata keçirməyə imkan yaradır. Ən yeni texnologiyaların tətbiq edilməsi nəticəsində təyyarədə yüksək mənfəətli istismar, yanacağa qənaət və sərnişinlər üçün rahat şərait vardır. “Azərbaycan Hava Yolları” ilə əməkdaşlığı genişləndirmək “Boeing” Korporasiyası üçün də çox xoşdur.
M.Bentrott, eyni zamanda, digər müqaviləyə əsasən “Boeing 747-8” təyyarələrinin alınmasının Azərbaycanın hava nəqliyyatı ilə yük daşınmasına mühüm təsir göstərəcəyini də diqqətə çatdırdı.
Həmin gün “Azərbaycan Hava Yolları” QSC-nin “Boeing” Korporasiyasından sifariş etdiyi ən müasir “Boeing-787-8” Dreamliner təyyarəsi Heydər Əliyev Beynəlxalq Aeroportunda yerə endi. Müasir təyyarə aviasiya ənənəsinə əsasən, rəmzi olaraq yuyuldu.
Təyyarənin uçuş heyətini “Azərbaycan Hava Yolları” QSC-nin prezidenti Cahangir Əsgərov, “Boeing” Korporasiyasının nümayəndələri və media işçiləri qarşıladılar. “Ordubad” adlandırılan reaktiv tipli “Boeing-787-8” Dreamliner təyyarəsi ən müasir texnologiyalarla təchiz olunub. Bu təyyarə həm texniki, həm də xidmət cəhətdən digər hava gəmilərindən fərqlənir. Dreamlinerin çəkisi analoji təyyarələrlə müqayisədə daha yüngüldür. Buna baxmayaraq, uçuş məsafəsi və yükqaldırma imkanı digərlərindən çoxdur və 20 faiz az yanacaq sərf edir. “Azərbaycan Hava Yolları” üçün sifariş edilmiş geniş gövdəli “Boeing-787-8” Dreamliner təyyarəsi 210 sərnişin tutumuna malikdir. Fasiləsiz 15 saat uçuş yerinə yetirən bu təyyarə birbaşa 15 min 700 kilometr məsafə qət edə bilir. Dreamliner bu göstəricilərə görə hazırkı sərnişin təyyarələri arasında liderdir. “Arzular layneri”nin sərnişin salonunda üç növ oturacaq və onlara uyğun fərqli xidmət sinifləri mövcuddur. Təyyarənin bütün aeronaviqasiya və sərnişin salonunun audio-video sistemləri ən son texnoloji yeniliklər əsasında tərtib olunub. Dreamliner təyyarəsində bir çox elmi nailiyyətlər tətbiq edilib. Beynəlxalq aviasiya təşkilatlarının xüsusi tələbləri nəzərə alınmaqla, “Azərbaycan Hava Yolları” artıq həm uçuş, həm də yerüstü xidmət heyətinin hazırlığına da başlayıb.
“Bu möhtəşəm layihənin həyata keçirilməsi ölkə rəhbərliyinin birbaşa göstərişləri və səyləri nəticəsində mümkün olub. Biz bu gün MDB dövlətləri arasında ilk dəfə olaraq dünyanın ən rahat, ən müasir təyyarəsini aviaşirkətimizin parkına qəbul edirik”, - deyən “Azərbaycan Hava Yolları” QSC-nin vitse-prezidenti Arif Məmmədov bildirdi ki, yaxın günlərdə bu tipli ikinci təyyarə də Bakıya gətiriləcək. Pilotlarımız xarici təlimatçılarla birgə sınaq-təlim uçuşlarını Azərbaycan aeroportlarında davam etdirəcəklər. Təyyarənin istismarı ilə bağlı təlimatların bütün tələblərini iki ay ərzində bitirməyi planlaşdırırıq. Bundan sonra “Boeing-787-8” Dreamliner təyyarələri sərnişinlərimizə xidmət göstərməyə başlayacaq. İlk mərhələdə Bakıdan Pekinə, Londona və Avropanın digər şəhərlərinə uçuşlar həyata keçiriləcək. 2015-ci ilin yay mövsümündən etibarən isə bu hava gəmilərinin Nyu-York və yeni açılacaq hava xətlərində istismarı gözlənilir. “Bildiyiniz kimi, ABŞ-ın Federal Aviasiya Administrasiyası (FAA) tərəfindən ölkəmizdə aviasiya təhlükəsizliyi sahəsində aparılan auditin nəticəsinə əsasən, Azərbaycana “1-ci dərəcə” statusu verilib. Bu, çox fərəhli haldır. Eyni zamanda, biz bu statusu qoruyub saxlamağın məsuliyyətini anlayırıq və bütün beynəlxalq təşkilatların tələblərini yerinə yetirəndən sonra təyyarə sərnişinlərin ixtiyarına veriləcək”, - deyə A.Məmmədov vurğuladı.
“Silk Way Group”un vitse-prezidenti Eldar Hacıyev jurnalistlərə müsahibəsində “Boeing-787-8” Dreamlinerin məhz dekabrın 24-də Azərbaycana gətirilməsinin 2014-cü ildə əldə edilən nailiyyətlərin möhtəşəm yekunu olduğunu vurğuladı. “Cari ilin aprelində tikintisi başa çatmış və hazırda fəaliyyət göstərən yeni aerovağzal kompleksi artıq tam həcmdə beynəlxalq uçuşları qəbul edir. İl ərzində keçirilən iki beynəlxalq auditin nəticəsi olaraq Heydər Əliyev Beynəlxalq Aeroportu dekabrın 22-də 4 ulduz dərəcəsinə layiq görülüb. Bununla aeroportumuz dünyanın 18 ən yüksək reytinqli hava limanları siyahısına daxil olub. Həmçinin bu yaxınlarda Bakıdan Nyu-Yorka birbaşa aviareysin açılmasını da xüsusi qeyd etmək istəyirəm. Bu, regionda yerləşən ölkələrin sərnişinlərinə uzaq Amerika qitəsinə səfər etmək imkanı yaradır. “Azərbaycan Hava Yolları”nın və ümumilikdə Azərbaycan mülki aviasiyasının nailiyyətləri Prezident İlham Əliyevin bu sahəyə göstərdiyi diqqət və qayğının nəticəsidir”, - deyə E.Hacıyev əlavə etdi.
Qeyd edək ki, “Boeing-787-8” Dreamliner tipli təyyarələri Mərkəzi Asiyada ilk dəfə məhz 2007-ci ildə “Azərbaycan Hava Yolları” sifariş edib. Dreamliner layihəsinin işlənib hazırlanması proqramı 2004-cü ildən həyata keçirilir.