ELM VƏ TƏHSİL
Azərbaycan Milli Elmlər Akademiyası magistrlərinin “Məzun günü” keçirilib
Bakı, 10 iyul, AZƏRTAC
İyulun 10-da Azərbaycan Milli Elmlər Akademiyası (AMEA) magistrlərinin “Məzun günü” keçirilib.
AZƏRTAC xəbər verir ki, tədbirdə respublikanın elm və təhsil müəssisələrinin rəhbərləri, AMEA-nın həqiqi və müxbir üzvləri, KİV nümayəndələri iştirak ediblər.
Tədbirdə AMEA-nın prezidenti, akademik Akif Əlizadə akademiya magistrlərinin “Məzun günü”nün əlamətdar hadisə olduğunu qeyd edib. AMEA-da magistratura təhsil pilləsinin 2015-ci ildə dövlətimizin başçısının dəstəyi ilə yaradıldığını xatırladan A.Əlizadə təhsilin müasir səviyyədə qurulması üçün mühüm addımlar atıldığını bildirib. O deyib: “Akademiyanın Rəyasət Heyəti aparatında Elm və Təhsil İdarəsi, bütün institutlarda isə təhsil şöbələri yaradılıb. Hesab edirəm ki, bu, elmlə təhsilin inteqrasiyası istiqamətində çox uğurlu struktur islahatıdır”.
Magistrantların yaradılmış imkanlardan səmərəli faydalandıqlarını deyən AMEA rəhbəri vurğulayıb ki, onlar dissertasiya tədqiqatlarının nəticələrini yerli və xarici jurnallarda dərc etdirirlər. “Artıq bir neçə magistrantımızın məqaləsi “Web of Science” platformasında indeksləşən jurnallarda dərc olunub. Molekulyar Biologiya və Biotexnologiyalar İnstitutunun biotexnologiya ixtisası üzrə magistraturasını bitirmiş gənc alimin məqaləsi isə impakt faktoru 15.5 olan jurnalda dərc edilib. Bu, kifayət qədər yüksək nəticədir və uğurlu tədrisin bəhrəsidir”, - deyə A.Əlizadə bildirib.
Qarşıya qoyulmuş məqsədə nail olunduğunu bildirən akademik magistraturanın yaradılmasını elmlə təhsilin inteqrasiyası istiqamətində uğurlu addım kimi dəyərləndirib. Diqqətə çatdırılıb ki, akademiyanın magistraturasını keçən il bitirmiş ilk məzunlarının hamısı bu gün AMEA-da elmi karyeralarını uğurla davam etdirirlər. Onların əksəriyyəti hazırda fəlsəfə doktorluğu elmi dərəcəsi almaq üçün AMEA-nın doktoranturasında təhsil alır.
AMEA-da magistrantların peşəkar mütəxəssis kimi yetişmələri üçün müasir tələblərə cavab verən tədris mühitinin olduğunu bildirən A.Əlizadə onların yaradılmış imkanlardan səmərəli faydalandıqlarını vurğulayıb.
“Akademiyanı intellektual bir beyin mərkəzinə çevirmək niyyətindəyik” - deyən A.Əlizadə gənclərin AMEA-nın magistratura pilləsində təhsil almalarına marağın getdikcə artdığını, akademiyanın magistrlərinin işlə təmin olunduqlarını, eyni zamanda, qrant layihələrə cəlb edildiklərini vurğulayıb. O, məzunları təhsil aldıqları elm ocağının adını daim uca tutmağa, gələcəyimizin layiqli qurucuları olmağa səsləyib.
Məzunların layiqli kadrlar olacağına əminliyini bildirən A.Əlizadə onları bir daha təbrik edib, gələcək elmi fəaliyyətlərində uğurlar arzulayıb.
Daha sonra İnformasiya Texnologiyaları İnstitutunun magistri Şəlalə Mansurova, Tarix İnstitutunun magistri Əsmər Göyüşova, Molekulyar Biologiya və Biotexnologiyalar İnstitutunun magistri Elnarə Sadiqova, Dilçilik İnstitutunun magistri Böyükxanım Əsgərova çıxış edərək AMEA məzunu olmalarından qürur hissi duyduqlarını, ümidləri doğrultmağa çalışacaqlarını söyləyiblər. Yaradılan hər bir şəraitə görə akademiya rəhbərliyinə təşəkkürünü bildirən məzunlar bundan sonra da elmi fəaliyyətlərini uğurla davam etdirmək üçün bütün qüvvələrini səfərbər edəcəklərini bildiriblər.
Tədbirdə Dilçilik İnstitutunun direktoru, akademik Möhsün Nağısoylu, Polimer Materialları İnstitutunun direktoru, AMEA-nın müxbir üzvü Bəxtiyar Məmmədov, İdarəetmə Sistemləri İnstitutunun əməkdaşı, riyaziyyat üzrə fəlsəfə doktoru, dosent Gülçin Abdullayeva məzunlara qazandıqları bilikləri həyatda uğurla reallaşdırmağı, ölkəmiz üçün dəyərli vətəndaş, bacarıqlı mütəxəssis olmağı tövsiyə ediblər.
Sonda AMEA-nın məzunlarına diplomlar təqdim edilib.