İQTİSADİYYAT
Azərbaycanda korporativ bank kartları ilə bağlı qanunvericilik dəyişə bilər
Bakı, 2 aprel, AZƏRTAC
Azərbaycan Banklar Assosiasiyası (ABA) nəzdində fəaliyyət göstərən “Hüquqi məsələlər üzrə Ekspert Qrupu”nun növbəti onlayn iclası keçirilib.
ABA-dan AZƏRTAC-a bildirilib ki, görüşdə Ekspert Qrupunun bankların rəhbər şəxslərindən ibarət olan üzvləri, həmçinin “Ödəniş sistemləri və rəqəmsal bankçılıq” Ekspert Qrupunun üzvləri də iştirak edib. İclasda hər iki qrupun ekspertlərinin iştirakı ilə korporativ kartlarla əlaqədar məsələlər müzakirə edilib, bəzi qanunvericilik aktlarına dəyişikliklər ilə bağlı təkliflərin hazırlanaraq ABA-ya təqdim edilməsi qərara alınıb.
Qeyd edək ki, Azərbaycan Banklar Assosiasiyası 1990-cı ildə kommersiya bankları tərəfindən təsis edilib. ABA-nın əsas məqsədi üzv təşkilatların maraqlarını qorumaq, onların müxtəlif növ işgüzar xidmətlərə olan ehtiyaclarının ödənilməsinə yardım göstərmək və fəaliyyətlərini əlaqələndirməkdən ibarətdir. Hazırda 26 bank və 5 qeyri-bank təşkilatı ABA-nın üzvüdür.