Bakı, 19 sentyabr, AZƏRTAC

Sentyabrın 14-16-da Parisdə İqtisadi Əməkdaşlıq və İnkişaf Təşkilatının (OECD) Şərqi Avropa və Mərkəzi Asiya üçün Antikorrupsiya Şəbəkəsinin İstanbul Antikorrupsiya Fəaliyyət Planı üzrə 17-ci monitorinq görüşü, eləcə də Şəbəkənin Rəhbər Qrupunun 21-ci görüşü keçirilib.

Görüşlərdə OECD-nin Şərqi Avropa və Mərkəzi Asiya üçün Antikorrupsiya Şəbəkəsinin Azərbaycan Respublikası üzrə milli əlaqələndiricisi - Azərbaycan Respublikası baş prokurorunun müavini, Baş Prokuror yanında Korrupsiyaya Qarşı Mübarizə Baş İdarəsinin rəisi Kamran Əliyev, Azərbaycan Respublikasının Korrupsiyaya Qarşı Mübarizə üzrə Komissiyasının katibi Kamal Cəfərov, Təhsil Nazirliyinin və Baş İdarənin məsul əməkdaşları, həmçinin qeyri-hökumət təşkilatının nümayəndələri iştirak ediblər.

Korrupsiyaya Qarşı Mübarizə üzrə Komissiyadan AZƏRTAC-a bildiriblər ki, müzakirələr zamanı OECD-nin Antikorrupsiya Şəbəkəsinin İstanbul Fəaliyyət Planının III Monitorinq Raundu çərçivəsində ölkəmizdə həyata keçirilmiş tədbirlər və əldə edilmiş nəticələr müzakirə edilib. Azərbaycan Prezidentinin siyasi iradəsinə uyğun olaraq, ölkəmizin mühüm addımlar ataraq bu mərhələdə uğurlar əldə etməsi, Korrupsiyaya Qarşı Mübarizə Baş İdarəsinin İstanbul Fəaliyyət Planının icrası istiqamətində görülmüş tədbirlərdə fəal iştirakı, həmçinin korrupsiyaya qarşı mübarizədə “ASAN xidmət” mərkəzlərinin mühüm rol oynaması xüsusi vurğulanıb, respublikamızın əldə etdiyi müsbət təcrübə önə çəkilib. Nəticədə Azərbaycan Respublikası Gürcüstan ilə yanaşı, ilk olaraq III Monitorinq Raundunu uğurla tamamlayaraq IV qiymətləndirmə mərhələsinə keçən ölkə olub.

İstanbul Fəaliyyət Planı çərçivəsində ölkəmizdə verilmiş tövsiyələrin böyük əksəriyyətinin uğurla icra edilməsi Azərbaycan Respublikasının korrupsiyaya qarşı mübarizə sahəsində səmərəli fəaliyyətinin beynəlxalq ictimaiyyət tərəfindən yüksək qiymətləndirilməsinin növbəti bariz nümunəsidir.

Tədbir çərçivəsində Azərbaycanın və Gürcüstanın əvvəlki mərhələni uğurla tamamlayaraq IV Monitorinq Raunduna daxil olmasının qəbul edilməsi ilə yanaşı, Ukrayna, Qazaxıstan, Özbəkistan, Qırğızıstan, Tacikistan və Şəbəkəyə daxil olan digər ölkələrin III Monitorinq Raundu üzrə verilmiş tövsiyələrin icra vəziyyəti ilə bağlı aralıq hesabatları da müzakirə edilərək qəbul olunub.

Antikorrupsiya Şəbəkəsinin Rəhbər Qrupunun sentyabrın 16-da keçirilən 21-ci görüşündə isə Şəbəkənin müvafiq dövrü əhatə edən “2013-2015-ci illərdə Şərqi Avropa və Mərkəzi Asiyada Antikorrupsiya İslahatları, Nailiyyətlər və Çətinliklər” adlanan yekun hesabatı təqdim edilib. Tədbirdə Şəbəkənin 2016-2019-cu illər üzrə İşçi Proqramının icrası istiqamətində ortaya çıxan məsələlərlə bağlı fikir mübadiləsi aparılıb. Həmçinin Şəbəkəyə daxil olan ölkələrdə həyata keçirilən sahəvi antikorrupsiya islahatları ilə bağlı “dəyirmi masa” keçirilib, IV Monitorinq Raundunun, Şəbəkənin fəaliyyətinin təşkili ilə əlaqədar bir sıra məsələlər işçi qaydada müzakirə edilib.

Bundan başqa, görüşlər çərçivəsində tədbirdə təmsil olunan ölkələrin hüquq mühafizə orqanlarının və beynəlxalq təşkilatların rəhbər şəxsləri ilə ikitərəfli görüşlər keçirilib, səmərəli fikir mübadiləsi aparılıb. Tədbir iştirakçılarına Azərbaycan Respublikasında korrupsiyaya qarşı mübarizə sahəsində həyata keçirilmiş tədbirləri əks etdirən materiallar paylanılıb.

IV Monitorinq Raundu çərçivəsində Azərbaycan Respublikası üzrə qəbul edilmiş və özündə yeni tövsiyələri nəzərdə tutan müvafiq hesabatın prosedur qaydalarına uyğun olaraq, yaxın zamanda təşkilatın rəsmilərinin Bakıya səfəri zamanı aidiyyəti dövlət qurumlarının, qeyri-hökumət təşkilatlarının və kütləvi informasiya vasitələrinin nümayəndələrinin iştirakı ilə ictimaiyyətə açıqlanması nəzərdə tutulub.