İQTİSADİYYAT
“Azəristiliktəchizat” keçən il istilik enerjisinin 99,8 faizini təbii qazdan istifadə etməklə alıb
Bakı, 6 fevral, AZƏRTAC
“Azəristiliktəchizat” ASC ötən il istilik enerjisinin 99,8 faizini təbii qazdan istifadə etməklə alıb.
AZƏRTAC Energetika Nazirliyinə istinadla xəbər verir ki, “Azəristiliktəchizat” ASC 2020-ci il üçün təsdiq edilmiş istehsal və maliyyə təsərrüfat planlarına uyğun olaraq istilik təchizatı obyektlərinin, o cümlədən mövcud qazanxana, istilik şəbəkələri, nəzarət ölçü cihazları və avtomatika, qaz, elektrik, nəqliyyat təsərrüfatları və digər istehsal təyinatlı avadanlıqların 2020-2021-ci illər istilik mövsümünə hazırlığı ilə bağlı aşağıdakı işləri görüb:
- 985,6 kilometr istilik xətləri istilik şəbəkələrinin istismar qaydalarına uyğun olaraq hidravliki təzyiqə yoxlanılıb və yuyulub, 7749 metr məhəllədaxili və magistral istilik xətləri əsaslı təmir olunub, 439 kilometr istilik kəməri təmirdən sonra hidravlik təziyiqə yoxlanılıb
- 535 qazanxana və 90 istilik məntəqəsi kompleks yoxlanılıb
- istilik xətlərində 4180,7 kvadratmetr istilik örtük qatı təmir olunub, 2007 ədəd istilik kamerası təmizlənib və təmir olunub, gedən və qayıdan xətlərdə 13 dəst su sərfölçən həlqələr təmir və bərpa edilib.
- 902 ədəd qazan aqreqatı əsaslı və cari təmir edilib, 507 ədəd odluq təmir olunub
- 1209 ədəd qazan aqreqatı mexaniki və kimyəvi üsulla təmizlənib, 703 qazanxanada yeraltı və yerüstü tüstü yolları təmizlənməklə qazanların 796 kvadratmetr kərpic örtüyü, 1760 kvadratmetr izolyasiya örtüyü təmir edilib.
Hesabat ilində 1 milyon 503 min 838 Qkal istilik enerjisi istehsal edilib ki, bu da əvvəlki illə müqayisədə 83 min 280 Qkal və ya 5,5 faiz çoxdur. Topdansatış qaydası ilə "Azərenerji" ASC-nin İstilik Elektrik Mərkəzindən 156 min 557 Qkal istilik alınıb ki, bu da 2019-cu ilə görə 13 min 340 Qkal və ya 8,5 faiz çoxdur.
İstilik enerjisinin 99,8 faizi qaz yanacağı, 0,2 faizi mazut və soba yanacağı istifadə edilməklə istehsal olunub. İstilik itkiləri 12 faiz təşkil edib ki, bu da əvvəlki illə müqayisədə 0,3 faiz çoxdur. Qazın xüsusi sərfiyyatı 2019-cu ilə görə dəyişməyib.